JEREMAÏAH 30 - Khasi CL Bible (BSI)

Ki jingkular jong U Trai ïa ki briew jong u

¹ U Trai, U Blei ki Israel,

² u la ong ha nga: “To thoh ha ka kitab ïa kaei kaei baroh kaba nga la ong ha me,

³ namar ka por ka wan haba ngan pynneh pat ïa ki briew jong nga, ki Israel bad Judah. Ngan wallam pat ïa ki sha ka ri kaba nga la ai ha ki kpa tymmen jong ki, bad kin shim kynti biang ïa ka. Ma nga, U Trai, nga la kren.”

⁴ U Trai u ong ha ki briew jong ka Israel bad Judah:

⁵ “Nga la ïohsngew ka jinglynñiar ka jingsngewtriem, ka jinglynñiar ka jingtieng bad ym ka jingsuk.

⁶ Mynta to sangeh bad pyrkhat! Hato u briew u lah ban kha khun? Te balei keiñ ba nga ïohi ïa uwei pa uwei u briew ba u buh ïa la ka kti ha la ka kpoh kum ka kynthei ha ka jingsuh kha? Balei uwei pa uwei baroh u blad rong?

⁷ Ka sngi kaba shyrkhei ka wan; ym don kano kano kawei pat ka sngi kaba lah ban nujor bad ka — ka por ka jingnoh mynsiem na ka bynta ki briew jong nga, hynrei kin lait im.”

⁸ U Trai Badonbor Baroh u ong: “Haba kata ka sngi ka wan, ngan pynkheiñ ïa ka lyngkor kaba don sawdong ka ryndang jong ki bad ngan weng ïa ki kynjri jong ki, bad kin ym long shuh ki mraw jong ki nongwei.

⁹ Pynban, kin shakri ïa nga, U Trai U Blei jong ki, bad ïa uba hiarpateng na u Dabid, uba ngan pynshong ha ka khet kum u syiem.

¹⁰ “Ko ki briew jong nga, wat ym sheptieng; ko ki paid Israel, wat ym sngewshyrkhei. Ngan pyllait im ïa phi na kata ka ri bajngai, na ka ri ha kaba phi long ki koidi. Phin wan phai pat sha ïing bad im ha ka jingsuk; phin shngain, bad yn ym don mano mano ban pynsheptieng ïa phi.

¹¹ Ngan wan sha phi bad pyllait im ïa phi. Ngan pynjot ïa ki jaitbynriew baroh sha kiba nga la pynsakma ïa phi, hynrei ngan ym pynjot ïa phi. Ngan ym shah ïa phi ban leit khlem shah pynshitom; hynrei haba nga pynshitom ïa phi, ngan long u bym leh shiliang. Ma nga, U Trai, nga la kren.”

¹² U Trai u ong ha ki briew jong u, “Ki jingmong jong phi ki long ki bym lah ban koit, ïa ki jingmynsaw jong phi ym lah ban pynkhiah.

¹³ Ym don mano mano ba sumar ïa phi, ym don jingïarap na ka bynta ki prum jong phi, ym don jingkyrmen ban koit na ka bynta jong phi.

¹⁴ Baroh ki nongleh-ieit jong phi ki la klet noh ïa phi; kim salia shuh ïa phi. Nga la tur ïaleh ïa phi kum u nongshun; ka jingshah pynshitom jong phi ka la long kaba eh namar ki pop jong phi ki long kiba bun bad ka jingbymman jong phi ka long kaba khraw.

¹⁵ Wat ujor shuh shaphang ki jingmynsaw jong phi; ym don kano kano ka jingpynkoit ïa phi. Nga la pynshitom ïa phi kumne namar ki pop jong phi ki long kiba bun bad ka jingbymman jong phi ka long kaba khraw.

¹⁶ Hynrei mynta, baroh kiba klun ïa phi kin shah klun, bad ïa baroh ki nongshun jong phi yn rah noh kum ki koidi. Ïa baroh kiba banbeiñ ïa phi yn banbeiñ, bad ïa baroh kiba lute ïa phi yn lute.

¹⁷ Ngan pynkoit pat ïa phi; ngan pynkhiah ïa ki jingmong jong phi, la ki nongshun jong phi ki ong, ‘Ka Seïon ka dei kaba shah kyntait; ym don mano mano ba salia ïa ka.’ Ma nga, U Trai, nga la kren.”

¹⁸ U Trai u ong, “Ngan buh pat ïa ki briew jong nga ha ka ri jong ki bad ngan isynei ïa kawei pa kawei ka longïing; ïa ka Jerusalem yn tei pat, bad ïa ka ïingsyiem jong ka yn pynbha pat.

¹⁹ Ki briew kiba sah hangta kin rwai ïaroh; kin pyrta jam da ka jingkmen. Da ka jingkyrkhu jong nga kin roi ha ka jingbun paid; ka jingkyrkhu jong nga kan wallam ha ki ka burom.

²⁰ Ngan pynïoh pat ïa ka bor mynbarim jong ka jaitbynriew bad pynskhem biang ïa ka; ngan pynshitom ïa baroh kiba banbeiñ ïa ki.

^21-22 U nongsynshar jong ki un wan na ka jaitbynriew jong ki hi, u khun syiem jong ki napdeng ki briew jong ki hi. Un wan sha nga haba nga khot sngewbha ïa u, namar uei uba nud ban wan khlem shah khot sngewbha? Kin long ki briew jong nga, bad ngan long U Blei jong ki. Ma nga, U Trai, nga la kren.”

^23-24 Ka jingbitar jong U Trai ka long ka 'erïong, ka lyer kaba jur eh ka ban beh kyrthep nalor ki khlieh jong ki bymman. Kan ym kut tad ynda u la pyndep ïa baroh kaba u thmu ban leh. Ha ki sngi ki ban wan ki briew kin shemphang kdar ïa kane.