JEREMAÏAH 40 - Khasi CL Bible (BSI)

U Jeremaïah u sah bad u Gedalaïah

¹ U Trai u la kren ha nga hadien ba u Nebusaradan, u rangbah shipai, u la lah pyllait ïa nga ha Ramah. Ïa nga la leit ïalam shata ha ki kynjri, ryngkat bad baroh kiwei pat ki briew na Jerusalem bad Judah ïa kiba la leit ïalam kum ki koidi sha Babilonia.

² U rangbah shipai u la khot ïa nga sharud bad u la ong,

³ “U Trai U Blei jong phi u la byrngem ïa kane ka ri da ka jingjot, bad mynta u la leh ïa kaei kaba u la ong ba un leh. Baroh kane ka la jia namar ki briew jong phi ki la leh pop pyrshah ïa U Trai bad kim shym la kohnguh ïa u.

⁴ Mynta, ngan law noh ïa ki kynjri na ki ryndang-kti jong phi bad pyllait noh ïa phi. Lada phi kwah ban leit sha Babilonia ryngkat bad nga, phi lah ban leh kumta, bad ngan sumar ïa phi. Hynrei lada phim kwah ban leit, phi lah ban ym leit. Phi don ïa ka ri baroh kawei ban jied, phi lah ban leit shano shano ba phi kwah.”

⁵ Haba ngam shym la jubab, u Nebusaradan u la ong, “Khie leit phai pat sha u Gedalaïah, u khun jong u Ahikam bad u ksiew jong u Shaphan, ïa uba u syiem ka Babilonia u la pynlong ïa u, u lat jong ki shnong ka Judah. Phi lah ban sah bad u bad im hapdeng ki briew, lane phi lah ban leit shano shano ba phi pyrkhat ba phi dei ban leit.” Kumta u la ai ïa nga ka jingai sngewbha bad katto katne ka jingbam ban rah bad nga, bad u la shah ïa nga ba ngan leit noh ha la ka lynti.

⁶ Nga la leit ban sah bad u Gedalaïah ha Mispah bad shong hapdeng ki briew ïa kiba la iehnoh ha ka ri.

U Gedalaïah, u lat ka Judah

⁷ Katto katne na ki rangbah nongpynïaidkam ka Judah bad ki shipai kim shym la pyndem. Ki la ïohsngew ba u syiem ka Babilonia u la lah pynlong ïa u Gedalaïah u lat ka ri bad ba la buh ïa u ban khmih ïa kito baroh ki bym shym la ïalam noh sha Babilonia — ki briew kiba duk tam ha ka ri.

⁸ Kumta u Ishmael u khun jong u Nethanaïah, u Johanan u khun jong u Kareah, u Seraïah u khun jong u Tanhumeth, ki khun shynrang jong u Ephai na Netophah, bad u Jesanaïah na Maakah ki la leit bad la ki rangbah sha u Gedalaïah ha Mispah.

⁹ U Gedalaïah u la ong ïa ki, “Nga ai ïa phi ïa la ka ktien ba kam donkam ïa phi ban sheptieng ban pyndem ha ki nong Babilonia, to shongduh ha kane ka ri, to shakri ïa u syiem ka Babilonia, bad baroh kan bha ïa phi.

¹⁰ Ma nga hi ngan sah ha Mispah bad ngan long u nongmihkhmat jong phi haba ki nong Babilonia kin wan shane. Hynrei phi lah ban lum bad kynshew ïa ka waiñ, ki soh, bad ka umphniang Olib, bad ban shong ban sah ha la ki shnongrit ba phi don.”

¹¹ Ha kata ka por, baroh ki paid Israel kiba don ha Moab, Ammon, Edom bad ha kiwei ki ri, ki la ïohsngew ba u syiem ka Babilonia u la shah katto katne ki nong Israel ban ïaisah ha Judah bad ba u la pynlong ïa u Gedalaïah u lat jong ki.

¹² Kumta ki la mihnoh na ki jaka ba la pynsakma ïa ki bad ki la wan phai pat sha Judah. Ki la wan sha u Gedalaïah ha Mispah, bad hangta ki la ïalum shibun bah ka waiñ bad ki soh.

La pynïap ïa u Gedalaïah

¹³ Hadien kane, u Johanan bad ki nongïalam jong ki shipai ki bym shym la pyndem ki la wan ha u Gedalaïah ha Mispah bad ki la ong ha u,

¹⁴ “Hato phim tip ba u syiem Baalis jong ki Ammon u la phah ïa u Ishmael ban pynïap ïa phi?” Hynrei u Gedalaïah um shym ngeit ïa kata.

¹⁵ Te u Johanan u la ong ha kaba rieh ha u, “Ai ba ngan leit ban pynïap ïa u Ishmael, bad yn ym don batip mano ba la leh ïa kata. Balei ba yn shah ïa u ban pynïap ïa phi? Kata kan pynlong ïa ki Jiw baroh kiba ïalum sawdong jong phi ban shah pynsakma, bad kan wallam ïa ka jingjot ha baroh ki briew ïa kiba la pynsah ha Judah.”

¹⁶ Hynrei u Gedalaïah u la jubab, “Wat leh ïa kata! Kaei kaba phi ong shaphang u Ishmael kam long kaba shisha!”