JEREMAÏAH 47 - Khasi CL Bible (BSI)

Ka khubor U Trai shaphang ka Philistia

¹ Ha shuwa ba u syiem jong ka Ijipt un tur ïaleh ïa ka Gasa, U Trai u la kren ha nga shaphang ka Philistia.

² U ong: “Ha khmih! Ki um ki la nang shlei na shatei bad kin tuid stet kum ka wah ba la shlei um. Kin tap ïa ka ri bad ïa kiei kiei baroh kiba don ha ka, ki nongbah bad ki briew kiba im hangta. Ki briew kin pyrta jingïarap; baroh kiba ha ka pyrthei kin ïamkthang.

³ Kin ïohsngew ïa ki jingsawa ki jingjam jong ki kulai, ki jingriew jong ki kali ïapom, ki jingtyllun jong ki shaka. Ki kpa kin phai pat na ka bynta la ki khun; ki kti jong ki kin noh kyrwep.

⁴ Ka por ka la poi ban pynjot ïa ka Philistia, ban pyndam noh na ka Tyros bad ka Sidon ïa ka jingïarap baroh kaba dang sah. Ma nga, U Trai, ngan pynjot ïa ki nong Philistia, baroh kiba wan na ki rud duriaw ka Krit.

⁵ Ka jingsngewsih bakhraw ka la wan ha ki briew jong ka Gasa, bad ki briew jong ka Ashkelon ki sngap jar. Katno slem kiba dang sah ha Philistia kin ïam sngewsih?

⁶ Phi kyang jam, ‘Ka waitlam jong U Trai! Katno slem phin ïai talain ïa ka? Khie leit phai noh sha ka jingsop, sah hangta bad shongthait!’

⁷ Kumno ka lah ban shongthait, haba nga la ai kam ïa ka ban leh? Nga la hukum ïa ka ban tur ïaleh ïa ka Ashkelon bad ïa ki briew kiba sah ha ki rud duriaw.”