JEREMAÏAH 49 - Khasi CL Bible (BSI)

Ka jingbishar U Trai halor ki Ammon

¹ Kane ka dei kaei kaba U Trai u ong shaphang ka Ammon: “Shano ki rangbah ka Israel? Hato ym don mano mano ban ïada ïa la ka ri? Balei ba ki shah ïa ki briew kiba mane ïa u Molekh kin shim ïa ki jaka jong ka jait Gad bad shongduh hangta?

² Hynrei ka por ka poi haba ngan pynlong ïa ki briew jong ka nongbah Rabbah ban ïohsngew ïa ka jingsawa jong ka thma, bad yn ieh ïa ka ha ka jingjot bad ïa ki nongrit jong ka ban thang haduh khyndew. Nangta ki Israel kin shim pat ïa la ka jaka na kito kiba la shim ïa ka na ki.

³ Ki briew ka Heshbon, ki kyang! Ïa ka Ai la pynjot! Ki kynthei ka Rabbah, ki leit ïam sngewsih! Ki phong ïa ki jaiñ khain bad ïam pangnud. Ki mareh lamwir. Ïa u Molekh u blei jong phi yn ïalam mraw, lem bad ki lyngdoh bad ki khun syiem.

⁴ Balei ba ma phi ki briew bymïaineh phi kren sarong? Ka jingkhlaiñ jong phi ka la nang hiar. Balei ba phi shaniah ha la ka bor bad phi ong ba ym don ba nud ban tur ïaleh ïa phi?

⁵ Ngan wallam ïa ka jingma ha phi na ki liang baroh. Baroh phin phet krad. Uwei pa uwei un phet ïap namar la ka jingim, bad yn ym don shuh mano mano ban wallam lang sa shisien ïa ki shipai.

⁶ “Hynrei hadien ngan pynlong ïa ka Ammon ban manbha biang. Ma nga, U Trai, nga la kren.”

Ka jingbishar U Trai halor ki Edom

⁷ Kane ka dei kaei kaba U Trai Badonbor Baroh u ong shaphang ka Edom: “Hato ki briew ka Edom ki la duh noh ïa la ka jingbishar babha? Hato ki nongaibuit jong ki kim lah shuh ban ïathuh ïa ki kaei ba ki dei ban leh? Hato ka jingstad jong ki baroh ka la jah noh?

⁸ Ko ki briew ka Dedan, to phai noh bad phet! To rieh! Ngan pynjot ïa ki khun ki ksiew u Iso, namar ka por ka la poi ïa nga ban pynshitom ïa ki.

⁹ Haba ki briew ki kheit sohwaiñ, ki ieh de katto katne halor dieng, bad haba ki nonglute ki wan mynmiet, ki shim tang ïa kaei kaba ki kwah.

¹⁰ Hynrei nga la sloit lut ïa ki khun ki ksiew u Iso bad pynpaw ïa ki jakarieh jong ki, te ba kin ym lah buhrieh shuh. Ïa baroh ki briew ka Edom la pynjot. Khlem pynsah shuh ïa uwei ruh.

¹¹ Ieh ïa ki khunswet bad nga, bad ngan sumar ïa ki. Ki riewkynthei ki lah ban shaniah ha nga.

¹² “Wat lada kito ki bym dei hok ban shah pynshitom ki dei ban dih na ka khuri jong ka jingpynshitom, hato phi pyrkhat ba ma phi phin lait noh khlem shah pynshitom? Em, phi dei ban dih na kane ka khuri!

¹³ Nga da lade hi nga la smai ba kane ka nongbah Bosrah kan long ka jingïohi ba-itriem bad ka ri shyiap; ki briew kin rkhiebeiñ ïa ka bad kin pyndonkam ïa ka kyrteng jong ka kum ka jingtim. Baroh ki nongrit ba-marjan kin don ha ka jingjot junom. Ma nga, U Trai, nga la kren.”

¹⁴ Nga ong, “Ko Edom, nga la ïohpdiang ïa ka khubor na U Trai. U la phah ïa u nonglamktien ban ïathuh ïa ki jaitbynriew ban ïalumlang ïa ki shipai bad ban pynkhreh ban tur ïaleh ïa pha.

¹⁵ U Trai un pynlong ïa pha ban nang tlot, bad yn ym don baburom ïa pha.

¹⁶ Ka jingsarong jong pha ka la shukor ïa pha. Ym don ba sheptieng ïa pha katta kumba pha pyrkhat ba ki long kumta. Pha shong ha ki synrang maw, ha kliar ki lumbah; hynrei wat la pha shong hajrong tam kum u pukni, U Trai un wallam ïa pha sha tbian. U Trai u la kren.”

¹⁷ U Trai u ong, “Ka jingpynjot ka ban wan hap ha ka Edom kan long kaba da shyrkhei haduh ba kiba ïaid nangta kin kyndit bad sheptieng.

¹⁸ Kajuh hi kan jia ïa ka Edom kumba ka la jia ïa ka Sodom bad Gomorrah, mynba ïa ki bad ïa ki shnong ba-marjan la pynjot. Yn ym don ban sah biang hangta. Ma nga, U Trai, nga la kren.

¹⁹ Kum u sing uba wan mih na ki khlaw barben artet ïa ka Jordan haduh ki jaka phlang bajyrngam, ngan wan bad ban pynlong ïa ki nong Edom ban phet krad kyndit na ka ri jong ki. Nangta u nongïalam uba nga jied un synshar ïa ka hima. Uno uba lah ban ïanujor bad nga? Uno uba nud ban ïakob bad nga? Uei u nongsynshar uba lah ban ïeng pyrshah ïa nga?

²⁰ Kumta to shahshkor ïa ka jingthmu kaba nga don pyrshah ïa ki briew ka Edom, bad ïa kaei kaba nga thmu ban leh ïa ki briew jong ka nongbah Teman. Wat ïa ki khynnah yn paring ïa ki, bad uwei pa uwei un sngewtriem.

²¹ Haba ka Edom kan kyllon, kan don ka jingsawa kaba jur kat haduh ba ka pyrthei baroh kawei kan khynñiuh, bad ïa ki jingkyang tieng yn ïohsngew jngai shaduh ka khmut duriaw Akaba.

²² U nongshun un tur ïaleh ïa ka Bosrah kum u pukni uba suh wia sha tbian lem bad ki thapniang ba-pyiar. Ha kata ka sngi ki shipai Edom kin sheptieng kum ka briew kaba suh kha.”

Ka jingbishar U Trai halor ka Damaskos

²³ Kane ka dei kaei kaba U Trai u ong shaphang ka Damaskos: “Ki briew ha ki nongbah jong ka Hamath bad ka Arpad ki khuslai bad ki sngew jynjar namar ki la ïohsngew ïa ki khubor basniew. Ka jinglyng-a ka tyllun halor jong ki kum ka duriaw, bad kim ïoh jahthait.

²⁴ Ki briew jong ka Damaskos ki long kiba tlot bad ki la phet ha ka jingsheptieng. Ki don ha ka jingud bad jingjynjar kum ka briew kaba suh kha.

²⁵ Ka nongbah bapawnam kaba ju dap tang da ka jingsngewbha kan shah iehnoh ïingjah.

²⁶ Ha kata ka sngi ïa ki samla shynrang yn pynïap ha ki lynti bah jong ka nongbah, bad ïa ki shipai jong ka baroh yn pynjot.

²⁷ Ngan pynpluh ïa ki kynroh jong ka Damaskos da ka ding bad yn thang khoit ïa ki ïingsyiem jong u syiem Benhadad. Ma nga, U Trai Badonbor Baroh, nga la kren.”

Ka jingbishar halor ka jait Kedar bad ïa ka nongbah Hasor

²⁸ Kane ka dei kaei kaba U Trai u ong shaphang ka jait Kedar bad ïa ki distrik hapoh ka jingpynïaid u Hasor, ïa kiba la jop thma da u Nebukhadnessar u syiem ka Babilonia: “Tur ïaleh ïa ki briew jong ka Kedar bad pynjot ïa kata ka jait jong ki briew na mihngi!

²⁹ Knieh ïa ki ïingjaiñ bad ïa ki jingri jong ki, ïa ki pyrda jong ka ïingjaiñ bad baroh kiei kiei kiba don ha ki ïingjaiñ jong ki. Shim ïa ki ut jong ki bad ong ïa ki briew, ‘Ka jingma ka don baroh sawdong jong phi.’

³⁰ “Ko ki briew ka Hasor, ma nga, U Trai, nga maham ïa phi ban phet noh bad ban leit rieh. U Nebukhadnessar, u syiem ka Babilonia u la ïasylla pyrshah ïa phi, bad kane ka dei kaei kaba u ong,

³¹ ‘To wan, ngin leit tur ïaleh ïa kito ki briew kiba sngewshngain bad sngewskhem! Ka nongbah jong ki, kam don ki khyrdop ne ki tala bad kam don jingïada ei ei.’

³² “Shim ïa ki ut jong ki bad ïa baroh ki jingri jong ki! Ngan pynsakma sha ki liang baroh ba kito ki briew kiba la khap lyngkot ïa la ki shñiuh, bad ngan wallam ka jingjot ha ki na ki liang baroh.

³³ Ïa ka Hasor yn pynkylla ri shyiap junom, ka jaka ha kaba tang ki myrsiang kin im. Yn ym don mano mano shuh ban shong ban sah biang hangta. Ma nga, U Trai, nga la kren.”

Ka jingbishar U Trai halor ka Elam

³⁴ Shen hadien ba u Sedekaïah u la long u syiem ka Judah, U Trai Badonbor Baroh u la kren ha nga shaphang ka ri Elam.

³⁵ U ong, “Ngan pynïap ïa ki nongsiatkhnam kiba la pynlong ïa ka Elam ban long kaba khrawbor.

³⁶ Ngan pynlong ïa ki lyer ban beh pyrshah ïa ka Elam na ki liang baroh, bad ngan pynsakma ïa ki briew jong ka kylleng, haduh ba yn ym don ki ri ha kiba ki nongphetwir na ka kim shym poi.

³⁷ Ngan pynlong ïa ki briew ka Elam ban sheptieng ïa ki nongshun jong ki, kiba kwah ban pynïap ïa ki. Ha ka jingbitar bakhraw jong nga ngan pynjot ïa ki briew ka Elam bad ngan phah ki shipai pyrshah ïa ki haduh ba ngan da pynduh khoit ïa ki.

³⁸ Ngan pynjot ïa ki syiem bad ïa ki nongïalam jong ki, bad ngan buh ïa ka khet jong nga hangta.

³⁹ Hynrei hadien ngan pynlong ïa ki briew ka Elam ba kin manbha biang. Ma nga, U Trai, nga la kren.”