JEREMAÏAH 35 - Khasi CL Bible (BSI)

U Jeremaïah bad ki Rekhab

¹ Mynba u Jehoïakim u khun jong u Josaïah u long u syiem ka Judah, U Trai u la ong ha nga.

² “Khie leit sha ki dkhot jong ka kur Rekhab bad ïakren bad ki. Nangta wallam ïa ki sha kawei na ki kamra ha ka Templ bad tyrwa waiñ ïa ki khyndiat.”

³ Kumta nga la shim ïa ka kur Rekhab baroh kawei — u Jaasanaïah (u khun jong uwei pat u Jeremaïah, uba dei u khun jong u Habassinaïah) bad ïa baroh ki shynrang kiba shi para bad u bad ki khun shynrang jong u — bad wallam ïa ki sha ka Templ.

⁴ Nga la wallam ïa ki sha ka kamra jong ki synran jong u Hanan u nongïathuhlypa u khun jong u Igdalaïah. Kane ka kamra ka long halor ka kamra u Maaseïah u khun jong u Shallum, u rangbah synshar bapawkhmat jong ka Templ, bad hajan ki kamra jong kiwei pat ki rangbah synshar.

⁵ Nangta nga la buh ïa ki khuri bad ki pliang ba la dap waiñ ha khmat ki Rekhab, bad nga ong ïa ki, “To dih waiñ khyndiat.”

⁶ Hynrei ki la jubab, “Ngim ju dih waiñ. U kpa tymmen jong ngi u Jonadab u khun jong u Rekhab u la ong ïa ngi ba ma ngi lymne ki khun ki ksiew jong ngi ngim dei ban dih ïa kano kano ka waiñ.

⁷ U la ong ruh ïa ngi ban ym tei ki ïing ne rep ki lyngkha, bad ban ym buh ki bri sohwaiñ lane thied ïa ki. U la hukum ïa ngi ba ngin shong ngin sah borabor ha ki ïingjaiñ, khnang ba ngin don ha kane ka ri ha kaba ngi im kum ki nongwei.

⁸ Ngi la kohnguh ïa baroh ki jingbthah ba u Jonadab u la ai ha ngi. Ma ngi hi ngim ju dih waiñ, lymne ki tnga jong ngi, ki khun shynrang jong ngi, lane ki khun kynthei jong ngi.

^9-10 Ngim ju tei ki ïing ki sem ban shong ban sah — ngi shong ha ki ïingjaiñ — bad ngim don ki bri sohwaiñ la ki jong, ki lyngkha, lane u kew. Ngi la kohnguh tylli ïa baroh kiei kiei kiba u kpa tymmen jong ngi u Jonadab u la hukum ïa ngi.

¹¹ Hynrei mynba u syiem Nebukhadnessar u la hiarthma ïa ka ri, ngi la rai ban wan sha Jerusalem ban lait na ki kynhun shipai ka Babilonia bad ka Syria. Dei na kane ka daw balei ba ngi ïashong ïasah ha Jerusalem.”

^12-13 Te U Trai Badonbor Baroh, U Blei ki Israel, u la ong ïa nga ban leit bad ong ha ki paid Judah bad ka Jerusalem, “Ma nga, U Trai, nga kylli ïa phi balei ba phi kyntait ban shahshkor ïa nga bad ban kohnguh ïa ki jingbthah jong nga.

¹⁴ Ki khun ki ksiew u Jonadab ki la kohnguh ïa ki hukum jong u ban ym dih waiñ, bad haduh kane hi ka sngi ym don uwei ruh na ki uba dih ïa kaba kumno kumno ruh ka waiñ. Hynrei nga la ïai kren ha phi, bad phim shym la kohnguh ïa nga.

¹⁵ Nga la ïai phah sha phi ïa baroh ki shakri jong nga, ki nongïathuhlypa, bad ki la ong ïa phi ban iehnoh ïa ki lynti bymman jong phi bad ban leh ïa kaei kaba dei. Ki la maham ïa phi ban ym mane bad shakri ïa kiwei pat ki blei, khnang ba phi lah ban ïaishong ha ka ri kaba nga la ai ha phi bad ki kpa tymmen jong phi. Hynrei phim shym la shahshkor ïa nga lane sngap ïa nga.

¹⁶ Ki khun ki ksiew u Jonadab ki la kohnguh ïa ka hukum kaba u kpa tymmen jong ki u la ai ha ki, hynrei ma phi phim shym la kohnguh ïa nga.

¹⁷ Kumta mynta, ma nga, U Trai Badonbor Baroh, U Blei ki Israel, ngan wallam halor jong phi ki paid Judah bad Jerusalem ïa baroh ka jingpynjot kaba nga la kular. Ngan leh ïa kane namar phim shym la shahshkor haba nga la kren ha phi, bad phim shym la jubab haba nga la khot ïa phi.”

¹⁸ Te nga la ong ïa ka kur Rekhab ba U Trai Badonbor Baroh, U Blei ki Israel, u la ong, “Phi la kohnguh ïa ka hukum kaba u kpa tymmen jong phi u Jonadab u la ai ha phi; phi la bud ïa baroh ki jingbthah jong u, bad phi la leh ïa kaei kaei baroh kaba u la hukum ïa phi.

¹⁹ Kumta ma nga, U Trai Badonbor Baroh, U Blei ki Israel, nga kular ba u Jonadab u khun jong u Rekhab un don borabor ïa u shynrang u ban hiarpateng ban shakri ïa nga.”