JEREMAÏAH 38 - Khasi CL Bible (BSI)

U Jeremaïah ha ka pung-um ba-tyrkhong

¹ U Shephataïah u khun jong u Mattan, u Gedalaïah u khun jong u Pashhur, u Jehukal u khun jong u Shelemaïah, bad u Pashhur u khun jong u Malkhaïah ki la ïohsngew ba nga la ong ïa ki paidbah ba

² U Trai u la ong, “Uno uno uba shong ha ka nongbah un ïap ha ka thma lane ka jingïapthngan lane ka jingpang. Hynrei uno uno uba mihnoh bad uba pyndem ha ki nong Babilonia, yn ym pynïap; la kumno kumno un pyllait ïa la ka jingim.”

³ Nga la ong ruh ïa ki ba U Trai u la ong, “Ngan ai noh ïa ka nongbah ha ka kynhun shipai Babilonia, bad kin kurup ïa ka.”

⁴ Te ki rangbah synshar ki la leit sha u syiem bad ki ong, “Ïa une u briew dei ban pynïap. Da kaba u kren kumne, u pynlong ïa ki shipai ha ka nongbah ban duh noh ïa ka jingshlur, bad u leh kumjuh ïa uwei pa uwei baroh ba dang sah ha ka nongbah. Um shym pyrshang ban ïarap ïa ki paidbah; u kwah tang ban pynmong ïa ki.”

⁵ U syiem Sedekaïah u la jubab, “To leh te ïa kaei kaba phi kwah ban leh ïa u; ngam lah ban khang ïa phi.”

⁶ Kumta ki la shim ïa nga bad ki la pynhiar ïa nga da ki tyllai shapoh ka pung u khun syiem Malkhaïah, kaba don hapoh ka phyllaw ïingsyiem. Ym don um ha kata ka pung, tang ka ktieh, bad nga la ngam shapoh ha ka.

⁷ Kumno re kumno, u Ebedmelekh, u nong Sudan, u ïunukh uba trei ha ka ïingsyiem u la ïohsngew ba ki la thep ïa nga ha ka pung. Ha kata ka por u syiem u dang pynlong ka jingbishar ha ka Khyrdop Benjamin.

⁸ Kumta u Ebedmelekh u la leit shata bad ong ïa u syiem.

⁹ “Ko Syiem, kaei kaba kine ki briew ki la leh ka long ka bym dei. Ki la thep ïa u Jeremaïah ha ka pung, ha kaba, da shisha, un sa ïap ha ka jingïapthngan, namar ym don jingbam shuh ha ka nongbah.”

¹⁰ Kumta u syiem u la hukum ïa u Ebedmelekh ban shim bad u lai ngut ki rangbah bad ban tan noh ïa nga na ka pung shuwa ba ngan ïap.

¹¹ Kumta u Ebedmelekh u la leit bad ki rangbah sha ka kamra buh jingbam ha ka ïingsyiem bad la ïoh katto katne ki jaiñphong ba la rim kiba u la pynhiar sha nga da ki tyllai.

¹² U la ong ïa nga to buh ïa ki jaiñ rim ha ki ksang'ti jong nga, khnang ba ki tyllai kin ym pynmynsaw ïa nga.

¹³ Nga la leh ïa kane, bad ki la tan ïa nga shalor shabar ka pung. Hadien kata ïa nga la buh ha ka phyllaw ïingsyiem.

U Sedekaïah u pan jingmut na u Jeremaïah

¹⁴ Ha kawei pat ka por u syiem Sedekaïah u la phah wallam ïa nga sha u ha ka khyrdop kaba lai sha ka Templ, bad u la ong, “Ngan kylli ïa phi ka jingkylli, bad nga kwah ba phin ïathuh ïa nga ïa ka jingshisha baroh.”

¹⁵ Nga la jubab, “Lada nga ïathuh ïa phi ïa ka jingshisha, phin sa pynïap ïa nga, bad lada nga ai jingmut ïa phi, phin ym shahshkor satia.”

¹⁶ Kumta u syiem Sedekaïah u la kular ïa nga ha kaba rieh, “Nga smai da U Blei uba im, U Blei uba ai jingim ïa ngi, ba ngan ym pynïap ïa phi lane ai noh ïa phi sha ki briew kiba kwah ban pynïap ïa phi.”

¹⁷ Te nga la ong ha u Sedekaïah ba U Trai Badonbor Baroh, U Blei ki Israel, u la ong, “Lada phi pyndem ha ki rangbah pynïaidkam jong u syiem ka Babilonia, ïa ka jingim jong phi yn tyngkai, bad ïa kane ka nongbah yn ym thang noh. Ïa phi bad ïa ka longïing jong phi yn pyllait im.

¹⁸ Hynrei lada phim pyndem, te ïa kane ka nongbah yn aiti noh sha ki nong Babilonia, ki ban sa thang duh ïa ka, bad phin ym lait im na ki.”

¹⁹ Hynrei u syiem u la jubab, “Nga sheptieng ïa la ki para ri kiba la phet bad ïasoh bad ki nong Babilonia. Ka lah ban long ba ïa nga yn aiti noh sha ki bad kin pynshitom sat ïa nga.”

²⁰ Nga la ong, “Yn ym aiti noh ïa phi sha ki. Nga kyrpad ïa phi ban kohnguh ïa ka khubor U Trai; te baroh kan bha ïa phi, bad ïa ka jingim jong phi yn pynsah.

²¹ Hynrei U Trai u la pyn-i ha nga ha ka jingïohipaw ïa kaei ka ban jia lada phi kyntait ban pyndem.

²² Ha ka, nga la ïohi ba ïa baroh ki kynthei kiba dang sah ha ka ïingsyiem ha Judah ba la ïalam ïa ki shabar sha ki rangbah pynïaidkam jong u syiem ka Babilonia. Ha sngap ïa kaei kaba ki ïakren katba ki dang ïaleit: “ ‘Ki paralok bajan tam u syiem ki la ïalam bakla ïa u, ki la ïaid lait ïa u. Bad mynta ba ki kjat jong u ki la ngam ha ka ktieh, ki paralok jong u ki la iehnoh ïa u.’ ”

²³ Te nga la ong shuh shuh, “Ïa baroh ki kynthei bad ki khun jong phi, yn rah noh sha ki nong Babilonia, bad ma phi ruh ïa lade phin ym lait na ki. Yn sa ïalam ïa phi kum u koidi da u syiem ka Babilonia, bad ïa kane ka nongbah yn sa thang lut khoit.”

²⁴ U Sedekaïah u la jubab, “Wat ai ba uno uno ruh un tip ïa kane ka jingïakren, bad ka jingim jong me kan ym don ha ka jingma.

²⁵ Lada ki rangbah synshar ki ïohsngew ba nga la ïakren bad me, kin sa wan bad kylli ïa me kaei kaba ngi la ïakren. Kin sa kular ban ym pynïap ïa me lada me ïathuh ïa ki ïa baroh kiei kiei.

²⁶ Shu ong ïa ki ba me kyrpad ïa nga ban ym phah pat ïa me sha byndi ban ïap hangta.”

²⁷ Te baroh ki rangbah synshar ki la wan ban kylli ïa nga, bad nga la ong ïa ki thik kumba u syiem u la ong ïa nga ban ong ha ki. Ym don ei ei pat kaba ki lah ban leh, namar ym don mano mano ba la ïohsngew ïa ka jingïakren.

²⁸ Bad ïa nga la buh ha ka phyllaw jong ka ïingsyiem haduh ka sngi ba la kurup ïa ka Jerusalem.