JEREMAÏAH 31 - Khasi CL Bible (BSI)

Ka jingwanphai ki Israel sha la ka ri

¹ U Trai u ong, “Ka por kan wan haba ngan long U Blei jong ki jait Israel baroh, bad kin long ki briew jong nga.

² Ha ka ri shyiap nga la pyn-i ïa ka jingisynei ïa kito ki briew kiba la lait na ka jingïap. Haba ki paid Israel ki la thrang ban ïoh ïa ka jingjahthait, nga la paw ha ki na sha jngai bah.

³ Ko ki paid Israel, nga la ieit ïa phi borabor, kumta nga ïai pyn-i ïa phi ïa ka jingieit baneh jong nga.

⁴ Sa shisien pat ngan tei ïa phi. Sa shisien pat phin shim ïa ki kanjari bad phin shad da ka jingkmen.

⁵ Sa shisien pat phin thung ki dieng sohwaiñ ha ki lum ka Samaria, bad kito kiba thung ïa ki kin ïoh bam ïa kaei kaba ki bri sohwaiñ kin pynmih.

⁶ Ho-oid, ka por kan wan haba ki nongap kin khot ha ki lum ka Ephraim, ‘Ïa ngin ïaleit haduh Seïon, sha U Trai U Blei jong ngi.’ ”

⁷ U Trai u ong, “To rwai da ka jingkmen na ka bynta ki Israel, kiba khraw tam na ki jaitbynriew. To rwai ïa ka jingrwai jong ka jingïaroh jong phi, ‘U Trai u la pynim ïa la ki briew; u la pyllait im ïa baroh kiba dang sah.’

⁸ Ngan wallam ïa ki na shaphang shatei bad ngan lumlang ïa ki na kiba kut ka pyrthei. Kiba matlah bad kiba dkoh kin wan lang bad ki, ki kynthei ba la armet bad kito ki ban sa kha. Kin sa long pat ka jaitbynriew kaba khraw.

⁹ Ki briew jong nga kin wan phai da kaba ïam, da kaba duwai katba nga ïalam ban wan phai pat. Ngan ïalam ïa ki sha ki wahduid, ha ka lynti kaba beit ha kaba kin ym jynthut. Nga long kum u kpa ïa ki Israel, bad u Ephraim u long u khun banyngkong eh jong nga.”

¹⁰ U Trai u ong, “Ko ki jaitbynriew, to shahshkor ïa nga, bad to pynbna ïa ki ktien jong nga shaduh ki rud duriaw kiba jngai. Nga la pynsakma ïa ki briew jong nga, hynrei ngan lumlang ïa ki bad ïada ïa ki kumba u nongaplangbrot u ïada ïa la ka kynhun langbrot.

¹¹ Nga la pyllaitluid ïa ki paid Israel bad pynim ïa ki na ka hima bakhrawbor.

¹² Kin wan bad rwai da ka jingkmen ha u lum Seïon bad kin kmen ha ki jingai sngewbha jong nga — ki jingai sngewbha da u kew bad ka waiñ bad ka umphniang Olib, ki jingai sngewbha da ki langbrot bad ki masi. Kin long kum ka kper bad la ai um bha; kin don baroh kat kaba ki donkam.

¹³ Nangta ki samla kynthei kin shad bad kin kmen, bad ki shynrang, kiba samla bad kiba tymmen, kin shadkmen. Ngan pyntngen ïa ki bad pynkylla ïa ka jingïambriew sha ka jingkmen, ïa ka jingsngewsih jong ki sha ka jingsngewbha.

¹⁴ Ngan pyndap ïa ki lyngdoh da ki jingbam kiba bang eh bad pynhun ïa baroh ki jingdonkam jong ki briew jong nga. Ma nga, U Trai, nga la kren.”

Ka jingisynei U Trai ïa ki Israel

¹⁵ U Trai u ong, “La ïohsngew ïa ka jingsawa ha Ramah, ka jingsawa jong ka jingïam kthang. Ka Rakhel ka ïam namar ki khun jong ka; ki la ïap noh, bad kam treh ba yn pyntngen ïa ka.

¹⁶ To sngap noh na ka jingïam jong phi bad to ñiad noh ïa ki ummat jong phi. Baroh kiba phi la leh na ka bynta ki khun jong phi kin ym long lehnoh-ei; kin wan phai pat na ka ri u nongshun.

¹⁷ Ka don ka jingkyrmen na ka bynta ka lawei jong phi; ki khun jong phi kin wan phai pat sha la ka ri. Ma nga, U Trai, nga la kren.

¹⁸ “Nga ïohsngew ïa ki paid Israel ba ki ong ha ka jingsngewsih, ‘A Trai, ngi la long kum u mrad uba khlem shah hikai, hynrei me la hikai ïa ngi ban kohnguh. To wallam pat ïa ngi; ngi long kiba la kloi ban wan phai pat sha me, U Trai U Blei jong ngi.

¹⁹ Ngi la phai dien noh na me, hynrei shen ngi la kwah ban wan phai pat. Hadien ba me la pynshitom ïa ngi, ngi la pyndem ïa la ki khlieh ha ka jingsngewsih. Ngi la sngewlehrain bad jahburom, namar ngi la leh pop mynba ngi dang samla.’

²⁰ “Ko Israel, phi long u khun ba-ieit eh jong nga, u khun uba nga ieit tam. Man ba nga ong ïa ka kyrteng jong phi, nga pyrkhat shaphang jong phi da ka jingieit. Ka dohnud jong nga ka leit sha phi; ngan isynei ïa phi.

²¹ To pynïeng ki jingkdew lynti bad pruid dak ha ka surok; to wad biang ïa ka lynti kaba phi la iehnoh. To wan phai biang, ko phi ki paid Israel, to wan sha la ka ri, sha ki shnong kiba phi la iehnoh.

²² Haduh katno phin pynslem, ko ki briew bym don jingngeit? Nga la thaw kaei kaei kaba thymmai bad kaba pher, kaba pher kum ka briew kaba ïada ïa u briew.”

Ka lawei kaba roi kyrhai jong ki briew U Blei

²³ U Trai Badonbor baroh, U Blei ki Israel, u ong, “Haba ngan wallam pat ïa ki briew sha ka ri jong ki, sa shisien pat kin ong ha ka ri Judah bad ki shnong jong ka, “ ‘To U Trai un kyrkhu ïa u lum bakyntang jong ka Jerusalem, ka jaka bakhuid ha kaba u shong.’

²⁴ Ki briew kin shong kin sah ha Judah bad ha baroh ki shnong jong ka, bad kin don ki nongrep, bad ki nongap langbrot ryngkat bad ki kynhun langbrot jong ki.

²⁵ Ngan pynthymmai bor ïa kito kiba la thait bad pynhun da ka jingbam ïa baroh kiba la tlot na ka jingthngan.

²⁶ Kumta te, ki briew kin ong, ‘Nga la leit thiah bad nga la kyndit ha ka jingthymmai bor.’

²⁷ “Ma nga, U Trai, nga ong ba ka por kan wan haba ngan pyndap ïa ka ri Israel bad Judah da ki briew bad ki mrad.

²⁸ Bad kumba nga la ïaleh shitom ban rat noh, ban pyntwa, ban jop, ban pynjot bad ban pynpra ïa ki, kumta ruh ngan ïaleh shitom ban thung ïa ki bad ban tei pat ïa ki.

²⁹ Haba kata ka por kan wan, ki briew kin ym ong shuh, “ ‘Ki kmie ki kpa ki la bam ïa u sohwaiñ bajew, hynrei ki khun ki ïoh ïa ka jingmad kaba jew.’

³⁰ Pynban, uno uno uba bam ïa ki sohwaiñ kiba jew kan pynlong ba ki bniat jong u hi kin shyrkhei; bad uwei uwei baroh un ïap namar ki pop jong u hi.”

³¹ U Trai u ong, “Ka por kan poi haba ngan sa pynlong ïa ka jutang bathymmai bad ki paid Israel bad ki paid Judah.

³² Kan ym long kum ka jutang barim kaba nga la pynlong bad ki kpa tymmen jong ki mynba nga la shim ïa ki da la ka kti bad ïalam ïa ki na ka ri Ijipt. Wat la nga la long kum u tnga ïa ki, kim shym la bat ïa kata ka jutang.

³³ Ka jutang bathymmai kaba ngan pynlong bad ki paid Israel kan long kane: Ngan buh ïa ka aiñ jong nga hapoh jong ki bad thoh ïa ka ha ki dohnud jong ki. Ngan long U Blei jong ki, bad kin long ki briew jong nga.

³⁴ Yn ym don uwei ruh na ki u ban hap hikai ïa la u para ri ban tip ïa U Trai, namar baroh kin tip ïa nga, naduh uba rit tam haduh uba khraw tam. Ngan map ïa ki pop jong ki bad ngan ym kynmaw shuh ïa ki jingbakla jong ki. Ma nga, U Trai, nga la kren.”

³⁵ U Trai u pynbiang ïa ka sngi ban pynshai mynsngi, ïa u bnai bad ki khlur ban pynshai mynmiet. U pynkhih ïa ka duriaw bad pynlong ïa ka ban kyrhuh; ka kyrteng jong u ka long U Trai Badonbor Baroh.

³⁶ U kular ba katba ka jingbuh ryntih ïa ka mariang ka dang neh, kumta ruh ki Israel kin long ka jaitbynriew.

³⁷ Lada ha kawei ka sngi ïa ka suiñbneng la lah ban thew bad ïa ki nongrim ka pyrthei la ïitbniah, tang kata hi ka ban pynlong ba un kyntait ïa ki paid Israel namar baroh kaba ki la leh. U Trai u la kren.

³⁸ “Ka por kan poi,” ong U Trai, “haba ïa ka Jerusalem baroh kawei yn tei pat kum ka nongbah jong nga, naduh u Mot Hananel shaphang sepngi haduh ka Khyrdop Kyndong.

³⁹ Bad u pud un bteng nangta na sepngi shaduh u lum Gareb bad nangta sawdong sha Goah.

⁴⁰ Ka them baroh kawei, ha kaba la tep ïa kiba ïap bad ha kaba la bret ïa ki jakhlia, bad baroh ki pyntha shaneng ka wah Kidron haduh ka Khyrdop Kulai shaphang mihngi, kin long kiba kyntang ha nga. Ka nongbah kan ym shah pynpra shuh lane shah pynjot.”