JEREMAÏAH 41 - Khasi CL Bible (BSI)

¹ Ha u bnai uba hynñiew jong kata ka snem, u Ishmael, u khun jong u Nethanaïah bad u ksiew jong u Elishama, u dkhot ka longïing syiem bad uwei na ki rangbah pynïaidkam kiba hakhlieh duh jong u syiem, u la leit sha Mispah lem bad shiphew ngut ki rangbah ban peit ïa u Gedalaïah.

² Katba ki dang ïabam jingbam lang, u Ishmael bad ki shiphew ngut ki rangbah lem bad u ki la sei ïa la ki waitlam bad ki la pynïap ïa u Gedalaïah.

³ U Ishmael ruh u la pynïap ïa ki Israel baroh kiba don ryngkat bad u Gedalaïah ha Mispah bad ki shipai Babilon kiba jia ryngkhat ki don hangta.

^4-5 Ha ka sngi kaba bud, shuwa ba uno uno un tip shaphang ka jingshah pynïap u Gedalaïah, phraphew ngut ki rangbah ki la poi ha Shekhem, Shiloh bad Samaria. Ki la khi ïa la ki 'ñiuhtmoh, kad ïa la ki jaiñ, bad ki pynmong ïa lade. Ki dang ïashim kew bad jingiwbih ban ai ha ka Templ.

⁶ Te u Ishmael u la leit noh na Mispah ban ïakynduh ïa ki, u da ïam katba u dang leit. Haba u la wan ha ki, u la ong, “Sngewbha wan shapoh ban khmih ïa u Gedalaïah.”

⁷ Ki tang shu mar ïapoi hapoh ka nongbah, u Ishmael bad ki rangbah jong u ki la pynïap ïa ki bad ki la bret ïa ki metïap jong ki ha ka pukri.

⁸ Hynrei la don shiphew ngut ki rangbah ha ka kynhun kiba la ong ha u Ishmael, “Sngewbha wat pynïap ïa ngi! Ngi don u kew, u barli, ka umphniang Olib, bad ka ngap ba la buhrieh ha ki lyngkha.” Kumta u la pyllait ïa ki.

⁹ Ka pukri ha kaba u Ishmael u la bret ïa ki metïap jong kita ki rangbah kiba u la pynïap ka long kaba heh bha kaba u syiem Asa u la tih mynba u la shah tur ïaleh ha u Baasha, u syiem ka Israel. U Ishmael u la pyndap ïa kata ka pukri da ki metïap.

¹⁰ Nangta u la pynlong koidi ïa ki khun kynthei u syiem bad ïa ki briew baroh ha Mispah kiba dang sah ïa kiba u Nebusaradan u rangbah shipai u la iehnoh ha ka jingpeit u Gedalaïah. U Ishmael u la shim ïa ki kum ki koidi bad u la leit ha ka phang jong ka ri ki Ammon.

¹¹ U Johanan bad baroh ki nongïalam ka kynhun shipai kiba don bad u ki la ïohsngew ïa ka kam runar kaba u Ishmael u la leh.

¹² Kumta ki la leit nadien jong u ryngkat bad ki briew jong ki bad lap ïa u hajan ka pung kaba heh ha Gibeon.

^13-14 Haba ki koidi jong u Ishmael ki la ïohi ïa u Johanan bad ïa ki nongïalam jong ki shipai lem bad u, ki la kmen, bad phai bad mareh sha ki.

¹⁵ Hynrei u Ishmael bad phra ngut na ki briew jong u ki la kynriah na u Johanan bad phet sha ka ri ki Ammon.

¹⁶ Nangta u Johanan lem bad ki nongïalam jong ki shipai u la shimti ïa ki briew kiba u Ishmael u la ïalam noh kum ki koidi na Mispah hadien ba u la pynïap ïa u Gedalaïah — ki shipai, ki kynthei, ki khynnah, bad ki ïunukh.

^17-18 Ki la sheptieng ïa ki nong Babilonia namar ba u Ishmael u la pynïap ïa u Gedalaïah, uba u syiem ka Babilon u la pynlong u lat jong kata ka jaka. Kumta ki la leit noh sha Ijipt, khnang ba kin lait na ki nong Babilonia. Ha lynti, ki la sangeh ha Shimham, kaba hajan Bethlehem.