JEREMAÏAH 28 - Khasi CL Bible (BSI)

U Jeremaïah bad u Hananaïah u nongïathuhlypa

¹ Ha kata kajuh ka snem, ha u bnai uba san jong ka snem kaba saw ba u Sedekaïah u long syiem, u Hananaïah u khun jong u Assur, u nongïathuhlypa na ka shnong Gibeon, u la kren ha nga ha ka Templ. Ha ka jingdon ryngkat jong ki lyngdoh bad ki paidbah u la ong ïa nga

² ba U Trai Badonbor Baroh, U Blei ki Israel, u la lah ong: “Nga la pynkheiñ ïa ka bor jong u syiem ka Babilonia.

³ Hapoh ar snem ngan wallam pat sha kane ka jaka ïa baroh ki jingkynshew ka Templ kaba u syiem Nebukhadnessar u la rah sha Babilonia.

⁴ Ngan wallam pat ruh ïa u syiem ka Judah, u Jehoïakhin u khun jong u Jehoïakim, lem bad ki briew baroh jong ka Judah kiba la leit sha ka jinglongmraw ha Babilonia. Ho-oid, ngan pynkheiñ ïa ka bor jong u syiem ka Babilonia. Ma nga, U Trai, nga la kren.”

⁵ Nangta ha ka jingdon ryngkat jong ki lyngdoh bad jong ki briew baroh kiba la ïeng ha ka Templ, nga la ong ha u Hananaïah:

⁶ “Kaba phylla! Nga kyrmen U Trai un leh ïa kane! Nga da kyrmen shisha un pynlong ïa ka jingïathuhlypa jong phi ban urlong shisha bad un wallam pat na Babilonia ïa baroh ki jingkynshew ka Templ bad ïa ki briew baroh kiba la shah ïalam noh kum ki koidi.

⁷ Hynrei to shahshkor ïa kaei kaba nga ong ha phi bad ha ki paidbah.

⁸ Ki nongïathuhlypa kiba la kren slem bah mynshuwa, ha shuwa ka por jong nga bad jong phi, ki la ïathuhlypa shaphang kata ka thma, ka jingïapthngan, bad ïa ka jingpang ki ban wan ha ki jaitbynriew babun bad ha ki hima bakhrawbor.

⁹ Hynrei ïa u nongïathuhlypa uba ïathuh lypa ïa ka jingsuk lah ban ithuh ïa u kum u nongïathuhlypa uba U Trai u la phah shisha haba ki jingïathuhlypa jong uta u nongïathuhlypa kin urlong shisha.”

¹⁰ Nangta u Hananaïah u la loit ïa ka lyngkor na u ryndang jong nga, u la pynkheiñ lyngkhot ïa ka,

¹¹ bad u la ong ha ka jingdon ryngkat jong ki briew baroh: “U Trai u la ong ba kane ka dei kumno ba un pynkheiñ ïa ka lyngkor kaba u syiem Nebukhadnessar u la buh halor ka ryndang jong ki jaitbynriew baroh; bad un leh ïa kane hapoh ar snem.” Nangta nga la leit noh.

¹² Katto katne por hadien kane, U Trai u la bthah ïa nga

¹³ ban leit bad ong ha u Hananaïah: “U Trai u la ong ba me lah ban pynkheiñ ïa ka lyngkor dieng, hynrei un bujli ïa ka da ka lyngkor nar.

¹⁴ U Trai Badonbor Baroh, U Blei ki Israel, u la ong ba un buh ka lyngkor nar halor kine ki jaitbynriew baroh bad ba kin shakri ïa u syiem Nebukhadnessar jong ka Babilonia. U Trai u la ong ba un pynlong wat ïa ki mradkhlaw ban shakri ïa u Nebukhadnessar.”

¹⁵ Nangta nga la ong ïa kane ha u Hananaïah, bad nga la bynrap, “To shahshkor, ko Hananaïah! U Trai um shym la phah ïa me, bad la pynlong ïa kine ki briew ban ngeit ïa ka lamler.

¹⁶ Bad kumta U Trai hi u ong ba un weng noh ïa me. Ha shuwa ban kut kane ka snem men ïap namar me la ong ïa ki briew ban ïeng ïaleh pyrshah ïa U Trai.”

¹⁷ Bad u Hananaïah u la ïap ha u bnai bahynñiew jong kata kajuh ka snem.