JEREMAÏAH 44 - Khasi CL Bible (BSI)

Ka khubor jong U Trai sha ki Israel kiba don ha Ijipt

¹ U Trai u la kren ha nga shaphang ki Israel baroh kiba shong ha Ijipt, ha ki nongbah Migdol, Tahpanhes, bad Memphis, bad ki bynta bashathie jong ka ri.

^2-3 U Trai Badonbor Baroh, U Blei ki Israel, u ong, “Phi hi da lade phi la ïohi ïa ka jingpynjot kaba nga la wanrah ha Jerusalem bad ha baroh kiwei ki nongbah ka Judah. Wat mynta ki dang sah ha ki jingjot, bad ym don ba sah ha ki namar ki briew jong ki, ki la leh ïa kaba sniew bad ki la pynlong ïa nga ban bitar. Ki ai jingkñia ha kiwei pat ki blei bad shakri ïa ki blei kiba ma ki ne ma phi ne ki kpa tymmen jong phi kim ju mane.

⁴ Nga ïai phah sha phi ïa ki shakri jong nga kiba long ki nongïathuhlypa, kiba la ong ïa phi ban ym leh ïa kane kaei kaei kaba shyrkhei kaba nga isih.

⁵ Hynrei phim shahshkor satia lane pynleit jingmut. Phim iehnoh noh ïa ki jingmlien basniew ban kñia ha kiwei ki blei.

⁶ Te nga pynmih noh ïa ka jingbitar jong nga bad ka jingbitar shla ha ki shnong jong ka Judah bad ha ki surok bah ka Jerusalem, bad nga thang ïa ki da ka ding. La iehnoh ïa ki ha ki jingjot bad ki la long ka jingïohi ba-itriem, kumba ki long mynta ka sngi.

⁷ “Bad kumta ma nga, U Trai Badonbor Baroh, U Blei ki Israel, mynta nga kylli ba balei phi leh kum kata ka kam kaba sniew ïa lade. Hato phi kwah ban wallam ïa ka jingpynjot ha ki rangbah bad ki kynthei, ki khynnah bad ki khunlung, khnang ba yn ym don na ki briew jong phi ban dang sah?

⁸ Balei ba phi pynbitar ïa nga da kaba mane ïa ki bleithaw bad da kaba kñia ha kiwei ki blei hangne ha Ijipt, ha kaba phi la wan ban shong ban sah? Hato phi leh ïa kane ban pynjot ïa lade, khnang ba ki jaitbynriew baroh ha ka pyrthei kin ñiewbeiñ ïa phi bad pyndonkam ïa ka kyrteng jong phi kum ka jingtim?

⁹ Hato phi la klet ïa ki kam bymman baroh ïa kiba la leh ha ki shnong jong ka Judah bad ha ki surok bah ka Jerusalem da ki kpa tymmen jong phi, da ki syiem ka Judah bad ki tnga jong ki, bad da ma phi bad ki tnga jong phi?

¹⁰ Hynrei haduh kane ka sngi phim shym la pynrit ïa lade. Phim shym la pyndonburom ïa nga lane im kat kum ki aiñ baroh kiba nga la ai ha phi bad ki kpa tymmen jong phi.

¹¹ “Te nangta, ma nga, U Trai Badonbor Baroh, U Blei ki Israel, ngan phai pyrshah ïa phi bad ngan pynjot ïa ka Judah baroh.

¹² Bad ïa ki briew ka Judah kiba sah bad kiba la kut jingmut ban leit bad shong ha Ijipt, ngan khmih ïa kane ba baroh na ki kin jot noh. Baroh na ki, kiba rit bad ki bakhraw, kin ïap ha Ijipt, na ka thma ne na ka jingïapthngan. Kin long ka jingïohi ba-itriem; ki briew kin ñiewbeiñ ïa ki bad pyndonkam ïa ka kyrteng jong ki kum ka jingtim.

¹³ Ngan pynshitom ïa kito kiba shong ha Ijipt, kumba nga pynshitom ïa ka Jerusalem — da ka thma, ka jingïapthngan bad ka jingpang.

¹⁴ Yn ym don na ki briew jong ka Judah kiba la iehnoh shadien bad kiba la wan sha Ijipt ban shong ban sah kin lait phet ne lait ïap. Yn ym don uwei ruh na ki u ban leit phai sha Judah, sha kaba ki sliang ban shong ban sah sa shisien pat. Yn ym don ba ïoh wan phai lait noh katto katne ki nongphetwir.”

¹⁵ Nangta ki rangbah baroh kiba tip ba ki tnga jong ki, ki ai jingkñia ha kiwei pat ki blei, bad ki kynthei baroh kiba ïeng hangta, kaba kynthup ïa ki Israel kiba shong ha ki bynta bashathie ka Ijipt — u paidbah babun baroh — ki ong ha nga,

¹⁶ “Ngi kyntait ban shahshkor ïa kaei kaba phi la ïathuh ha ka kyrteng jong U Trai.

¹⁷ Ngin leh ïa kiei kiei baroh ïa kiba ngi la ong ban leh. Ngin ai ïa ki jingkñia sha ka blei jong ngi, ka Syiem jong ka Bneng, bad ngin theh ïa ki jingainguh waiñ sha ka, kumba ma ngi bad ki kpa tymmen jong ngi, u syiem jong ngi bad ki nongïalam jong ngi, ki la ju leh ha ki shnong ka Judah bad ha ki surok bah ka Jerusalem. Nangta ngi don ka bam kyrhai, ngi manbha, bad ngim ju don jingjynjar.

¹⁸ Hynrei naduh ba ngi sangeh ban ai jingkñia ha ka Syiem jong ka Bneng bad ngi sangeh ban theh ïa ki jingainguh waiñ ha ka, ngim shym don ei ei shuh, bad ki briew jong ngi ki ïap ha ka thma bad na ka jingïapthngan.”

¹⁹ Bad ki kynthei ki ong shuh shuh, “Haba ngi shet ïa ki kpu ha ka dur kum ka Syiem jong ka Bneng, ngi ai ïa ki jingkñia sha ka, bad theh ïa ki jingainguh waiñ ha ka, ki tnga jong ngi ki mynjur ïa kaei kaba ngi leh.”

²⁰ Nangta nga ong ha ki rangbah bad ki kynthei baroh kiba la jubab ïa nga ha kane ka rukom,

²¹ “Na ka bynta ki jingkñia kiba ma phi bad ki kpa tymmen jong phi, ki syiem jong phi bad ki nongïalam jong phi, bad ki briew jong ka ri ki ai ha ki shnong ka Judah bad ha ki surok bah ka Jerusalem — hato phi pyrkhat ba U Trai um tip shaphang jong ki lane ba u la klet ïa ki?

²² Ha kane hi ka sngi ka ri jong phi kan sah ha ki jingjot bad ym don mano mano ban shong ban sah ha ka. Ka la long ka jingïohi ba-itriem, bad ki briew ki pyndonkam ïa ka kyrteng jong ka kum ka jingtim, namar U Trai um lah shah shuh ïa ki kam bymman bad basniew jong phi.

²³ Kane ka jingjot mynta ka la wan ha phi namar ba phi ai jingkñia sha kiwei ki blei bad leh pop pyrshah ïa U Trai da ka jingbymkohnguh ïa ki hukum jong u baroh.”

^24-25 Nga la ong ïa ki briew baroh, khamtam ïa ki kynthei, ïa kaei kaba U Trai Badonbor Baroh, U Blei ki Israel, u la ong ha ki paid Judah kiba sah ha Ijipt: “Ma phi bad ki tnga jong phi, phi la pynlong ki jingkular bakyntang ha ka Syiem jong ka Bneng. Phi la kular ba phin ai ki jingkñia ha ka bad ban theh ka jingainguh waiñ ha ka, bad phi la bat ïa la ki jingkular. Ka long kaba bha keiñ! To bat ïa la ki jingkular! Pyndep ïa la ki jingsmai!

²⁶ Hynrei mynta to shahshkor ïa ka jingsmai kaba ma nga U Trai, nga la pynlong ha ka kyrteng bakhrawbor jong nga sha phi ki Israel baroh kiba don ha Ijipt: ngan ym shah shuh ïano ïano na phi ban pyndonkam ïa ka kyrteng jong nga ban pynlong jingsmai da kaba ong, ‘Nga smai da U Trai Nongsynshar uba im!’

²⁷ Ngan khmih ïa kane ba phin ym manbha, hynrei phin shah pynjot. Baroh na phi phin ïap, ha ka thma ne na ka jingpang, haduh ba yn ym don uwei ruh na phi u ban sah.

²⁸ Hynrei khyndiat na phi phin lait na ka jingïap bad leit phai na Ijipt sha Judah. Nangta kiba lait im kin tip ki ktien jongno ki la wan jia shisha, ki jong nga ne ki jong ki.

²⁹ Ma nga, U Trai, ngan ai ha phi ïa ka jingpynshisha ba ngan pynshitom ïa phi ha kane ka jaka bad ba ka jingkular jong nga ban wallam ïa ka jingpynjot ha phi kan urlong shisha.

³⁰ Ngan aiti noh ïa u Hophra u syiem ka Ijipt ha ki nongshun jong u kiba kwah ban pynïap ïa u, kumba nga la aiti ïa u Sedekaïah u syiem ka Judah ha u Nebukhadnessar u syiem ka Babilonia, uba la long u nongshun jong u bad uba kwah ban pynïap ïa u.”