JEREMAÏAH 3 - Khasi CL Bible (BSI)

Ki Israel ki bymïaineh

¹ U Trai u ong, “Lada u briew u pyllait noh ïa la ka tnga, bad ka iehnoh ïa u bad ka long noh ka tnga jong uwei pat u briew, um dei ban shim pat ïa ka. Kane kan pyntngit lut ïa ka ri. Hynrei, ko Israel, pha la lah don shibun ki nongleh-ieit, bad mynta pha kwah ban wan phai sha nga!

² Khmih shatei halor ki kliar lum. Hato don kano kano ka jaka ha kaba pham shym la leh kum ka nuti? Pha la ap ïa ki nongleh-ieit shi lynter ka rud surok, kumba u Arab u apthap ha ka ri shyiap. Pha la pyntngit ïa ka ri da ka jingleh nuti jong pha.

³ Dei kata keiñ balei ba la bat noh ïa u slap, bad u slap pyrem um shym la wan. Pha la da i syriem hi kum ka nuti; pham don kano kano ka jinglehrain.

⁴ “Bad mynta pha ong ha nga, ‘Me long u kpa jong nga, bad me la ieit ïa nga naduh ba nga dang khunlung.

⁵ Men ym ïai bitar; men ym khih bitar ïa nga shi junom.’ Ko Israel kata ka dei kaei kaba pha la ong, hynrei pha la leh ïa ka jingsniew kat kaba pha lah.”

Ka Israel bad ka Judah ki dei ban kylla-kaba-mut

⁶ Mynba u Josaïah u long syiem, U Trai u la ong ha nga, “Hato me la ïohi ïa kaei ba ka Israel, kata ka kynthei bymïaineh, ka la leh? Ka la phai lyndet noh na nga, bad halor uwei pa uwei u lum bajrong bad hapoh uwei pa uwei u dieng bajyrngam, ka la leh kum ka nuti.

⁷ Nga la pyrkhat ba hadien ba ka la leh ïa kane baroh, da kaba thikna kan sa wan phai pat sha nga. Hynrei kam shym wan phai, bad ka Judah ka para bymïaineh jong ka, ka la ïohi ïa kata baroh.

⁸ Ka Judah ka la ïohi ba nga la pyllait tnga ïa ka Israel bad phah noh ïa ka namar ba ka la phai noh na nga bad ka la kylla long ka nuti. Hynrei ka Judah, ka para bymïaineh jong ka Israel, kam shym sheptieng. Ma ka ruh ka la kylla long ka nuti

⁹ bad kam shym lehrain satia. Ka la pyntngit ïa ka ri, bad ka la leh awria da kaba mane ïa ki maw bad ki dieng.

¹⁰ Bad hadien kane baroh, ka Judah, ka para bymïaineh jong ka Israel, ka la shu leh mynleh ban wan phai sha nga, kam shym da mut shisha. Ma nga U Trai, nga la kren.”

¹¹ Nangta U Trai u la ong ha nga ba wat la ka Israel ka la phai noh na u, ka la lah pynshisha ba ka long kaba kham bha ban ïa ka Judah ka bymïaineh.

¹² U la bthah ïa nga ban leit bad ong ha ka Israel, “Ko Israel bymïaineh, to wan pat sha nga. Nga long uba dap da ka jingisynei bad ngan ym bitar; ngan ym bitar ïa pha shi junom.

¹³ Shu pdiang ba pha la bakla bad ba pha la ïeng ïaleh pyrshah ïa U Trai, U Blei jong pha. To phla ba hapoh uwei pa uwei u dieng bajyrngam pha la ai ïa la ka jingieit ha ki blei nongwei bad ba pham shym la kohnguh ïa ki hukum jong nga. Ma nga, U Trai, nga la kren.

¹⁴ “Ko ki briew bymïaineh, to wan noh; phi long ki jong nga. Ngan shim iwei na phi na kawei kawei ka shnong bad ar ngut na kawei kawei ka kur, bad ngan wallam pat ïa phi sha u lum Seïon.

¹⁵ Ngan ai ha phi ki nongsynshar ki ban kohnguh ïa nga, bad kin synshar ïa phi da ka jingstad bad ka jingshemphang.

¹⁶ Nangta haba phi la ïaroi bun ha kata ka ri, ki briew kin ym ïakren shuh shaphang ka Synduk ka Jutang jong nga. Kin ym pyrkhat shuh shaphang jong ka lane kynmaw ïa ka; kin ym donkam shuh ïa ka, lymne kin ym shna sa kawei pat.

¹⁷ Haba kata ka por ka wan, ïa ka Jerusalem yn khot, ‘Ka Khet ka jong U Trai,’ bad baroh ki jaitbynriew kin ïalumlang hangta ban mane ïa nga. Kin ym leh shuh ïa kaei ba ka dohnud ba-mutlop bad basniew jong ki ka ong.

¹⁸ Ka Israel kan ïasoh bad ka Judah, bad ryngkat lang kin ïawan na ka jingshah ringmraw ha ka ri kaba shatei bad kin wan phai sha ka ri kaba nga la ai ha ki kpa tymmen jong phi kum ka jingdon jingem kaba neh.”

Ka jingmane bleithaw ki briew jong U Blei

¹⁹ U Trai u ong, “Ko Israel, nga la kwah ban pdiang ïa pha kum u khun jong nga bad ai ha pha ïa ka ri kaba pynkmen, ka ri kaba itynnat tam ha ka pyrthei baroh kawei. Nga la kwah ïa pha ban khot pa ïa nga bad ban ym phai shuh da lei lei na nga.

²⁰ Hynrei kum ka tnga ka bymïaineh, pham shym la ïaineh ha nga. Ma nga, U Trai, nga la kren.”

²¹ La ïohsngew ïa ka jingsawa halor ki kliar lum: ki dei ki paid Israel kiba ïam bad ïasaid, namar ba ki la im ka jingim ba-dap da ka pop bad ba ki la klet ïa U Trai U Blei jong ki.

²² To wan phai, phi baroh kiba la phai lyndet na U Trai; un pynkhiah ïa phi bad un pynlong ïa phi kiba ïaineh. Phi ong, “Ho-oid, ngi wan sha U Trai, namar u dei U Blei jong ngi.

²³ Ngim shym la ïoh jingïarap ei ei da ka jingmane jong ngi ka bym dei ïa me halor ki kliar lum. Ka jingïarap ïa ki Israel ka wan tang na U Trai U Blei jong ngi.

²⁴ Hynrei ka jingmane ïa u Baal, u blei ka jinglehrain, ka la pynlong ïa ngi ban duh ïa ki kynhun langbrot bad kynhun masi, ïa ki khun shynrang bad ki khun kynthei — kiei kiei baroh kiba ki kpa tymmen jong ngi ki la trei naduh ki por mynbarim.

²⁵ Ngi dei ban shah ha ka jinglehrain bad ai ba ka jingjahburom kan tap ïa ngi. Ma ngi bad ki kpa tymmen jong ngi, ngi la ïai leh pop pyrshah ïa U Trai U Blei jong ngi; ngim shym la kohnguh ïa ki hukum jong u.”