JEREMAÏAH 46 - Khasi CL Bible (BSI)

Ka jingshahjop ka Ijipt ha Karkhemish

¹ U Trai u la kren ha nga shaphang ki hima, da kaba sdang na ka Ijipt.

² Kane ka dei kaei kaba u ong shaphang ki kynhun shipai u Neko, u syiem ka Ijipt, ïa uba u Nebukhadnessar, u syiem ka Babilonia u la jop ha Karkhemish hajan ka wah Ïuphratis ha ka snem kaba saw ba u Jehoïakim u long u syiem ka Judah:

³ “Ki rangbah shipai ka Ijipt ki pyrta, ‘Pynkhreh ïa ki stieh jong phi bad tur sha ka thma!

⁴ Teh jin ha ki kulai jong phi bad shong halor jong ki! Ïeng ryntih bad phong ïa ki jingda khlieh jong phi! Pynnep ïa ki sum jong phi! Kieng ïa ka atiar jong phi!’

⁵ “Hynrei kaei ba nga ïohi?” U Trai u kylli. “Ki phai dien ha ka jingsheptieng. Ki shipai jong ki, ki shah beh noh; kiba dap da ka jingsheptieng, ki mareh stet kat lah kat ïai bad kim kyrtiang dien.

⁶ Kito kiba mareh stet kim shym lah ban phet; ki shipai kim shym lah ban lait. Ha ka phang bashatei, hajan ka Ïuphratis, ki jynthut bad ki kyllon.

⁷ Kaei kane kaba shlei kum ka Nile, kum ka wah kaba shlei ïa ki rud jong ka?

⁸ Ka dei ka Ijipt, kaba shlei kum ka Nile, kum ka wah ba shlei ïa ki rud jong ka. Ka Ijipt ka ong, ‘Ngan shlei bad ngan tyllep ïa ka pyrthei; ngan pynjot ïa ki nongbah bad ïa ki briew bashong hangta.

⁹ Hukum ïa ki kulai ban leit bad ïa ki kali ïapom ban tyllun! To phah noh ïa ki shipai: ki rangbah na Sudan bad Lydia, kiba rah ïa ki stieh bad ki nongsiatkhnam batbit na Lydia.’ ”

¹⁰ Kane ka long ka sngi jong U Trai Nongsynshar Badonbor Baroh: ha kane ka sngi un pynhiarkput; ha kane ka sngi un pynshitom ïa ki nongshun jong u. Ka waitlam jong u kan bam ïa ki haduh ban da kdang, bad dih ïa ka snam jong ki haduh ban da sngewhun. Ha kane ka sngi u Badonbor Baroh u kñia ïa kiba la shah pynmong ha ka phang bashatei, hajan ka Ïuphratis.

¹¹ Ko ki briew jong ka Ijipt, khie leit sha Gilead bad wad ïa ka dawai! Ki dawai jong pha baroh ki la pynshisha ba kim myntoi ei ei; ym don ei ei ba lah ban pynkhiah ïa pha.

¹² Ki jaitbynriew ki la ïohsngew shaphang ka jingshah lehrain jong pha; baroh ki la ïohsngew ïa ka jingïam jong pha. Uwei u shipai u ban halor uwei pat, bad baroh ar ngut ki kyllon ha madan.

Ka jingwan u Nebukhadnessar

¹³ Mynba u Nebukhadnessar, u syiem ka Babilonia u la wan ban tur ïaleh ïa ka Ijipt, U Trai U la kren ha nga. U ong,

¹⁴ “Pynbna ïa ka ha ki shnong jong ka Ijipt, ha Migdol, Memphis, bad Tahpanhes: ‘To pynkhreh ban ïada ïa lade; ïa kiei kiei kiba phi don yn pynjot ha ka thma!

¹⁵ Balei ba u Apis u blei bakhrawbor jong phi u kyllon? U Trai u la shoh pynkyllon ïa u!’

¹⁶ Ki shipai jong phi ki jynthut bad ki kyllon; uwei u ong ïa uwei pat, ‘Pynkloi! Ïa ngin ïaleit sha ïing sha ki briew jong ngi bad ban ïohlait im na ka waitlam u nongshun!’

¹⁷ “To ai da ka kyrteng bathymmai ïa u syiem ka Ijipt — ‘U riew kob-pia uba la duh ei ïa la ka kabu’.

¹⁸ Ma nga, U Trai Badonbor Baroh, nga long u syiem. Nga long U Blei Uba im. Kumba u lum Tabor u ïeng kynjang tam ïa ki lum bad u lum Karmel u ïeng hajrong tam ïa ka duriaw, kumta kan long ka jingkhlaiñ jong uta uba tur ïaleh ïa me.

¹⁹ To pynkhreh ban shah kem koidi, phi ki briew ka Ijipt! Ïa ka Memphis yn sa pynlong ka ri shyiap, ka jingjot ha kaba yn ym don ban shong ban sah.

²⁰ Ka Ijipt ka long kum ka masi baphylla, ba la tur ïaleh da u skain ba kynthah na shatei.

²¹ Wat ki shipai ba shu wai jong ka ki long khlem bor kum ki khun masi. Kim shym ïeng ban ïaleh; baroh na ki, ki phai bad phet noh. Ka sngi jong ka jingshahjop ka la poi, ka por jong ka jingpynjot ïa ki.

²² Ka Ijipt ka phet krad, ka pyrsad kum u bseiñ, katba ka kynhun shipai u nongshun ka wan tur. Ki tur ïaleh ïa ka da ki sdie, kum ki rangbah kiba pom ïa ki dieng bad kiba pynjot ïa ka khlaw barben.

²³ Ki rangbah jong ki, ki bun shaba palat ban ñiew; ki shipai jong ki, ki kham bun ban ïa ki puit.

²⁴ Ïa ki briew ka Ijipt la pynlehrain; la jop ïa ki da ki briew ba na shatei. Ma nga, U Trai, nga la kren.”

²⁵ U Trai Badonbor Baroh, U Blei ki Israel, u ong, “Ngan pynshitom ïa u Amon, u blei jong ki Thebes, ryngkat lang bad ka Ijipt bad ki blei bad ki syiem jong ka. Ngan shim noh ïa u syiem ka Ijipt bad ïa baroh kiba buh ïa ka jingshaniah ha u,

²⁶ bad ngan aiti ha kito kiba kwah ban pynïap ïa ki, ha u Nebukhadnessar, u syiem ka Babilonia bad ka kynhun shipai jong u. Hynrei shen hadien, ki briew kin shong kin sah biang ha Ijipt, kumba ki la leh ha ki por ba la leit. Ma nga, U Trai, nga la kren.”

U Trai un pynim ïa la ki briew

²⁷ “Ko ki briew jong nga, wat ym sheptieng, ko ki paid Israel, wat ym kyiuh. Ngan pyllait im ïa phi na kata ka ri kaba jngai, na ka ri ha kaba phi la long ki koidi. Phin wan phai pat sha ïing bad im ha ka jingsuk; phin sngewshngain, bad yn ym don u ban pyntieng ïa phi.

²⁸ Ngan wan ha phi bad pyllait im ïa phi. Ngan pynjot ïa ki hima baroh sha kiba nga la pynsakma ïa phi, hynrei ngan ym pynjot ïa phi. Ngan nym shah ba phin lait khlem shah pynshitom; hynrei haba nga pynshitom ïa phi, ngan lehhok. Ma nga, U Trai, nga la kren.”