JEREMAÏAH 34 - Khasi CL Bible (BSI)

Ka khubor ïa u Sedekaïah

¹ U Trai u la kren ha nga mynba u Nebukhadnessar u syiem ka Babilonia bad ka kynhun shipai jong u, ba la kyrshan da ki shipai na baroh ki hima bad ki jaitbynriew kiba la hap hapoh ka jingsynshar jong u, ki la tur ïaleh ïa ka Jerusalem bad ki shnong ba-marjan.

² U Trai, U Blei ki Israel, u la ong ha nga ban leit bad ban ong ïa u Sedekaïah u syiem ka Judah, “Ma nga, U Trai, ngan ai ïa kane ka nongbah ha u syiem ka Babilonia, bad un thang duh ïa ka.

³ Phin ym lait im; yn kem ïa phi bad yn ai noh ïa phi sha u. Phin ïohi ïa u markhmat bad kren ïa u da lade hi; te nangta phin leit sha Babilonia.

⁴ Ko Sedekaïah, shahshkor ïa kaei kaba nga ong shaphang jong me. Men ym shah pynïap ha ka thma.

⁵ Men ïap ha kaba suk, bad kumba ki briew ki thang jingiwbih haba ki tep ïa ki kpa tymmen jong me, kiba long ki syiem ha shuwa jong me, ha kajuh ka rukom kin thang ki jingiwbih na ka bynta jong me. Kin ïambriew namar jong me bad kin ong, ‘U syiem jong ngi u la ïap!’ Ma nga, U Trai, nga la kren.”

⁶ Te nga la ai ïa kane ka khubor ha u syiem Sedekaïah ha Jerusalem katba ka kynhun shipai jong u syiem ka Babilonia ka dang tur ïaleh ïa ka nongbah.

⁷ Ka kynhun shipai ka dang tur ïaleh ruh ïa ka Lakhish bad ka Asekah, kiba long tang ma ki kiwei pat ki nongbah ba la tei kynroh kiba dang sah jong ka Judah.

Ka jingleh shukor ïa ki mraw

^8-9 U syiem Sedekaïah bad ki briew ka Jerusalem ki la pynlong ka jingïakut ban pyllaitluid noh ïa ki mraw Hebru, ïa ki shynrang bad ki kynthei, khnang ba uno uno ruh un ym don u para jait Israel kum u mraw.

¹⁰ Baroh ki briew bad ki nongïalam jong ki, ki la ïamynjur ban pyllaitluid noh ïa la ki mraw bad ban ym pynlong mraw shuh ïa ki.

¹¹ Ki la pyllaitluid shisha ïa ki, hynrei hadien ki la kylla jingmut, ki la shim pat ïa ki, bad ki la pynbor ïa ki ban long mraw biang.

^12-13 Te U Trai, U Blei ki Israel, u la ong ha nga ban ong ha ki paidbah: “Nga la pynlong ka jutang bad ki kpa tymmen jong phi mynba nga la pyllait ïa ki na ka ri Ijipt bad pyllaitluid ïa ki na ka jinglongmraw.

¹⁴ Nga la ong ïa ki ba man ki hynñiew snem ki dei ban pyllaitluid ïa uno uno u mraw Hebru uba la shakri ïa ki hynriew snem. Hynrei ki kpa tymmen jong phi kim shym la suidñiew ïa nga lane shahshkor ïa kaei kaba nga la ong.

¹⁵ Dang tang khyndiat sngi mynshuwa phi la kylla jingmut bad phi la leh ïa kaei kaba pynsngewbha ïa nga. Baroh na phi, phi la ïamynjur ban pyllaitluid noh ïa la ki para Israel, bad phi la pynlong ïa ka jutang ha ka jingdon ryngkat jong nga, ha ka Templ ha kaba la mane ïa nga.

¹⁶ Hynrei phi kylla pat ïa ka jingmut jong phi bad phi pynjahburom ïa nga. Baroh na phi, phi la shim pat ïa ki mraw ïa kiba phi la pyllaitluid kumba ki la kwah, bad phi la pynlong mraw jubor biang ïa ki.

¹⁷ Te mynta, ma nga, U Trai, nga ong ba phim shym la kohnguh ïa nga: phim shym la ai ka jinglaitluid ïa la ki para Israel. Kumta te, ngan ai ha phi ïa ka jinglaitluid: ka jinglaitluid ban ïap da ka thma, ka jingpang, bad ka jingïapthngan. Ngan pynlong ïa kawei pa kawei ka jaitbynriew ha ka pyrthei ban sngewshyrkhei ïa kaei kaba nga leh ïa phi.

^18-19 Ki rangbah synshar ka Judah bad ka Jerusalem, ryngkat bad ki rangbah synshar ka ïingsyiem, ki lyngdoh, bad baroh ki nongïalam, ki la pynlong ïa ka jutang bad nga da kaba ïaid hapdeng ar tylli ki shiteng jong u masi kyrtong ïa uba ki la ot ha ki ar bynta. Hynrei ki la pynkheiñ ïa ka jutang bad kim shym la bat ïa ki kyndon jong ka. Kumta ngan leh ïa kine ki briew ïa kaei kaba ki la leh ïa u masi kyrtong.

²⁰ Ngan aiti noh ïa ki sha ki nongshun jong ki, kiba kwah ban pynïap ïa ki, bad ïa ki metïap jong ki yn bam da ki sim bad ki mradkhlaw.

²¹ Ngan ai ruh ïa u Sedekaïah u syiem ka Judah bad ïa ki rangbah synshar jong u sha kito kiba kwah ban pynïap ïa ki. Ngan aiti ïa ki sha ka kynhun shipai Babilonia, kaba la sangeh ban tur ïaleh ïa phi.

²² Ngan ai ka hukum, bad kin wan biang sha kane ka nongbah. Kin tur ïaleh ïa ka, kin kurup ïa ka, bad thang duh ïa ka. Ngan pynlong ïa ki shnong ka Judah ba kin long kum ka ri shyiap ha kaba yn ym don mano mano ban shong ban sah ha ka. Ma nga, U Trai, nga la kren.”