JEREMAÏAH 39 - Khasi CL Bible (BSI)

Ka jingkyllon ka Jerusalem

¹ Ha u bnai ba-shiphew jong ka snem bakhyndai ba u Sedekaïah u long u syiem ka Judah, u Nebukhadnessar u syiem ka Babilonia u la wan bad ka kynhun shipai jong u baroh bad u la tur ïaleh ïa ka Jerusalem.

² Ha ka sngi kaba khyndai jong u bnai basaw jong ka snem kaba khatwei ka jinglong syiem u Sedekaïah, ïa ki kynroh ka nongbah la pynpra lut.

³ (Haba la kurup ïa ka Jerusalem, baroh ki rangbah synshar baheh kyrdan jong u syiem ka Babilonia ki la wan bad ki la ïeng ha la ki jaka ha ka Khyrdop Pdeng, kaba kynthup ïa ka Nergal Sareser, ka Samgar Nebo, ka Sarsekhim, bad kawei pat ka Nergal Sareser.)

⁴ Mynba u syiem Sedekaïah bad baroh ki shipai jong u ki la ïohi ïa kaei kaba la jia, ki la pyrshang ban phet na ka nongbah ha ka por mynmiet. Ki la phet na ka lynti jong ka kper syiem, ki la ïaid lyngba ïa ka khyrdop kaba pynïasoh ïa ki ar tylli ki kynroh, bad phet na ka liang jong ka Them Jordan.

⁵ Hynrei ka kynhun shipai Babilonia ka la beh nadien jong ki bad kem ïa u Sedekaïah ha ki pyntha hajan ka Jerikho. Te ki la leit ïalam ïa u sha u syiem Nebukhadnessar, uba don ha ka nongbah Riblah ha ka ri Hamath, bad hangta u Nebukhadnessar u la ai ïa ka jingrai halor jong u.

⁶ Ha Riblah u la pynïap ïa ki khun shynrang jong u Sedekaïah katba u Sedekaïah u dang peit, bad u la pynïap ruh ïa ki rangbah synshar jong ka Judah.

⁷ Hadien kata, la pynmatlah ïa ki khmat u Sedekaïah bad la teh ïa u da ki kynjri ban rah ïa u sha Babilonia.

⁸ Ha kata ka por, ki nong Babilonia ki la thang duh ïa ka ïingsyiem bad ïa ki ïing jong ki briew bad pynpra ïa ki kynroh ka Jerusalem.

⁹ Khatduh u Nebusaradan, u rangbah shipai, u la ringmraw sha Babilonia ïa ki briew ba dang sah ha ka nongbah, ryngkat bad ïa kito kiba la iehnoh ïa u.

¹⁰ U la iehnoh ha Judah katto katne na ki briew kiba duk tam, ki bym don jaka puta, bad u la ai ïa ki, ki bri sohwaiñ bad ki lyngkha.

Ka jingpyllait ïa u Jeremaïah

¹¹ Hynrei u syiem Nebukhadnessar u la hukum ïa u Nebusaradan, u rangbah shipai, ban ai ïa kane ka hukum harum:

¹² “Khie leit wad ïa u Jeremaïah bad sumar bha ïa u. Wat pynmynsaw ïa u, hynrei leh ïa kaei kaei baroh kaba u kwah.”

¹³ Kumta u Nebusaradan, ryngkat bad ki rangbah synshar baheh kyrdan u Nebushasban bad u Nergal Sareser bad baroh kiwei ki rangbah nongpynïaidkam jong u syiem ka Babilonia ki la wallam sha nga na ka phyllaw ka ïingsyiem.

¹⁴ Ki la buh ïa nga hapoh ka jingsumar u Gedalaïah, u khun jong u Ahikam bad u ksiew jong u Shaphan, u ban peit ba nga poi suk sha ïing. Bad kumta nga la sah hangta hapdeng ki briew.

Ka jingkyrmen na ka bynta u Ebedmelekh

¹⁵ Katba ïa nga la dang set byndi ha ka phyllaw ka ïingsyiem, U Trai u la ong ïa nga

¹⁶ ban ïathuh ïa u Ebedmelekh u nong Sudan ba U Trai Badonbor Baroh, U Blei ki Israel, u la ong, “Kumba nga la ong ba ngan leh, ngan wallam ka jingjot ha kane ka nongbah bad ym ïa ka jingmanbha. Bad haba kane kan jia, men don hangta ban ïohi ïa kata.

¹⁷ Hynrei ma nga, U Trai, ngan ïada, bad ngan ym aiti noh ïa me sha ki briew kiba me sheptieng.

¹⁸ Ngan pyllait ïa me na ka jingma, bad yn ym pynïap ïa me. Men lait im namar me la buh ïa la ka jingshaniah ha nga. Ma nga, U Trai, nga la kren.”