JEREMAÏAH 50 - Khasi CL Bible (BSI)

Ka jingkurup ïa ka Babilon

¹ Kane ka dei ka khubor kaba U Trai u la ai ha nga shaphang ka nongbah Babilon bad ki briew jong ka:

² “Ïathuh ïa ka khubor sha ki jaitbynriew! Pynbna ïa ka! Ai ka dak bad pynbna ïa ka khubor! Wat buhrieh ïa ka! Ka Babilon ka la kyllon! U Marduk u blei jong ka u la khynñiuh! Ïa ki bleithaw jong Babilon la buh ha ka jinglehrain, ïa ki dur ba-ijli jong ka la pynlwet!

³ “Ka jaitbynriew na shatei ka la wan ban tur ïaleh ïa ka Babilonia bad yn pynlong ri shyiap ïa ka. Ki briew bad ki mrad kin phet krad noh, bad yn ym don bashong ba sah hangta.”

Ka jingwanphai ki Israel

⁴ U Trai u ong, “Haba ka por ka poi, ki paid Israel bad Judah kin wan ïa-ïam, kin wad ïa nga, U Blei jong ki.

⁵ Kin kylli ïa ka lynti sha Seïon bad nangta kin leit ha kata ka phang. Kin pynlong ka jutang baïaineh bad nga bad da lei lei kin ym pynkheiñ ïa ka.

⁶ “Ki briew jong nga ki long kum ki langbrot kiba ki nongap langbrot ki la shah ba kin jah noh ha ki lumbah. Ki la sakma kum ka langbrot na uwei u lum sha uwei pat, bad ki la klet hangno ka ïing jong ki ka don.

⁷ Ki la shah tur ïaleh da baroh kiba ïakynduh ïa ki. Ki nongshun jong ki, ki ong, ‘Ki la leh pop pyrshah ïa U Trai, bad kumta kaei kaba ngi la leh, kam long kaba bakla. Ki khun ki ksiew jong ki, ki la shaniah ha U Trai, bad ma ki hi kiba la dei ban ïailong kiba ïaineh ha u.’

⁸ “Ko ki paid Israel, to phet noh na Babilonia! Iehnoh ïa ka ri! Long kiba nyngkong ban iehnoh ïa ka!

⁹ Ngan pynkhih ïa ka kynhun ki hima kiba khlaiñ shaphang shatei bad pynlong ïa ki ban tur ïaleh ïa ka Babilonia. Kin ïeng ryntih ban ïaleh thma pyrshah ïa ka ri bad ban jop ïa ka. Ki long ki nongbeh mrad batbit, kiba siat khnam bym ju lait na ka sohpdung.

¹⁰ Ïa ka Babilonia yn lute, bad kito kiba lute ïa ka kin shim lut ïa kiei kiei baroh kiba ki kwah. Ma nga, U Trai, nga la kren.”

Ka jingkyllon ka Babilon

¹¹ U Trai u ong, “Ko ki paid ka Babilonia, phi la lute ïa ka jaitbynriew jong nga. Phi kmen bad phi sngewbha, phi da leh kum ka masi ba ïaid haba shoh kba ne kum u kulai uba pah,

¹² hynrei ïa ka nongbah bakhraw kaba dei ka jong phi yn pynpoh bad pynjahburom. Ka Babilonia kan long ka hima kaba poh tam na baroh; kan long kaba ryngkhiang bad ka ri shyiap bym don um satia.

¹³ Namar ka jingbitar jong nga, yn ym don u ban shong ban sah ha Babilon; kan sah ha ka jingjot, bad baroh kiba ïaid nangta kin kyndit bad lyngngoh.

¹⁴ “Ko nongsiatkhnam, to ïeng ryntih na ka bynta ka thma pyrshah ïa ka Babilon bad kerkut ïa ka. To siat ïa ki khnam jong phi baroh ïa ka Babilon, namar ka la leh pop pyrshah ïa nga, U Trai.

¹⁵ Pynjam ïa ka jingkyang thma baroh sawdong ka nongbah! Mynta ka Babilon ka la wan pyndem. Ki kynroh jong ka ki la pei lyngba bad la pyntwa. Nga siew kylliang ïa ki nong Babilonia. Te to siew kylliang ïa ki, bad leh ïa ki kumba ki la leh ïa kiwei.

¹⁶ Wat ai ba yn bet ïa ki symbai ha kata ka ri lane ai ba yn lum ïa ka jingmih. Man uwei pa uwei u nongwei uba shong hangta un sheptieng ïa ka kynhun shipai ba tur ïaleh bad ban leit phai ïing.”

Ka jingwanphai ka Israel

¹⁷ U Trai u ong, “Ki paid Israel ki long kum ki langbrot, ba la shah beh bad pynsakma da ki sing. Nyngkong, la tur ïaleh da u patsha ka Assyria, bad nangta u Nebukhadnessar u syiem ka Babilonia u ktha ïa ki shyieng jong ki.

¹⁸ Namar kane, ma nga U Trai Badonbor Baroh, U Blei ki Israel, ngan pynshitom ïa u syiem Nebukhadnessar bad ïa ka ri jong u, kumba nga la pynshitom ïa u patsha ka Assyria.

¹⁹ Ngan pynphai pat ïa ki paid Israel sha ka ri jong ki. Kin bam ïa ka jingbam kaba mih ha u lum Karmel bad ha ki phang ka Bashan, bad kin bam ïa baroh kaba ki kwah na ki jingthung kiba mih ha ki jaka jong ki Ephraim bad Gilead.

²⁰ Haba kata ka por ka wan, yn ym shem ïa ka pop ha Israel bad ïa ka jingbymman ha Judah, namar ngan map ïa kito ki briew kiba nga la pynsah ïa ka jingim jong ki. Ma nga, U Trai, nga la kren.”

Ka jingbishar U Blei halor ka Babilonia

²¹ U Trai u ong, “Tur ïaleh ïa ki briew jong ka Merathaim bad jong ka Pekod. Pynïap bad pynjot ïa ki. Leh ïa kiei kiei baroh ïa kiba nga hukum ïa phi. Ma nga, U Trai, nga la kren.

²² Ïa ka jingsawa jong ka thma la ïohsngew ha ka ri, bad ka don ka jingpynjot bakhraw.

²³ Ka Babilonia ka la tied tyrnem ïa ka pyrthei baroh kawei lyngkhot lyngkhai, bad mynta uta u tyrnem u khynñiuh! Ki jaitbynriew baroh ki kyndit halor kaei kaba la jia ïa kata ka ri.

²⁴ Ko Babilonia, pha ïaleh pyrshah ïa nga, bad pha la shah riam ha ka jingriam kaba nga la buh ïa pha, wat la pham shym la tip ïa ka.

²⁵ Nga la plie ïa ka jaka ha kaba la buh ïa ki atiar jong nga, bad ha ka jingbitar nga la shim noh ïa ki, namar ma nga, U Trai Nongsynshar Badonbor Baroh, nga don ka kam ban leh ha Babilonia.

²⁶ To tur ïaleh ïa ka na ki liang baroh bad pynpra phom ïa ki jaka ha kaba la buh ïa u kew! Kynton ïa ki jinglute kum ki kynton kew! Pynjot ïa ka ri! Wat ieh ei ei ruh!

²⁷ Pynïap ïa ki shipai jong ki baroh! Mait ïa ki! Ki briew ka Babilonia ki la kordit! Ka por ka la poi ïa ki ban shah pynshitom!”

²⁸ (Ki nongphetwir ki la lait phet na Babilonia bad wan sha Jerusalem, bad ki ïathuh kumno U Trai U Blei jong ngi u siew kylliang na ka bynta kaei kaba ki nong Babilonia ki la leh ïa ka Templ jong u.)

²⁹ “To ong ïa ki nongsiatkhnam ban tur ïaleh ïa ka Babilon. Phah ïa baroh kiba nang ban pyndonkam ïa ka ryntieh bad ïa u khnam. Kerkut ïa ka nongbah bad wat ai ba yn don ba lait phet. Siew kylliang pat ïa kiei kiei baroh ba ka la leh, bad leh ïa ka kumba ka la leh ïa kiwei, namar ba ka la leh da ka jingsarong pyrshah ïa nga, U Bakhuid ki Israel.

³⁰ Te ïa ki samla shynrang jong ka yn pynïap ha ki surok bah jong ka nongbah, bad ki shipai jong ka baroh yn pynjot ha kata ka sngi. Ma nga, U Trai, nga la kren.

³¹ “Ko Babilonia, pha la dap da ka jingsarong, te ma nga, U Trai Nongsynshar Badonbor Baroh, nga long pyrshah ïa pha! Ka por ka la poi ïa nga ban pynshitom ïa pha.

³² Ka hima basarong jong pha kan jynthut bad kyllon, bad yn ym don ban ïarap ban khyllie ïa pha. Ngan thang ïa ki nongbah da ka ding, bad kiei kiei baroh sawdong yn pynjot.”

³³ U Trai Badonbor Baroh u ong, “Ki paid Israel bad Judah ki shah banbeiñ. Baroh kiba kurup ïa ki, ki khmih pyrman ïa ki bad kin ym pyllait ïa ki.

³⁴ Hynrei uwei u ban pyllait ïa ki u long uba khlaiñ — ka kyrteng jong u ka long U Trai Badonbor Baroh. Ma u hi da lade un bahkhlieh na ka bynta jong ki bad un wallam ïa ka jingsuk ha ka pyrthei, hynrei ka jingjynjar ïa ki briew jong ka Babilonia.”

³⁵ U Trai u ong, “Ka Jingïap ïa ka Babilonia! Ka Jingïap ïa ki briew jong ka, ïa ki nongsynshar jong ka, ïa ki rangbah bastad jong ka.

³⁶ Ka Jingïap ïa ki nongïathuhlypa bashukor jong ka — katno ki long kiba bieit! Ka Jingïap ïa ki shipai jong ka — katno ki long kiba sheptieng!

³⁷ Pynjot ïa ki kulai bad ki kali ïapom jong ka! Ka Jingïap ïa ki shipai ba shu wai — Katno ki long kiba tlot! Pynjot ïa ki jingkynshew jong ka; lute bad rong noh.

³⁸ Wallam ïa ka jingrang ryngkhiang ha ka ri jong ka bad pynrngad lut ïa ki wah jong ka. Ka Babilonia ka long ka ri jong ki bleithaw ba-ishyrkhei, kiba la pynkylla bieit ïa ki briew.

³⁹ “Bad kumta ka Babilon kan long kaba shongksuid bad ba don ki mynsiem bymman, bad ki sim bymkhuid. Ki briew kin ym shong shuh hangta lano lano ruh, lymne ha ki por baroh ki ban wan.

⁴⁰ Kajuh kaei kaei kan jia ïa ka Babilon kumba ka la jia ïa ka Sodom bad Gomorrah, haba nga la pynjot ïa ki bad ïa ki shnong kiba marjan. Yn ym don ba shong shuh hangta. Ma nga, U Trai, nga la kren.

⁴¹ “Ki briew ki wan na ka ri bashatei, ka jaitbynriew bakhrawbor na jngai bah; shibun ki syiem ki pynkhreh ïa ka thma.

⁴² Ki la rah ïa la ki ryntieh bad ki waitlam; ki long kiba runar bad ki bymsngewsynei. Ki sawa kum ka duriaw bakyrhuh, katba ki dang ïaid halor ki kulai. Ki long kiba la pynkhreh ïa ka thma pyrshah ïa ka Babilonia.

⁴³ U syiem ka Babilonia u ïohsngew ïa ka khubor, bad ki kti jong u ki noh kyrwep. U don ha ka jinglyng-a, da ka jingpang kum ka briew kaba suh kha.

⁴⁴ “Kum u sing uba wan mih na ki khlaw barben kiba don shi lynter ka rud Jordan haduh ka jaka phlang bajyrngam, ma nga, U Trai, ngan wan bad ngan pynlong ïa ki nong Babilonia ban phet krad kynsan na ka nongbah jong ki. Te u nongïalam uba nga jied un synshar ïa ka hima. Mano ban ïanujor bad nga? Uno uba nud ban wan kob ïa nga? Uei u nongsynshar uba lah ban ïeng pyrshah ïa nga?

⁴⁵ Kumta to shahshkor ïa ka jingthmu kaba nga la don pyrshah ïa ka nongbah Babilon bad ïa kaei kaba nga thmu ban leh ïa ki briew jong ka. Wat ïa ki khynnah yn paring ïa ki, bad baroh kin sngewtriem.

⁴⁶ Haba ka Babilon ka kyllon, kan don ka jingsawa ka ban pynkhynñiuh ïa ka pyrthei baroh kawei, bad ïa ki jingïam pynkyndit yn ïohsngew da kiwei ki jaitbynriew.”