JEREMAÏAH 33 - Khasi CL Bible (BSI)

Kawei pat ka jingkular jong ka jingkyrmen

¹ Katba nga dang don hi ha ka ïingbyndi ha ka phyllaw, ka khubor U Trai ka la wan biang ha nga.

² U Trai, uba la thaw ïa ka pyrthei, uba la pynlong ïa ka bad buh ïa ka ha la ka jaka, u la kren ha nga. Uta uba ka kyrteng jong u ka long U Trai, u la ong,

³ “To khot kyrpad ïa nga, bad ngan jubab ïa phi; ngan ïathuh ïa phi kiei kiei kiba phylla bad kiba sngewphylla kiba phim shym la tip ei ei shaphang jong ki.

⁴ Ma nga, U Trai, U Blei ki Israel, nga ong ba ki ïing ha Jerusalem bad ka ïingsyiem Judah kin sa shah pynkhyllem na ka daw jong ka jingshah kerkut bad ka jingtur ïaleh.

⁵ Katto katne kin ïaleh pyrshah ïa ki nong Babilonia, ki ban pyndap ïa ki ïing da ki metïap jong kito kiba ngan sa pynïap namar ka jingbitar bad ka jingbitar shla jong nga. Nga la phai noh na kane ka nongbah namar kiei kiei kiba sniew kiba ki briew jong ka ki la leh.

⁶ Hynrei ngan sa pynkhiah ïa kane ka nongbah bad ki briew jong ka bad ngan pynïoh pat ha ki ïa ka jingkoit jingkhiah. Ngan pyn-i ha ki ïa ka jingsuk kyrhai bad ka jingshongshngain.

⁷ Ngan pynlong ïa ka Judah bad Israel kiba roi kyrhai, bad ngan pynlong pat ïa ki kumba mynshuwa.

⁸ Ngan pynkhuid ïa ki na ki pop kiba ki la leh pyrshah ïa nga, bad ngan map ïa ki pop jong ki bad ka jingïaleh pyrshah jong ki.

⁹ Ka Jerusalem kan long ka thymmei jong ka jingkmen, ka burom bad ka jingsngew sarong ïa nga; bad ki jaitbynriew baroh ha ka pyrthei kin sheptieng bad khynñiuh haba kin ïohsngew ïa kiei kiei kiba bha kiba nga leh ïa ki briew ka Jerusalem bad shaphang ka jingroi jingpar kaba nga wallam ha ka nongbah.”

¹⁰ U Trai u la ong, “Ki briew ki ïa-ong ba kane ka jaka ka long kum ka ri shyiap, ba kam don ki briew ne ki mrad kiba im ha ka. Bad ki ong ïa kaba dei; ki shnong ka Judah bad ki surok bah ka Jerusalem ki long thylli; ym don ki briew ne ki mrad kiba im hangta.

¹¹ Hynrei ha kine ki jaka phin ïohsngew biang ïa ki jingpyrta jong ka jingkmen bad ka jinglehkmen bad ki jingsawa bakmen jong ki jingïabam khawai shongkurim. Phin ïohsngew ba ki briew ki ïarwai katba ki wallam ïa ki jingainguh thang sha ka Templ jong nga; kin ïa-ong, “ ‘To ainguh ïa U Trai Badonbor Baroh, namar u long uba bha bad ka jingieit jong u ka neh bymjukut.’ Ngan pynlong ïa kane ka ri kaba roi kyrhai kumba mynshuwa. Ma nga, U Trai, nga la kren.”

¹² U Trai Badonbor Baroh u la ong, “Ha kane ka ri kaba long kum ka ri shyiap bad ha kaba ym don ki briew ne ki mrad kiba im hangta, yn sa don biang ki jaka phlang ha kiba ki nongaplangbrot kin wallam ïa ki langbrot jong ki.

¹³ Ha ki shnong jong ka ri lum, ha ki kjat lum, bad ha ka Judah bashaphang shathie, ha ka ri ki Benjamin, ha ki shnongrit sawdong ka Jerusalem bad ha ki shnong ka Judah, ki nongaplangbrot sa shisien kin ñiew biang ïa la ki langbrot. Ma nga, U Trai, nga la kren.”

¹⁴ U Trai u la ong, “Ka por kan poi haba ngan pyndep ïa ka kular kaba nga la pynlong bad ki paid Israel bad Judah.

¹⁵ Ha kata ka por ngan jied kum u syiem ïa u nonghiarpateng uba hok na u Dabid. Uta u syiem un leh ïa kaei kaba dei bad kaba hok ha ka ri baroh kawei.

¹⁶ Ïa ki briew ka Judah bad ka Jerusalem yn pyllait im bad kin im hapdeng ka jingshngain. Ïa ka nongbah yn khot ‘U Trai ka Jingpynim jong ngi.’

¹⁷ Ma nga, U Trai, nga kular ba borabor yn don u nonghiarpateng na u Dabid ban long u syiem ki Israel

¹⁸ bad ba borabor yn don ki lyngdoh na ka jait Lebi ban shakri ïa nga bad ban ai ki jingainguh thang, ki jingainguh bam bad ki jingkñia.”

¹⁹ U Trai u la ong ha nga,

²⁰ “Nga la pynlong ka jutang ïa ka sngi bad ka miet, khnang ba kin wan mih ha la ki por kiba biang; bad ïa ka jutang yn ym lah ban pynkheiñ.

²¹ Ha kajuh ka rukom nga la pynlong ka jutang bad u shakri jong nga u Dabid ba un don borabor u nonghiarpateng u ban long syiem, bad nga la pynlong ka jutang bad ki lyngdoh na ka jait Lebi ba borabor kin shakri ïa nga; bad ïa kita ki jutang yn ym lah ban pynkheiñ lano lano ruh.

²² Ngan pynroi ïa ki nonghiarpateng jong u shakri jong nga u Dabid bad ïa ka jingdon ki lyngdoh na ka jait Lebi, ba kumta yn ym lah ban ñiew ïa ki kumba long ki khlur ha sahit bneng lane u shyiap harud duriaw.”

²³ U Trai u la ong ïa nga,

²⁴ “Phi la ïohi kumno ba ki briew ki ïa-ong ba nga la kyntait noh ïa ki Israel bad Judah, ki ar tylli ki longïing kiba nga la jied? Bad kumta ki khmih da ka jingñiewbeiñ ïa ki briew jong nga bad kim kheiñ shuh ïa ki kum ka jaitbynriew.

²⁵ Hynrei ma nga, U Trai, nga la pynlong ka jutang bad ka sngi bad ka miet, bad nga la thaw ki aiñ kiba pynïaid ïa ka pyrthei bad ka sahit bneng.

²⁶ Bad kumba, shisha, nga la leh ïa kane, kumta ngan pynneh ïa la ka jutang bad ki khun ki ksiew u Jakob bad u shakri jong nga u Dabid. Ngan jied ïa uwei na ki nonghiarpateng u Dabid ban synshar halor ki khun ki ksiew u Abraham, u Isaak, bad u Jakob. Ngan isynei ïa ki briew jong nga bad pynlong ïa ki ban roi kyrhai pat.”