JEREMAÏAH 5 - Khasi CL Bible (BSI)

Ka pop jong ka Jerusalem

¹ Ko ki briew ka Jerusalem, to phet lyngba ki surok bah jong phi! To khmih sawdong! Peit hi da lade! To wad ïa ki jaka ïew! Hato phi lah ban shem uwei u briew uba leh ïa kaba dei bad uba pyrshang ban ïaineh ha U Blei? Lada phi lah, U Trai un map ïa ka Jerusalem.

² Wat la phi kam ba phi mane ïa U Trai, phim shym mut kumba phi ong.

³ Da shisha U Trai u peit ïa ka jingïaineh. U la shoh ïa phi, hynrei phim shym pynleit jingmut; u la pynlwet ïa phi, hynrei phi la kyntait ban ïoh jinghikai. Phi long kiba mutlop bad phim shym phai na ki pop jong phi.

⁴ Nangta nga la pyrkhat, “Kine ki long tang kiba duk bad ki bym sngewthuh. Ki la leh bieit; kim tip ïa kaei kaba U Blei jong ki u dawa, ïa kaei U Trai u kwah ïa ki ban leh.

⁵ Ngan leit sha ki briew kiba ha ka bor; bad ïakren bad ki. Da shisha ki tip kaei ba U Blei u dawa, kaei ba U Trai u kwah ïa ki ban leh.” Hynrei ki baroh ki la kyntait ïa ka iktiar jong U Trai bad ki kyntait ban kohnguh ïa u.

⁶ Dei kata keiñ balei ba ki sing na khlaw kin pynïap ïa ki, ki suri na ka ri shyiap kin tar lyngkhot ïa ki, bad ki 'labasa kin ïaid apthap lyngba ki shong jong ki. Lada kito ki briew ki mih shabar, yn tar lyngkhot ïa ki namar ki pop jong ki, ki long kiba bun bad na ka por sha ka por ki la phai dien noh na U Blei.

⁷ U Trai u kylli, “Balei ngan map ïa ki pop jong ki briew jong nga? Ki la iehnoh ïa nga, bad ki la mane ïa ki blei ki bymshisha. Nga la bsa ïa ki briew jong nga haduh ba kin da kdang, hynrei ki la leh awria, bad ki la pynlut ïa ka por jong ki bad ki nuti.

⁸ Ki la long kum ki kulai ba la bsa bha, ki bym lah synshar ha ki jingkwah, uwei pa uwei u da kwah brai ïa ka tnga jong u paramarjan jong u.

⁹ Hato ngan ym pynshitom ïa ki na ka bynta kine kiei kiei? bad pynhiarkput ïa ka jaitbynriew kaba kum kane?

¹⁰ Ngan phah ïa ki nongshun ban khet ïa ki bri sohwaiñ jong ki briew jong nga, hynrei ym ban pynjot khoit ïa ki. Ngan ong ïa ki ban khet noh ïa ki tnat jong ki, namar kito ki tnat kim dei ki jong nga.

¹¹ Ki briew jong ka Israel bad Judah ki la shetkylla la biang ïa nga, ma nga, U Trai, nga la kren.”

U Trai u kyntait ïa ki Israel

¹² Ki briew jong U Trai ki la len ïa u bad ki la ong, “Un ym leh ei ei da shisha. Ngin ym mad ïa ki por ba-eh; ngin ym mad ïa ka thma lane ka 'nemsniew.”

^13-14 Ki la ong ba ki nongïathuhlypa kim long ei ei hynrei ki pla dap lyer bad ba kim don ka khubor na U Trai. U Trai U Blei Badonbor Baroh u la ong ha nga, “Ko Jeremaïah, namar ba kine ki briew ki la kren ïa kum kine kiei kiei, ngan pynlong ïa ki ktien jong nga kum ka ding ha ka shyntur jong me. Ki briew kin long kum ka dieng, bad ka ding kan bam duh ïa ki.”

¹⁵ Ko ki paid Israel, U Trai u wallam ka jaitbynriew na sha jngai ban tur ïaleh ïa phi. Ka long ka jaitbynriew kaba khlaiñ bad kaba la rim, ka jaitbynriew kaba ïa ka ktien jong ka phim tip.

¹⁶ Ki rang bahryntieh jong ki, ki long ki shipai bakhrawbor kiba pynïap khlem jingisynei.

¹⁷ Kin bam duh ïa ki jingthung bad ïa ki jingbam jong phi; kin pynïap ïa ki khun shynrang bad ki khun kynthei jong phi. Kin pynïap ïa ki kynhun langbrot bad ki kynhun masi jong phi bad pynjot ïa ki dieng sohwaiñ bad diengsoh Dumbur jong phi. Ïa ki nongbah ba la ker kynroh ha kiba phi shaniah yn pynjot da ka kynhun shipai jong ki.

¹⁸ U Trai u ong, “Wat ha kito ki sngi ngan ym pynjot khoit ïa ki briew jong nga.

¹⁹ Haba ki kylli balei ba nga la leh ïa kine kiei kiei, ïathuh ïa ki, ko Jeremaïah, ba kumba ki la phai noh na nga bad shakri ïa ki blei nongwei ha ka ri jong ki hi, kumta kin shakri ïa ki nongwei ha ka ri ka bym dei ka jong ki.”

U Blei u maham ïa la ki briew

²⁰ U Trai u ong, “To ïathuh ïa ki khun ki ksiew jong u Jakob, ïathuh ïa ki briew jong ka Judah:

²¹ To pynshahshkor, phi ki briew kiba bieit bad ba-mutlop, kiba don ki khmat, hynrei ki bym lah ïohi, bad kiba don ki shkor, hynrei ki bym lah ïohsngew.

²² Nga long U Trai; balei phim sheptieng ïa nga? Balei phim khynñiuh ha khmat jong nga? Nga la buh ïa u shyiap kum u pud jong ka duriaw, u pud uba neh ba kam lah ban jam palat. Ka duriaw ka lah ban kynting, hynrei kam lah ban leit palat ïa u; ki jingat phyllung ki lah ban kyrhuh, hynrei kim lah ban ksam lyngba.

²³ Hynrei ma phi ki briew! Phi long kiba eh ryndang bad kiba ïeng ïaleh pyrshah; phi la phai noh sharud bad iehnoh ïa nga.

²⁴ Phim ju pyrkhat da lei lei ban pyndonburom ïa nga, wat la nga phah ïa u slap synrai bad ïa u slap pyrem bad ai ha phi ïa ka aïom ot man la ka snem.

²⁵ Pynban, ki pop jong phi ki la bat noh ïa kine kiei kiei kiba bha na phi.

²⁶ “Ki riewsniew ki don hapdeng ki briew jong nga; ki apthap kum ki briew kiba phriang ïa ki jar ban riam ïa ki sim, hynrei kiba pynap ïa ki jingriam jong ki ban riam ïa ki briew.

²⁷ Kumba u nongriam sim u pyndap ïa ka ruh jong u da ki sim, ki la pyndap ïa ki ïing jong ki da ka jinglute. Dei kata keiñ balei ba ki long kiba donbor bad kiba riewspah,

²⁸ balei ba ki sngaid bad ba la ïoh jingbsa bha. Ym don pud satia ïa ki kam sniew jong ki. Kim ju ai ïa ki hok jong ki khunswet lane pyn-i ka jingbishar hok ïa kiba la shah banbeiñ.

²⁹ “Hynrei ma nga, U Trai, ngan pynshitom ïa ki na ka bynta kine kiei kiei, ngan pynhiarkput halor kane ka jaitbynriew.

³⁰ Kaba sngewshyrkhei bad kaba sngewkyndit ka la jia ha kane ka ri:

³¹ Ki nongïathuhlypa kim kren ei ei hynrei tang ki jinglamler; ki lyngdoh ki synshar tang kumba hukum ki nongïathuhlypa, bad ki briew jong nga kim shym pynpaw jingpyrshah ei ei. Hynrei kin leh aïu haba baroh ka poi sha kaba kut?”