JEREMAÏAH 32 - Khasi CL Bible (BSI)

U Jeremaïah u thied ka lyngkha

¹ U Trai u la kren ha nga ha ka snem kaba shiphew ba u Sedekaïah u long u syiem ka Judah, kaba long ruh ka snem kaba khatphra jong u Nebukhadnessar u syiem ka Babilonia.

² Ha kata ka por ka kynhun shipai jong u syiem ka Babilonia ka dang tur ïaleh ïa ka Jerusalem, bad ïa nga la set ha ka phyllaw ba la kerkut jong ka ïingsyiem.

³ U syiem Sedekaïah u la set byndi ïa nga hangta bad u la mudui ba nga la pynbna ba U Trai u la ong, “Ngan pynlong ba u syiem ka Babilonia un kurup ïa kane ka nongbah, bad u syiem Sedekaïah un ym lait im.

⁴ Yn aiti noh ïa u ha u syiem ka Babilonia; un peit ïa u markhmat bad un kren ïa u hi da lade.

⁵ Ïa u Sedekaïah yn rah noh sha Babilonia bad un sah hangta haduh ba ngan da pyndep ïa kaei ban leh ïa u. Wat lada un ïaleh ïa ki nong Babilonia, un ym lah ban jop. Ma nga U Trai, nga la kren.”

⁶ U Trai u la ong ïa nga

⁷ ba u Hanamel, u khun jong u kñi jong nga, u Shallum, un wan sha nga bad ka jingkyrpad ban thied ïa ka lyngkha jong u ha Anathoth ha ka thain Benjamin, namar nga long u ba-ha-ïing bajan tam bad ba nga don ka hok ban thied ïa ka na ka bynta ïa lade.

⁸ Te kumba U Trai u la ong, u Hanamel u la wan sha nga hangta ha ka phyllaw bad u la ong ïa nga ba ngan thied ïa ka lyngkha. Kumta nga sngewthuh ba U Trai u la kren shisha ha nga.

⁹ Nga la thied ïa ka lyngkha na u Hanamel bad nga thew ïa ka pisa na ka bynta jong u; ka shongdor khathynñiew lyngkhot ki sbai rupa.

¹⁰ Nga la soi bad shon muhor ïa ka dulir, bad la sakhi ïa ka, bad la thew ïa ka pisa ha ka tarajur.

¹¹ Te nga la shim ïa baroh ar tylli ki kopi ka dulir thied jaka — ka kopi ba la shon muhor kaba don ka jingïakut bad ki kyndon, bad ka kopi ba khlem shon muhor —

¹² bad nga la ai ïa ki ha u Barukh, u khun jong u Neraïah bad u ksiew jong u Mahseïah. Nga la ai ïa ki ha u ha ka jingïadon lang u Hanamel bad ki sakhi kiba la soi ïa ka dulir thied jaka bad ki rangbah kiba ïashong ha ka phyllaw.

¹³ Ha khmat jong ki baroh nga la ong ha u Barukh,

¹⁴ “U Trai Badonbor Baroh, U Blei ki Israel, u la hukum ïa phi ban shim ïa kine ki dulir thied jaka baroh ar tylli, ka dulir thied jaka ba la shon muhor bad ka kopi ba khlem shon muhor, bad ban buh ïa ki ha u khra khyndew, khnang ba kin neh ha ki snem ki ban wan.

¹⁵ U Trai Badonbor Baroh, U Blei ki Israel, u la ong ba ïa ki ïing, ki lyngkha bad ki bri sohwaiñ yn sa thied biang ha kane ka ri.”

Ka jingduwai u Jeremaïah

¹⁶ Hadien ba nga la ai ïa ka dulir thied jaka ha u Barukh, nga la duwai,

¹⁷ “A Trai Nongsynshar, me la thaw ïa ka khyndew bad ka suiñbneng da ka bor bad ka borbah bakhraw; ym don kaba eh than ïa me.

¹⁸ Me la pyn-i ïa ka jingieit baneh sha ki hajar, hynrei me pynshitom ruh ïa ki briew na ka bynta ki pop ki kmie ki kpa jong ki. Me long U Blei bakhraw bad badonbor; me long U Trai Badonbor Baroh.

¹⁹ Me thaw ïa ki jingthmu bastad bad me leh ïa kiei kiei kiba khrawbor; me ïohi ïa kiei kiei baroh kiba ki briew ki leh, bad me ainong ïa ki kat kum ki jingleh jong ki.

²⁰ Naduh mynbarim, me la leh ïa ki kambah bad ki jingphylla ha Ijipt, bad me ïai leh ïa ki haduh kane ka sngi, ha Israel bad hapdeng kiwei ki hima baroh, ba kumta ïa me mynta la tip kylleng sawdong.

²¹ Da ki kambah bad ki jingphylla kiba la pynsngewshyrkhei ïa ki nongshun jong ngi, me la pyndonkam ïa ka bor bad ka borbah jong me ban wallam ïa ki briew jong me, ki Israel, na ka ri Ijipt.

²² Me la ai ha ki ïa kane ka ri kaba tuid da ka dud bad ka ngap, kumba me la kular ha ki kpa tymmen jong ki.

²³ Hynrei ynda ki la wan sha kane ka ri bad shimti ïa ka, kim shym la kohnguh ïa ki hukum jong me lane im kat kum ka jinghikai jong me; kim shym la leh ïa kaba me la hukum ïa ki ban leh. Bad kumta me la wallam ïa kane ka jingpynjot baroh ha ki.

²⁴ “Ki nong Babilonia ki la tei ïa ki kynton kerkut sawdong ïa ka nongbah ban kurup ïa ka, bad ki tur ïaleh ïa ka. Ka thma, ka jingïapthngan bad ka jingpang kin pynlong ïa ka nongbah ban hap ha ki kti jong ki. Me lah ban ïohi ba baroh kaba me la kren ka la urlong shisha.

²⁵ Pynban, ko Trai Nongsynshar, me long ma me uba la hukum ïa nga ban thied ïa ka lyngkha ha ka jingdon lang ki sakhi, wat la ka nongbah ka la jan shah kurup ha ki nong Babilonia.”

²⁶ Te U Trai u la ong ha nga,

²⁷ “Nga long U Trai, U Blei ki jaitbynriew baroh. Ym don kaei kaei kaba eh than ïa nga ban leh.

²⁸ Ngan sa ai ïa kane ka nongbah ha u Nebukhadnessar u syiem ka Babilonia bad ka kynhun shipai jong u; kin kurup ïa ka bad thang ïa ka da ka ding.

²⁹ Kin sa thang duh ïa ka, ryngkat bad ki ïing ki sem hangno hangno ha kiba ki briew ki la pynbitar ïa nga da kaba thang ki jingiwbih ha u Baal halor ki tnum ïing bad da kaba theh ïa ka waiñ jong ki jingainguh sha kiwei pat ki blei.

³⁰ Naduh kaba sdang eh jong ka histori jong ki, ki paid Israel bad ki paid Judah ki la pynsngewsih ïa nga bad ki la pynbitar ïa nga da kaei kaba ki la leh.

³¹ Ki briew jong kane ka nongbah ki la pynbitar bad pynbitar shla ïa nga naduh ka sngi ba la thaw ïa ka.

³² Nga la kut jingmut ban pynjot ïa ka namar baroh kaba sniew ba la leh da ki paid ka Judah bad ka Jerusalem, ryngkat bad ki syiem bad ki nongïalam jong ki, ki lyngdoh bad ki nongïathuhlypa jong ki.

³³ Ki la phai dien na nga; bad wat la nga la ïai hikai ïa ki, kim shahshkor bad ïoh jinghikai.

³⁴ Ki buh wat ïa ki bleithaw ba-ijli jong ki ha ka Templ ba la tei na ka bynta ka jingmane ïa nga, bad ki la pyntngit ïa ka.

³⁵ Ki la tei ki duwan ïa u Baal ha ka Them Hinnom, ban kñia ïa ki khun shynrang bad ki khun kynthei jong ki ha u blei Molekh. Ngam shym la hukum ïa ki ban leh ïa kane, bad kam ju rung wat ha ka jingmut jong nga ba kin leh kum ïa kata kaei kaei bad pynlong ïa ki paid Judah ban leh pop.”

Ka jingkular jong ka jingkyrmen

³⁶ U Trai, U Blei ki Israel, u la ong ha nga, “Ko Jeremaïah, ki briew ki ïa-ong ba ka thma, ka jingïapthngan, bad ka jingpang kin pynlong ïa kane ka nongbah ban hap ha ki kti jong u syiem ka Babilonia. Mynta, to shahshkor ïa kaei de kaba nga don ban ong.

³⁷ Ngan sa lumlang ïa ki briew na baroh ki ri na kiba nga la pynsakma ïa ki ha ka jingbitar bad ka jingbitar shla jong nga, bad ngan wallam pat ïa ki sha kane ka jaka bad shah ïa ki ban shong ban sah hangne ha ka jingshngain.

³⁸ Te kin long ki briew jong nga, bad ngan long U Blei jong ki.

³⁹ Ngan ai ha ki ïa kawei ka jingthmu ha ka jingim: ban burom ïa nga ha ki por baroh, na ka bynta ka jingbha jong ki hi bad ka jingbha jong ki khun ki ksiew jong ki.

⁴⁰ Ngan pynlong ïa ka jutang bymjukut bad ki. Ngan ym sangeh lano lano ruh ban leh ïa kiei kiei kiba bha na ka bynta jong ki, bad ngan pynlong ïa ki ban tiengburom ïa nga da ka dohnud jong ki baroh, khnang ba kin ym phai dien shuh na nga.

⁴¹ Ngan sngewbha ha kaba leh kiei kiei kiba bha na ka bynta jong ki, bad ngan buh pynskhem junom ïa ki ha kane ka ri.

⁴² “Kumba nga la wallam ïa kane ka jingjot ha kine ki briew, kumta ruh ngan ai ïa ki baroh kiei kiei kiba bha kiba nga la kular.

⁴³ Ki briew ki ïa-ong ba kane ka ri kan long kum ka ri shyiap ha kaba ki briew lymne ki mrad kin im, bad ba ïa ka yn ai noh sha ki nong Babilonia. Hynrei ïa ki lyngkha yn sa thied pat ha kane ka ri.

⁴⁴ Ki briew kin thied ïa ki, bad ïa ki dulir thied jaka yn soi, shon muhor bad yn sakhi. Kane kan jia ha ka ri Benjamin, ha ki shnong sawdong ka Jerusalem, ha ki shnong ka Judah, bad ha ki shnong ka ri lum, ha ki kjat lum, bad ha ka Judah bashaphang shathie. Ngan pynïoh pat ha ki briew ïa ka ri jong ki. Ma nga, U Trai, nga la kren.”