JEREMAÏAH 29 - Khasi CL Bible (BSI)

Ka shithi jong u Jeremaïah sha ki Jiw ha Babilonia

¹ Nga la thoh ka shithi sha ki lyngdoh, ki nongïathuhlypa, ki nongïalam jong ki paidbah bad sha baroh kiwei pat kiba u Nebukhadnessar u la rah kum ki koidi na Jerusalem sha Babilonia.

² Nga la thoh ïa ka hadien ba u syiem Jehoïakhin, ka kmie jong u, ki rangbah synshar ha ka ïingsyiem, ki nongïalam jong ka Judah bad Jerusalem, ki nong-ohdur, bad ki nongtrei batbit ki la shah ringmraw.

³ Nga la ai ïa ka shithi ha u Elasah u khun jong u Shaphan bad ha u Gemaraïah u khun jong u Hilkaïah, ïa uba u Sedekaïah u syiem ka Judah u phah sha u Nebukhadnessar u syiem ka Babilonia. Ka ong:

⁴ “U Trai Badonbor Baroh, U Blei ki Israel, u ong ha kito ki briew baroh kiba u la shah ïa u Nebukhadnessar ban rah noh kum ki koidi na Jerusalem sha Babilonia:

⁵ ‘Tei ïa ki ïing bad shongduh. Thaw ki kper bad bam ïa kaei kaba phi thung hangta.

⁶ To ïashongkurim bad to ïoh ki khun ki kti. Nangta shah ïa ki khun ki kti jong phi ban shongkurim, ba kumta ma ki ruh kin don ki khun ki kti. Phi dei ban roi ha ka jingbun briew bad ym ban duna.

⁷ Trei na ka bynta ka jingbha jong ki nongbah sha kaba nga la pynlong ïa phi ban leit kum ki koidi. Duwai sha nga na ka bynta jong ki, namar lada ki manbha, phi ruh phin manbha.

⁸ Ma nga, U Trai, U Blei ki Israel, nga maham ïa phi ban ym shah ïa lade ban shah shukor ha ki nongïathuhlypa kiba im hapdeng jong phi lane da kino kino kiwei pat kiba kam ba ki lah ban ïathuh lypa ïa ka lawei. Wat ym pynleit jingmut satia ïa ki jingphohsniew jong ki.

⁹ Ki ïathuh ki jinglamler ïa phi ha ka kyrteng jong nga. Ngam shym phah ïa ki. Ma nga, U Trai Badonbor Baroh, nga la kren.’

¹⁰ “U Trai u ong, ‘Haba ki hynñiewphew snem jong ka Babilonia ki la kut, ngan pyn-i ïa ka jingsngewkhia jong nga na ka bynta jong phi bad bat ïa ka kular jong nga ban wallam pat ïa phi sha ïing.

¹¹ Tang ma nga hi nga tip ïa ki jingthmu kiba nga don na ka bynta jong phi, ki jingthmu ban wallam ha phi ka jingmanbha bad ym ka jingpynjot, ki jingthmu ban wallam ïa ka lawei kaba phi ap kyrmen.

¹² Nangta phin khot kyrpad ïa nga. Phin wan bad duwai ha nga, bad ngan jubab ïa phi.

¹³ Phin wad ïa nga, bad phin shem ïa nga namar ba phin wad ïa nga da ka dohnud jong phi baroh.

¹⁴ Ho-oid, nga ong, phin shem ïa nga, bad ngan buh pat ïa phi ha ka ri jong phi hi. Ngan lumlang ïa phi na kawei pa kawei ka ri bad na kawei ka jaka sha kaba nga la pynsakma ïa phi, bad ngan wallam pat ïa phi sha ka ri na kaba nga la phah noh ïa phi sha ka jingshah ringmraw. Ma nga, U Trai, nga la kren.’

¹⁵ “Phi ong ba U Trai u la ai ïa ki nongïathuhlypa ha phi ha Babilonia.

¹⁶ Pynshahshkor ïa kaei kaba U Trai u ong shaphang u syiem uba synshar ïa ka hima kaba u Dabid u la synshar bad shaphang ki briew jong kane ka nongbah, kata, ki ba-ha-ïing ha-sem jong phi ki bym shym la shah rah noh kum ki koidi lem bad phi.

¹⁷ U Trai Badonbor Baroh u ong, ‘Nga wallam ka thma, ka jingïapthngan, bad ka jingpang ha ki, bad ngan pynlong ïa ki kum ki soh Dumbur kiba la pyut eh ïa ka ban bam.

¹⁸ Ngan beh kthong ïa ki da ka thma, ka jingïapthngan, bad ka jingpang, bad baroh ki jaitbynriew jong ka pyrthei kin sngewtriem ha kaei kaba ki ïohi. Kylleng kylleng nga pynsakma ïa ki, ki briew kin kyndit bad sngewshyrkhei ha kaei kaba la jia ha ki. Ki briew kin krenbeiñ ïa ki bad pyndonkam ïa ki kyrteng jong ki kum ka jingtim.

¹⁹ Kane kan jia ha ki namar kim shym la kohnguh ïa ka khubor kaba nga ju ïai phah sha ki lyngba ki nongïathuhlypa, ki shakri jong nga. Ki la kyntait ban shahshkor.

²⁰ Ma phi baroh kiba nga la phah sha ka jinglongmraw ha Babilonia, to shahshkor ïa kaei kaba ma nga, U Trai, nga ong.’

²¹ “U Trai Badonbor Baroh, U Blei ki Israel, u la kren shaphang u Ahab u khun jong u Kolaïah bad u Sedekaïah u khun jong u Maaseïah, kiba ïathuh ki jinglamler ha ka kyrteng jong U. U la ong ba un aiti ïa ki ha ka bor jong u Nebukhadnessar u syiem ka Babilonia, u ban pynïap ïa ki ha khmat jong phi.

²² Haba ki briew kiba la shah rah noh kum ki koidi na Jerusalem sha Babilonia ki kwah ban wallam ka jingtim hano hano, kin ong, ‘To U Trai un ñiew ïa phi kum u Sedekaïah bad u Ahab, kiba u syiem ka Babilonia u la syang im!’

²³ Kane kan long ka kupar jong ki namar ki la shah rem na ki pop bashyrkhei — ki la leh awria bad ki la ïathuh ki jinglamler ha ka kyrteng jong U Trai. Kane ka long pyrshah ïa ka mon ka jong U Trai; u tip ïa kaei kaba ki la leh, bad u long u sakhi pyrshah ïa ki. U Trai u la kren.”

Ka shithi jong u Shemaïah

^24-25 U Trai Badonbor Baroh, U Blei ki Israel, u la ai ha nga ka khubor na ka bynta u Shemaïah jong ka Nehelam, uba la phah ka shithi ha ka kyrteng jong u hi sha baroh ki briew jong ka Jerusalem bad sha u Sephanaïah, u lyngdoh u khun jong u Maaseïah bad sha baroh kiwei pat ki lyngdoh. Ha kane ka shithi, u Shemaïah u la thoh sha u Sephanaïah:

²⁶ “U Trai u la pynlong ïa phi u lyngdoh ha ka jaka jong u Jehoïada, bad mynta phi long u rangbah pynïaidkam ha ka Templ. Ka dei ka kamram jong phi ban khmih ba ïa uwei pa uwei u riewlamwir uba leh mynleh ba u long u nongïathuhlypa dei ban buh ha ki kynjri lem bad u jingdeng ryndang uba da ka nar.

²⁷ Balei phim shym leh ïa kane ha u Jeremaïah jong ka Anathoth, uba la kren kum u nongïathuhlypa sha ki briew?

²⁸ Dei ban pynsangeh ïa u namar u la ong ïa ki briew ha Babilonia ba kin long ki koidi slem bah hangta bad ba kin tei ïa ki ïing, kin shongduh, kin thaw ki kper, bad bam ïa kaei kaba ki thung.”

²⁹ U Sephanaïah u pule ïa ka shithi ha nga,

³⁰ bad nangta U Trai u la bthah ïa nga

^31-32 ban phah sha ki koidi baroh ha Babilon ïa kane ka khubor shaphang u Shemaïah: “Ma nga, U Trai, ngan pynshitom ïa u Shemaïah bad ïa ki khun ki ksiew jong u baroh. Ngam shym la phah ïa u, hynrei u la kren ha phi kumba u la long u nongïathuhlypa, bad la pynlong ïa phi ban ngeit ïa ki jinglamler. Un ym don kino kino ki khun ki ksiew hapdeng jong phi. Un ym im ban ïohi ïa kiei kiei kiba bha kiba ngan leh na ka bynta ki briew jong nga, namar u la ong ïa ki ban ïeng ïaleh pyrshah ïa nga. Ma nga, U Trai, nga la kren.”