JEREMAÏAH 36 - Khasi CL Bible (BSI)

U Barukh u pule ïa ka kot kli ha ka Templ

¹ Ha ka snem kaba saw ba u Jehoïakim, u khun jong u Josaïah, u long u syiem ka Judah, U Trai u la ong ha nga,

² “Shim ïa ka kot kli bad thoh ha ka ïa baroh kaba nga la ong ha me shaphang ka Israel bad ka Judah bad baroh ki jaitbynriew. Thoh lut ïa baroh kaba nga la ong ha me naduh ka por ba nga la kren nyngkong ha me, mynba u Josaïah u long syiem, haduh mynta.

³ Lehse haba ki paid Judah kin ïohsngew shaphang baroh ka jingpynjot kaba nga thmu ban wallam halor jong ki, kin phai noh na ki lynti bymman jong ki. Te ngan map ïa ka jingbymman jong ki bad ïa ki pop jong ki.”

⁴ Kumta nga la khot ïa u Barukh u khun jong u Neraïah bad nga la ong ïa u ban thoh katba nga dang ïathuh ha u ïa kiei kiei baroh kiba U Trai u la lah ong ha nga. Bad u Barukh u la thoh ïa ka baroh ha ka kot kli.

⁵ Nangta nga la ai ha u Barukh ïa kine ki jingbthah harum: “Ym shah shuh ïa nga ban rung hapoh ka Templ.

⁶ Hynrei nga kwah ïa me ban rung hangta ha kawei pat ka sien ba ki briew kin ïashahjingit. Men pule jam na ka kot kli, khnang ba kin ïohsngew ïa kiei kiei baroh ba U Trai u la lah ong ha nga bad ba nga la dep phah thoh ha me. Leh ïa kane ha ka jaka ba baroh ki lah ban ïohsngew ïa me, kynthup ïa ki paid Judah kiba la wan rung shapoh na ki shnong jong ki.

⁷ Lehse kin duwai ha U Trai bad phai pat na ki lynti bymman jong ki, namar U Trai u la byrngem ïa kane ka jaitbynriew da ka jingbitar bad ka jingbitar shla bashyrkhei.”

⁸ Kumta u Barukh u la pule ïa ki ktien U Trai ha ka Templ thik kumba nga la ong ïa u ban leh.

⁹ Ha u bnai bakhyndai jong ka snem kaba san ba u Jehoïakim u la long u syiem ka Judah, ki briew ki la shahjingit ban ïoh ïa ka jingsngewbha U Trai. Ïa ka jingshahjingit la leh da baroh kiba shong basah ha Jerusalem bad da baroh kito kiba la wan hangta na ki shnong ka Judah.

¹⁰ Nangta, katba baroh ki briew ki dang ïasngap, u Barukh u la pule na ka kot kli ïa kiei kiei baroh kiba nga la lah ong. U la leh ïa kane ha ka Templ, na ka kamra jong u Gemaraïah u khun jong u Shaphan, u sekretari ka ïingbishar. Ka kamra jong u ka don ha ka phyllaw kaba haneng hajan ka jaka ban rung sha ka Khyrdop Bathymmai jong ka Templ.

La pule na ka kot kli ha ki rangbah synshar

¹¹ U Mikaïah, u khun jong u Gemaraïah bad u khun ksiew jong u Shaphan, ki la ïohsngew ba u Barukh u la pule na kot kli ïa kaei kaba U Trai u la lah ong.

¹² Te u la leit sha ka ïingsyiem, sha ka kamra u sekretari ka ïingbishar, ha kaba baroh ki rangbah synshar ki dang don ha ka jingïalang. U Elishama, u sekretari ka ïingbishar, u Delaïah u khun jong u Shemaïah, u Elnathan u khun jong u Akhbor, u Gemaraïah u khun jong u Shaphan, u Sedekaïah u khun jong u Hananaïah, bad baroh kiwei pat ki rangbah synshar ki la don hangta.

¹³ U Mikaïah u la ong ïa ki ïa kiei kiei baroh kiba u la ïohsngew ba u Barukh u la pule ha ki paidbah.

¹⁴ Te ki rangbah synshar ki la phah ïa u Jehudi (u khun jong u Nethanaïah, u ksiew jong u Shelemaïah, bad u ksiew tun jong u Kushi) ban ong ïa u Barukh ban wallam ïa ka kot kli na kaba u la pule ha ki paidbah. U Barukh u la wallam ha ki ïa ka kot kli.

¹⁵ “To shong,” ki la ong, “bad to pule na ka kot kli ha ngi.” Te u Barukh u la leh kumta.

¹⁶ Hadien ba u la lah pule ïa ka, ki la ïaphai uwei sha uwei pat ha ka jingsngew sheptieng, bad ki la ong ha u Barukh, “Ngi dei ban ïathuh ïa kane ha u syiem.”

¹⁷ Nangta ki la ong ïa u, “Ïathuh ha ngi, mynta, kumno phi la poi thoh ïa kane baroh? Hato u Jeremaïah u la ong ïa ka ha phi ban thoh?”

¹⁸ U Barukh u la jubab, “U Jeremaïah u la ong ïa kawei pa kawei ka kyntien ha nga, bad nga la thoh ïa ka da ka sia ha kane ka kot kli.”

¹⁹ Te ki la ong ha u, “Ma me bad u Jeremaïah phi dei ban leit noh bad ban rieh. Wat ai ïano ïano ban tip hangno phi ïadon.”

U syiem u thang ïa ka kot kli

²⁰ Ki rangbah synshar ki buh ïa ka kot kli ha ka kamra u Elishama, u sekretari ka ïingbishar, bad ki leit sha ka phyllaw ka ïingsyiem, bad ki la ïathuh ïa baroh kiei kiei ha u syiem.

²¹ Te u syiem u la phah ïa u Jehudi ban leit shim ïa ka kot kli. U la leit shim na ka kamra u Elishama bad u la pule ïa ka ha u syiem bad ha baroh ki rangbah synshar kiba ïeng sawdong jong u.

²² Ka la long ha ka por tlang bad u syiem u dang shong ha ka ïingsyiem tlang ha khmat ka ding.

²³ Mar shu dep pule da u Jehudi ïa ki lai ne saw bynta, u syiem u la ot ïa ki da ka tari barit bad bret ïa ki ha ka ding. U ïai leh ïa kane haduh ba la thang lut ïa ka kot kli baroh kawei.

²⁴ Hynrei u syiem lymne uno uno na ki rangbah synshar kiba la ïohsngew ïa kane baroh, kim shym la sheptieng ne pyn-i kano kano ka dak jong ka jingsngewsih.

²⁵ Wat la u Elnathan, u Delaïah, bad u Gemaraïah ki la kyrpad ïa u syiem ban ym thang ïa ka kot kli, um patiaw satia ïa ki.

²⁶ Nangta u la hukum ïa u khun syiem Jerahmeel, ryngkat bad u Seraïah u khun jong u Asriel bad u Shelemaïah u khun jong u Abdeel, ban kem ïa nga bad ïa u sekretari jong nga u Barukh. Hynrei U Trai u la buhrieh ïa ngi.

U Jeremaïah u thoh da kawei pat ka kot kli

²⁷ Hadien ba u syiem Jehoïakim u la lah thang ïa ka kot kli kaba nga la ong ha u Barukh ban thoh,

²⁸ U Trai u la ong ïa nga ban shim da kawei pat ka kot kli bad ban thoh ha ka ïa kiei kiei baroh kiba la don ha kata kaba nyngkong.

²⁹ U Trai u la ong ïa nga ban ong ha u syiem, “Me la thang ïa ka kot kli, bad me la kylli ïa u Jeremaïah balei ba u la thoh ba u syiem ka Babilonia un wan bad pynjot ïa kane ka ri bad pynïap ïa ki briew jong ka bad ki mrad jong ka.

³⁰ Te mynta, ma nga U Trai, nga ong ha me, ko syiem Jehoïakim, ba yn ym don u ban hiarpateng na me u ban synshar shuh halor ka hima u Dabid. Ïa ka metïap jong me yn bret shabar ha ka jingshit kyr-ang ka sngi ha ka por mynsngi bad ha u thah mynmiet.

³¹ Ngan pynshitom ïa me, ïa ki khun ki ksiew jong me, bad ïa ki rangbah synshar jong me namar ki pop kiba ma phi baroh phi la leh. Ma me lymne ki briew ka Jerusalem bad Judah ki la sngap ïa ki jingmaham jong nga, bad kumta ngan wallam halor baroh ïa ka jingpynjot ïa kaba nga la dep kren pyrshah.”

³² Te nga la shim ïa kawei pat ka kot kli bad nga la ai ïa ka ha u sekretari jong nga u Barukh, bad u la thoh hangta ïa kiei kiei baroh kiba nga la ong. U la thoh ïa kiei kiei baroh kiba la don ha ka kot kli kaba nyngkong bad kijuh ki khubor kiba nga la ong ha u ban thoh.