JEREMAÏAH 42 - Khasi CL Bible (BSI)

Ki paidbah ki kyrpad ïa u Jeremaïah ban duwai na ka bynta jong ki

^1-2 Te baroh ki nongïalam ka kynhun shipai, kiba kynthup ïa u Johanan u khun jong u Kareah bad u Asaraïah u khun jong u Heshaïah, ki la wan ryngkat bad ki paidbah kiba ha ki kyrdan baroh bad ki la ong ïa nga, “Sngewbha leh ïa kaei kaba ngi ong ïa phi! To duwai ha U Trai U Blei jong ngi na ka bynta jong ngi. To duwai na ka bynta jong ngi baroh kiba la lait im. Shisien la don bun bah na ngi; hynrei mynta tang khyndiat eh ngi dang sah, kumba phi ïohi.

³ To duwai ba U Trai U Blei jong ngi un pyn-i ha ngi ïa ka lynti kaba ngi dei ban leit bad kaei kaba ngi dei ban leh.”

⁴ Nga la jubab, “To kata. Ngan duwai ha U Trai U Blei jong phi, kumba phi la kyrpad, bad kaei kaei kaba u ong, ngan sa ïathuh ïa phi. Ngan ym buhrieh ei ei na phi.”

⁵ Nangta ki la ong ïa nga, “To ai ba U Trai un long u sakhi bashisha bad bahok pyrshah ïa ngi lada ngim kohnguh ïa ki hukum baroh kiba U Trai U Blei jong ngi u ai ha phi na ka bynta jong ngi.

⁶ La ka long kaba pynsngewbha ïa ngi ne kam long kumta, ngin kohnguh ïa U Trai U Blei jong ngi, ha uba ngi kyrpad ïa phi ban duwai. Baroh kan bha ïa ngi lada ngi kohnguh ïa u.”

Ka jingjubab U Trai ïa ka jingduwai u Jeremaïah

^7-8 Shiphew sngi hadien, U Trai u la kren ha nga; kumta nga la khot lang ïa u Johanan, ki nongïalam ka kynhun shipai baroh kiba don lem bad u, bad ïa kiwei ki paidbah baroh.

⁹ Nga ong ha ki, “U Trai, U Blei ki Israel, sha uba phi phah ïa nga ryngkat bad ki jingkyrpad jong phi, u ong,

¹⁰ ‘Lada phi mon ban ïaisah ha kane ka ri, te ngan kyntiew ïa phi bad ym ban pynjot ïa phi; ngan pynskhem ïa phi bad ym ban rat ïa phi. Ka jingpynjot kaba nga la wanrah ha phi ka la pynlong ka jingsngewsih bakhraw ïa nga.

¹¹ Keiñ noh na kaba sheptieng ïa u syiem jong ka Babilonia. Nga long ryngkat bad phi, bad ngan pyllait ïa phi na ka bor jong u.

¹² Namar ba nga long uba dap da jingisynei, ngan pynlong ïa u ban isynei ïa phi bad un shah ba phin leit phai pat sha ïing. Ma nga, U Trai, nga la kren.’

^13-15 “Hynrei ma phi ki paidbah kiba dang sah ha Judah phim dei ban ym kohnguh ïa U Trai U Blei jong phi bad kyntait ban shong ha kane ka ri. Phim dei ban ong, ‘Em, ngin leit ban shong ha Ijipt, ha kaba ngin ym ïakynduh shuh ïa ka thma lane ban ïohsngew ïa ka jingkhot ban leit thma ne shahthngan.’ Lada phi ong ïa kane, te U Trai U Blei Badonbor Baroh, U Blei ki Israel, u ong,

¹⁶ ‘Lada phi kut jingmut ban leit bad sah ha Ijipt, te ka thma ïa kaba phi sheptieng kan jop ïa phi, bad ka jingshahthngan kaba phi khaw-eit kan bud ïa phi, bad phin ïap hangta ha Ijipt.

¹⁷ Ki briew baroh kiba kut jingmut ban leit bad sah ha Ijipt kin ïap na ka thma ne na ka jingïapthngan ne na ka jingpang. Yn ym don uwei ruh na ki u ban lait im, yn ym don ban lait phet na ka jingjot ïa kaba ngan wallam ha ki.’

¹⁸ “U Trai, U Blei ki Israel, u ong, ‘Kumba ka jingbitar bad jingbitar shla jong nga ka mihnoh na nga ha ki briew jong ka Jerusalem, kumta ruh ka jingbitar shla jong nga kan mihnoh ha phi lada phi leit sha Ijipt. Phin long ka jingïohi ba-itriem; ki briew kin ñiewbeiñ ïa phi bad kin pyndonkam ïa ka kyrteng jong phi kum ka jingtim. Phin ym ïohi shuh ïa kane ka ri.’ ”

^19-20 Nangta nga la bteng, “U Trai u la ïathuh ha phi ki briew kiba dang sah ha Judah ban ym leit sha Ijipt. Bad kumta nga mana ïa phi mynta ba phi leh ïa ka jingbakla bashyrkhei. Phi kyrpad ïa nga ban duwai ha U Trai U Blei jong phi na ka bynta jong phi, bad phi la kular ban leh ïa kiei kiei baroh kiba u hukum.

²¹ Bad mynta nga la ong ha phi, hynrei phi leh bymkohnguh ïa kiei kiei baroh kiba U Trai U Blei jong phi u la phah ïa nga ban ïathuh ïa phi.

²² Te nangta, to kynmaw ïa kane: phin ïap ha ka thma ne na ka jingïapthngan ne ka jingpang ha ka ri sha kaba phi kwah ban leit bad ban shong.”