JEREMAÏAH 37 - Khasi CL Bible (BSI)

Ka jingkyrpad u Sedekaïah ïa u Jeremaïah

¹ U Nebukhadnessar u syiem ka Babilonia u la pynlong syiem ïa u Sedekaïah, u khun jong u Josaïah u syiem ka Judah, ha ka jaka u Jehoïakhin u khun jong u Jehoïakim.

² Hynrei u Sedekaïah lymne ki rangbah synshar jong u lymne ki paidbah kim shym la kohnguh ïa ka khubor kaba U Trai u la ai ha nga.

³ U syiem Sedekaïah u la phah ïa u Jehukal u khun jong u Shelemaïah bad u Sephanaïah u lyngdoh u khun jong u Maaseïah ban ong ïa nga ban duwai ha U Trai U Blei jong ngi na ka bynta ka jaitbynriew jong ngi.

⁴ Ïa nga ym pat shym la set ha ka byndi bad nga dang ïaid laitluid hapdeng ki briew.

⁵ Ka kynhun shipai Babilonia ka dang kerkut ïa ka Jerusalem, hynrei haba ki la ïohsngew ba ka kynhun shipai Ijipt ka la jam sha shiliang u pud ka Ijipt, ki la phai dien noh.

⁶ Te U Trai, U Blei ki Israel, u la ong ïa nga ban ong ha u Sedekaïah,

⁷ “Ka kynhun shipai Ijipt ka don ha ka lynti ban ïarap ïa me, hynrei kan leit phai noh sha la ka ri.

⁸ Te ki nong Babilonia kin wan biang, kin tur ïaleh ïa ka nongbah, kin kurup ïa ka, bad kin thang duh ïa ka.

⁹ Ma nga U Trai, nga maham ïa me ban ym shukor ïa lade da kaba pyrkhat ba ki nong Babilonia kin ym wan shuh, namar kin sa wan biang.

¹⁰ Wat la men jop ïa ka kynhun shipai Babilonia baroh kawei, ba tang ki rangbah ba la mynsaw kin sah, kiba thiah ha la ki ïingjaiñ, kito ki rangbah kin dang ïeng bad thang ïa kane ka nongbah ha ban da ing khoit.”

U Jeremaïah u shah kem bad shah set byndi

¹¹ Ka kynhun shipai Babilonia ka la kynran dien noh na Jerusalem namar ka kynhun shipai Ijipt ka la wan.

¹² Kumta nga la sdang ban mihnoh na Jerusalem bad ban leit sha ka thain Benjamin ban leit shim ïa ka bynta jong nga na ka nongkynti ka longïing.

¹³ Hynrei haba nga la poi ha ka Khyrdop Benjamin, u rangbah nongïalam uba dei khmih ïa ki shipai ba don ha ka kam hangta, u briew uba kyrteng u Irijah, u khun jong u Shelemaïah bad u ksiew jong u Hananaïah, u la pynsangeh ïa nga bad u la ong, “Phi la phet noh ban ïasoh bad ki nong Babilonia!”

¹⁴ Nga la jubab, “Kam long kumta! Ngam phet noh.” Hynrei u Irijah um sngap ïa nga. Pynban, u la kem ïa nga bad ïalam ïa nga sha ki rangbah synshar.

¹⁵ Ki la bitar haduh katta katta ïa nga bad hukum ban shoh ïa nga bad ban set ïa nga ha ka ïing u Jonathan, u sekretari ka ïingbishar, kaba ïa ka ïing jong u la pynlong ka byndi.

¹⁶ Ïa nga la set ha ka kamra kaba shapoh khyndew bad la set slem ïa nga hangta.

¹⁷ Hadien kata u syiem Sedekaïah u la phah khot ïa nga, bad hangta ha ka ïingsyiem u la kylli ïa nga ha kaba jar jar, “Hato don khubor ei ei na U Trai?” “Ka don,” nga la jubab, bad nga ong shuh shuh, “Ïa phi yn sa aiti noh ha u syiem ka Babilonia.”

¹⁸ Nangta nga la kylli, “Kaei ka kam runar ba nga la leh pyrshah ïa phi lane ïa ki rangbah synshar jong phi lane ïa kane ka jaitbynriew, kaba pynlong ïa phi ban thep ïa nga ha byndi?

¹⁹ Kaei kaba la jia ïa ki nongïathuhlypa kiba la ong ïa phi ba u syiem ka Babilonia un ym tur ïaleh ïa phi lane ïa ka ri?

²⁰ Bad mynta, Ko Syiem Kynrad, nga kyrpad ïa phi ban shahshkor ïa nga bad ban leh ïa kaei kaba nga ong. Sngewbha wat phah pat ïa nga sha ka byndi ha ka ïing u Jonathan. Lada phi leh kumta, da shisha ngan sa ïap hangta.”

²¹ Kumta u syiem Sedekaïah u la hukum ba yn set ïa nga ha ka phyllaw ka ïingsyiem. Nga la sah hangta, bad man ka sngi ïa nga la ai uwei u kpu na ka jaka shet kpu haduh ba baroh u kpu ha ka nongbah u la lut.