JEREMAÏAH 48 - Khasi CL Bible (BSI)

Ka jingpynjot ïa ka Moab

¹ Kane ka dei kaei kaba U Trai Badonbor Baroh u ong shaphang ka Moab: “Isynei ïa ki briew jong ka Nebo — ïa ka shnong jong ki la pynjot! La kurup ïa ka Kiriathaim, ïa ka kut baskhem la pynpra, bad ïa ki briew jong ka la pynlehrain; ka burom jong ka Moab ka la jah noh.

² Ki nongshun ki la knieh ïa ka Heshbon bad ki ïasylla ban pynjot ïa ka hima ki Moab. Ïa ka shnong Madmen yn pynsngap jar; ki shipai kin tur pyrshah ïa ka.

³ Ki paid ka Horonaim ki kyang, ‘Ka Jinglehbor! Ka Jingpynjot!’

⁴ “Ïa ka Moab la pynjot; ha sngap ïa ki khynnah ba ki ïam.

⁵ Sngap ïa ka sur jong ki jingud jong ki ha ka lynti sha Luhith, ki jingïam jong ka jingshem jynjar ha ka lynti arsut sha Horonaim.

⁶ ‘Pynkloi, phet ban lait im!’ ki ong. ‘Mareh kum u kada khlaw ka ri shyiap!’

⁷ “Ko Moab, pha shaniah ha la ka jingkhlaiñ bad ha la ka spah, hynrei mynta wat ïa pha ruh yn jop noh; ïa u blei Khemosh jong pha yn ringmraw, lem bad ki khun syiem bad ki lyngdoh.

⁸ Yn ym don kawei ruh ka shnong ka ban lait na ka jingpynjot; ki ri them bad ki ri thor kin shah pynjot. Ma nga, U Trai, nga la kren.

⁹ To buh ïa u maw jingtep na ka bynta ka Moab; shen yn pynjot ïa ka. Ïa ki shnong jong ka yn ieh ha ka jingjot, bad yn ym don shuh uwei ruh u ban shong ban sah pat hangta.”

¹⁰ (Long ba la tim ïa u briew u bym leh ïa ka kam U Trai da ka dohnud jong u baroh! Long ba la tim ïa uno uno u bym pom bad pynïap!)

Ïa ki nongbah jong ka Moab la pynjot

¹¹ U Trai u ong, “Ka Moab ka la ju long kaba shongshngain bad ym pat ju ïalam mraw ïa ka. Ka Moab ka long kum ka waiñ kaba la shu ieh kumta khlem pynkhih bad ka bym ju phylliew na uwei u klong sha uwei pat. Ïa ka jingsuhsieng jong ka ym pat shu pynsniew, bad ka jingmad jong ka, ka long kaba bang kumba ju long.

¹² “Te mynta, ka por ka poi haba ngan phah ïa ki briew ban theh noh ïa ka Moab kum ka waiñ. Kin pynthylli ïa ki khra buh waiñ bad pynpait lyngkhot ïa ki.

¹³ Nangta ki nong Moab kin ym sngewbha ïa u blei Khemosh jong ki, kumba ki Israel kim sngewbha ïa u blei Bethel ha uba ki shaniah.

¹⁴ “Ko ki rangbah ka Moab, balei ba phi kam ïa lade kum ki riewkhraw, ki shipai bashlur ba la tynjuh ha ka thma?

¹⁵ Ïa ka Moab bad ïa ki nongbah jong ka la pynjot, ïa ki samla shynrang bakynsai tam la pynïap. Nga long u syiem, U Trai Badonbor Baroh, bad nga la kren.

¹⁶ Ka jingshahjop jong ka Moab ka la jan; ka jingjot jong ka, ka la jan.

¹⁷ “To ïambriew na ka bynta kata ka hima, phi kiba shong marjan, phi baroh kiba tip ïa ka jingpawnam jong ka. To ong, ‘Ka jingsynshar bakhrawbor jong ka la pyndkut; ka burom bad ka bor jong ka kam don shuh.’

¹⁸ Phi kiba shong ha Dibon, to hiar noh na ka jaka badonburom jong phi bad shong ha khyndew ha u pui pui; u nongpynjot ka Moab u don hangne bad u la ieh ïa ki kut jong ka ha ki jingjot.

¹⁹ Phi kiba shong ha Aroer, ïeng harud lynti bad ap; kylli na kito kiba ïaphet noh, wad jingtip na ki ïa kaei kaba la jia.

²⁰ ‘Ka Moab ka la kyllon,’ kin jubab, ‘ïam na ka bynta jong ka; la pynjahburom ïa ka. Pynbna ha lynter ka wah Arnon ba ïa ka Moab la pynjot!’

²¹ “Ka jingbishar ka la wan ha ki nongbah jong ki sharing lum: ha ka Holon, Jahsah, Mephath,

²² Dibon, Nebo, Beth Diblathaim,

²³ Kiriathaim, Bethgamul, Bethmeon,

²⁴ Kerioth, bad Bosrah. Ka jingbishar ka la wan ha ki nongbah baroh jong ka Moab, hajan bad hajngai.

²⁵ Ïa ka jingkhlaiñ jong ka Moab la khñiot noh; ïa ka bor jong ka la pynjot. Ma nga, U Trai, nga la kren.”

Ïa ka Moab la pyndem

²⁶ U Trai u ong, “To pynbuaid ïa ka Moab, namar ka la ïaleh pyrshah ïa nga. Ka Moab kan syntuid ha la ka prie, bad ki briew kin rkhie.

²⁷ Ko Moab, to kynmaw kumno pha rkhiebeiñ ïa ki paid Israel? Pha la leh ïa ki kumba ki la ngat ha ka kynhun ki nonglute.

²⁸ “Phi ki briew kiba shong ha Moab, iehnoh ïa la ki shnong! Khie bad leit sah ha ki riat bah! Long kum ka lyngdkhur kaba thaw ïa la ka skum harud jong ka synrang.

²⁹ Ka Moab ka sarong palat! Nga la ïohsngew katno ka jingsarong, ka jingsngewbiang ki briew ki long, katno ki pyrkhat shaphang ïa lade.

³⁰ Ma nga, U Trai, nga tip ïa ka jinglehmeng jong ki. Ki jingkob jong ki kim long ei ei ruh, bad kiei kiei kiba ki leh kin ym neh.

³¹ Bad kumta ngan ïam na ka bynta uwei pa uwei ha Moab bad na ka bynta ki briew jong ka Kir Heres.

³² Ngan ïam na ka bynta ki briew ka Sibmah, wat kham palat ban ïa ki briew ka Jaser. Ko ka nongbah Sibmah, pha long kum u dieng sohwaiñ uba ki tnat jong u ki poi shaduh sha shiliang ka Duriaw Baïap bad jngai shaduh Jaser. Hynrei mynta ïa ki soh lyiur jong pha bad ïa ki sohwaiñ jong pha la pynjot.

³³ Ïa ka jingsngewbha bad ka jingkmen la shim noh na ki jaka baseisoh jong ka Moab. Nga la pynlong ïa ka waiñ ban sangeh ban tuid na ki jaka khñiot waiñ; ym don shuh mano mano ba shna ïa ka waiñ bad ban pyrta da ka jingkmen.

³⁴ “Ki briew jong ka Heshbon bad ka Elealeh ki kyang, bad ïa ka jingkyang jong ki lah ban ïohsngew shaduh sha Jahas; lah ban ïohsngew da ki briew ha Soar, bad la ïohsngew shaduh sha Horonaim bad sha Eglath Shelishiyah. Wat ka wahduid Nimrim ka la rngad noh.

³⁵ Ngan pynsangeh ïa ki briew ka Moab na kaba thang jingainguh ha ki jaka mane jong ki bad ban ai ïa ki jingkñia sha ki blei jong ki. Ma nga, U Trai, nga la kren.

³⁶ “Te ka dohnud jong nga ka ïam sngewsih na ka bynta ka Moab bad na ka bynta ki briew ka Kir Heres, kumba mano re ba tem ïa ka jingrwai ïapbriew ha ka tangmuri, namar baroh kiei kiei kiba dei ki jong ki kim don shuh.

³⁷ Baroh na ki, ki la khi ïa la ki khlieh bad ki la khapnoh ïa la ki 'ñiuhtmoh. Baroh ki la pynmong ïa la ki kti, bad uwei pa uwei u phong ïa ki jaiñ khain.

³⁸ Halor ki tnum ïing baroh ha Moab bad ha baroh ki jaka paidbah ym don ei ei hynrei tang ka jingïam sngewsih, namar nga la pynpait ïa ka Moab kum u khra uba ym don shuh mano mano ban kwah.

³⁹ Ïa ka Moab la pynkhynñiuh! To kyang jam! Ïa ka Moab la pynjahburom. Ka don ha ki jingjot, bad baroh ki hima ba don sawdong ki rkhiebeiñ ïa ka. Ma nga, U Trai, nga la kren.”

Ym don jingpyllait ïa ka Moab

⁴⁰ U Trai u la kular ba ka hima kan hiar halor ka Moab kum u pukni lem bad ki thapniang ba-pyiar jong u,

⁴¹ bad ïa ki shnong bad ki kut yn kurup. Ha kata ka sngi ki shipai jong ka Moab kin sheptieng kum ka briew kaba suh kha.

⁴² Ïa ka Moab yn pynjot bad kan ym long shuh ka hima, namar ka ïaleh pyrshah ïa nga.

⁴³ Ka jingshyrkhei, ki liewlep, bad ki jingriam ki ap ïa ki briew ka Moab. U Trai u la kren.

⁴⁴ Uno uno uba pyrshang ban lait na ka jingshyrkhei un hap hapoh ki liewlep, bad uno uno uba kiew na ki liewlep un ngat ha ki jingriam, namar U Trai u la buh por na ka bynta ka jingpynjot ïa ka Moab.

⁴⁵ Ki nongphetwir bymdonbor shuh ki pyrshang ban wad jingïada ha Heshbon, ka nongbah kaba u syiem Sihon shisien u la synshar, hynrei ka don ha ki thylliej ding. Ka ding ka la bam duh ïa ki jaka kiba ha khmat bad ïa ki lumbah bajrong jong ki nong Moab kiba sngewtynnat ïa ka thma.

⁴⁶ Isynei ïa ki briew ka Moab! Ïa ki briew kiba mane ïa u Khemosh la pynjot, bad ïa ki khun shynrang bad ki khun kynthei la ïalam noh kum ki koidi.

⁴⁷ Hynrei ha ki sngi ki ban wan U Trai un pynlong ïa ka Moab kaba dap kyrhai sa shisien. Kane baroh ka long kaei kaba U Trai u la ong ba kan jia ïa ka Moab.