JEREMAÏAH 4 - Khasi CL Bible (BSI)

Ka jingkhot ban kylla-kaba-mut

¹ U Trai u ong, “Ko paid Israel, lada phi kwah ban wan phai, to wan phai noh sha nga. Lada phi shaniah ha nga bad weng noh ïa ki bleithaw kiba nga ijli,

² kan long kaba dei ïa phi ban smai da ka kyrteng jong nga. Nangta baroh ki jaitbynriew kin kyrpad ïa nga ban kyrkhu ïa ki, bad kin ïaroh ïa nga.”

³ U Trai u ong ha ki briew jong ka Judah bad Jerusalem, “To lur ïa ki lyngkha jong phi ki bym pat ju lur; wat bet ïa ki symbai jong phi hapdeng ki shiah.

⁴ Sumar ïa ka jutang jong phi bad nga, U Trai jong phi, bad pynkyntang ïa lade ha nga, phi ki briew jong ka Judah bad Jerusalem. Lymda kumta, ka jingbitar jong nga kan ing kum ka ding namar kiei kiei kiba sniew kiba phi la leh. Kan pluh, bad yn ym don mano mano ba pynlip ïa ka.”

La byrngem hiarthma ïa ka Judah

⁵ To put ïa ka turoi ha kylleng ka ri! To pyrta jam bad shai kdar! Ïathuh ha ki briew jong ka Judah bad Jerusalem ban phet sha ki nongbah ba la ker kynroh.

⁶ To kdew ïa ka lynti sha Seïon! To phet ban lait im! Wat ym pynslem! U Trai u wallam ka jingjot bad ka jingpynjot kaba khraw na shatei.

⁷ Kum u sing uba wan mih na ka jakarieh jong u, u nongpynjot jong ki jaitbynriew u la mihnoh. U wan ban pynjot ïa ka Judah. Ïa ki nongbah jong ka Judah yn ieh ha ki jingjot, bad yn ym don mano mano bashong ba sah ha ki.

⁸ Kumta to kup ka jaiñ khain, bad to ïam bad ud sngewsih namar ka jingbitar shla jong U Trai kam shym la phai noh na ka Judah.

⁹ U Trai u ong, “Ha kata ka sngi ki syiem bad ki rangbah synshar kin duh ka jingshlur jong ki; ki lyngdoh kin kyndit bad ki nongïathuhlypa kin lyngngoh.”

¹⁰ Nangta nga la ong, “Ko Trai Nongsynshar, me la shukor la biang ïa ki briew jong ka Jerusalem! Me la ong ba kan don ka jingsuk, hynrei ka waitlam ka ha ki pdot jong ki.”

¹¹ Ka por ka wan ha kaba ïa ki briew jong ka Jerusalem yn ïathuh ba ka lyer khluit ka beh shapoh sha ki na ka ri shyiap. Kan ym long ka lyer kaba jai jai kaba shu beh pynher noh ïa u stait —

¹² ka lyer kaba wan ha ka hukum jong U Trai kan long kaba kham khlaiñ ban ïa kata! U dei U Trai hi uba pynbna ïa ka jingbishar halor ki briew jong u.

La kerkut ïa ka Judah da ki nongshun

¹³ Ha khmih, u nongshun u wan kum ki lyoh. Ki kali ïapom jong u ki long kum ka 'erlangthari, bad ki kulai jong u ki kham stet ban ïa ki pukni. Ngi la shahjop! Ngim lah khie khlieh shuh!

¹⁴ A Jerusalem, to sait noh ïa ka jingsniew na ka dohnud jong pha, khnang ba pha lah ban ïohlait im. Sa katno phan dang ïai pyrkhat ïa ki jingpyrkhat bashlei da ka pop?

¹⁵ Ki nonglamktien na ka nongbah Dan bad na ki lum Ephraim ki pynbna ïa ka khubor basniew.

¹⁶ Ki la wan ban maham ïa ki jaitbynriew bad ban ïathuh ïa ka Jerusalem ba ki nongshun ki wan na ka ri kaba jngai bah. Kine ki nongshun kin pyrta pyrshah ïa ki nongbah jong ka Judah

¹⁷ bad yn kerkut ïa ka Jerusalem kumba ki rangbah ki ap phira ïa ka lyngkha, namar ki briew jong ka ki la ïeng ïaleh pyrshah ïa U Trai. U Trai u la kren.

¹⁸ Ko Judah, pha la wallam ïa kane halor lade da ka rukom kaba pha la im bad da kiei kiei kiba pha la leh. Ka pop jong pha ka la pynjia ïa kane ka jingjynjar; ka la dung ïa pha lyngba ka dohnud.

Ka jingsngewsih jong U Jeremaïah na ka bynta ki briew jong u

¹⁹ Ka jingpang! Ngam lah shah ïa ka jingpang! Ka dohnud jong nga! Ka dohnud jong nga ka kyndeh jur! Ngam lah ban sngap jar; nga ïohsngew ïa ki turoi bad ki jingpyrta jong ka thma.

²⁰ Kawei ka jingjot ka bud hadien kawei pat, ïa ka ri baroh kawei la iehnoh ha ka jingjot. Kynsan kynsan la pynjot ïa ki ïingjaiñ jong ngi, ïa ki pyrda jong ki la tar lyngkhot.

²¹ Sa katno nga dei ban ïohi ïa ka thma kaba nang jur bad ïohsngew ïa ki jingsawa jong ki turoi?

²² U Trai u ong, “Ki briew jong nga ki long kiba mutlop; kim ithuh ïa nga. Ki long kiba bieit kum ki khynnah; kim don kano kano ka jingshemphang. Ki long kiba tbit ha kaba leh ïa kaba sniew, hynrei ki bym lah ban leh ïa kaba bha.”

Ka jingïohipaw jong u Jeremaïah ïa ka jingpynjot ka ban wan

²³ Nga la khmih ha ka pyrthei — ka la long ka jingsep ei suda, ha ka sahit bneng — ym don kano kano ka jingshai.

²⁴ Nga la khmih ha ki lumbah — ki la khynñiuh, bad ki lumrit ki khih shadien bad sha khmat.

²⁵ Nga la ïohi ba ym don briew; wat ki sim ki la lah her noh.

²⁶ Ka ri kaba seisoh ka kylla long ka ri shyiap, ki nongbah jong ka ki la don ha ka jingjot namar ka jingbitar shla jong U Trai.

²⁷ (U Trai u la ong ba ka pyrthei baroh kawei kan kylla long ka ri khlaw, hynrei ba un ym pynjot khoit ïa ka.)

²⁸ Ka pyrthei kan ïam sngewsih; ka sahit bneng kan sdang dum. U Trai u la kren bad un ym kylla ïa ka jingmut jong u. U la pynlong ïa ka jingrai jong u bad un ym kylla dien.

²⁹ Ha ka jingsawa jong ki shipai shong kulai bad jong ki nongsiatkhnam, uwei uwei baroh u phet krad. Katto katne kin phet sha khlaw, kiwei kin ïakiew shajrong hapdeng ki mawsiang. Ïa kawei pa kawei ka shnong yn iehnoh thylli, bad yn ym don uno uno u ban shong ban sah pat ha ki.

³⁰ Ko Jerusalem, pha long kaba la tim! Balei pha riam ha kaba saw syn-iang? Balei pha deng jingdeng bad airong ïa ki khmat jong pha? Pha pynbhabriew ïa lade ym na ka bynta kano kano! Ki nongleh-ieit jong pha ki la kyntait ïa pha bad ki kwah ban pynïap ïa pha.

³¹ Nga la ïohsngew ïa ka jingïam, kum ka kynthei kaba suh kha, ka jinglynñiar kum ka kynthei kaba kha ïa i khun nyngkong jong ka. Ka la long ka jingïam jong ka Jerusalem kaba kwah eh ban ring mynsiem, ka da kner noh ïa ka kti jong ka bad ong, “Nga long kaba la tim! Ki wan ban pynïap ïa nga!”