JEREMAÏAH 43 - Khasi CL Bible (BSI)

Ïa u Jeremaïah la ïalam sha Ijipt

¹ Nga la dep ïathuh ïa ki paidbah baroh kiei kiei kiba U Trai U Blei jong ki u la phah ïa nga ban ong ha ki.

² Nangta u Asaraïah u khun jong u Hoshaïah bad u Johanan u khun jong u Kareah bad baroh kiwei ki rangbah ba leh meng ki la ong ïa nga, “Phi shukor. U Trai U Blei jong ngi um shym la phah ïa phi ban ong ha ngi ba ngin ym leit bad shong ha Ijipt.

³ U Barukh u khun jong u Neraïah u la pynkhih ïa phi pyrshah ïa ngi, kumta ki nong Babilonia kin ïa-ïohbor halor jong ngi bad ki lah ban pynïap ïa ngi ne ïalam noh ïa ngi sha Babilonia.”

⁴ Kumta ym u Johanan lymne uno uno na ki rangbah shipai lymne kino kino na ki paidbah kin kohnguh ïa ka hukum U Trai ban ïaisah ha ka ri Judah.

^5-6 Nangta u Johanan bad ki rangbah shipai baroh ki la shim noh ïa baroh kiba dang sah ha Judah sha Ijipt, lem bad ki briew baroh kiba la wan phai na ki jaitbynriew sha kiba ki la sakma kylleng: ki rangbah, ki kynthei, ki khynnah, bad ki khun kynthei jong u syiem. Ki la ïalam ïa baroh kiba u Nebusaradan u rangbah ai hukum u la ieh hapoh ka jingpeit u Gedalaïah, ba kynthup ïa u Barukh bad ïa nga.

⁷ Kim shym kohnguh ïa ka hukum U Trai bad ki la leit sha Ijipt jngai shaduh ka nongbah Tahpanhes.

^8-9 Hangta U Trai u la ong ha nga, “To pynïoh ïa ki mawbah bad tep ïa ki ha ka sorki jong ka jingsiang ha khmat ka khyrdop sha ka ïing sorkar kaba don ha ka nongbah, bad to ai ba katto katne ngut ki Israel kin ïohi ïa me ba me leh ïa kata.

¹⁰ Nangta sa ïathuh ïa ki ba ma nga, U Trai Badonbor Baroh, U Blei ki Israel, ngan wallam ïa u shakri jong nga u Nebukhadnessar u syiem ka Babilonia sha kane ka jaka, bad un buh ïa ka khet jong u halor kine ki maw kiba me la tep, bad un pyiar ïa ka ïingjaiñ syiem halor jong ki.

¹¹ U Nebukhadnessar un wan bad jop ïa ka Ijipt. Kito ki briew kiba la dei ban ïap na ka jingpang kin ïap ha ka jingpang, kito kiba dei ba yn ïalam kum ki koidi yn ïalam ïa ki kum ki koidi, bad kito kiba la dei ban sha pynïap ha ka thma kin ïap ha ka thma.

¹² Ngan tbeh ïa ka ding ha ki templ jong ki blei ki Ijipt, bad u syiem ka Babilonia un thang ïa ki bleithaw jong ki ne ïalam noh ïa ki. Katba ki nongap langbrot ki dang jied ïa ki jaiñ jong ki kiba lait na ki jynreiñ, te u syiem ka Babilonia un jied pynkhuid ïa ka ri Ijipt bad nangta ki mih da ka jingjop.

¹³ Un pynjot ïa ki maw jingteinam bakyntang ha Heliopolis kaba ha Ijipt bad un thang ïa ki templ jong ki blei ki nong Ijipt.”