JEREMAÏAH 27 - Khasi CL Bible (BSI)

U Jeremaïah u pyndait ïa ka lyngkor u masi dab

¹ Shen hadien ba u Sedekaïah u khun jong u Josaïah u long u syiem ka Judah, U Trai u la ong ha nga

² ban shna ïa lade ka lyngkor da ki tyllai snieh bad ki dieng jingphna bad ban buh ïa ka ha u ryndang jong nga.

³ Nangta U Trai u la bthah ïa nga ban phah ka khubor sha ki syiem jong ka Edom, ka Moab, ka Ammon, ka Tyros, bad ka Sidon lyngba ki nongkit 'tiensyiem jong ki, kiba lah wan sha Jerusalem ban jngoh ïa u syiem Sedekaïah.

⁴ U Trai Badonbor Baroh, U Blei ka Israel, u la bthah ïa nga ban hukum ïa ki ban ïathuh ïa ki syiem jong ki ba U Trai u la lah ong:

⁵ “Da ka bor bakhraw bad ka jingkhlaiñ jong nga, nga la thaw ïa ka pyrthei, ïa u khunbynriew, bad ïa baroh ki mrad kiba im ha ka khyndew; bad nga ai ïa ka ha uno uno uba nga jied.

⁶ Nga long uta uba la buh ïa kine ki jaitbynriew baroh hapoh ka bor jong u shakri jong nga, u Nebukhadnessar u syiem ka Babilonia, bad nga la pynlong wat ïa ki mradkhlaw ban shakri ïa u.

⁷ Baroh ki jaitbynriew kin shakri ïa u, bad kin shakri ïa u khun bad u khun ksiew jong u tad haduh ba ka por kan wan ïa ka hima jong u hi ban kyllon. Te ka jaitbynriew jong u kan shakri ïa ki jaitbynriew badonbor bad ïa ki syiem bakhraw.

⁸ “Hynrei lada kano kano ka jaitbynriew lane ka hima kam pyndem ha ka jingsynshar jong u, te ngan pynshitom ïa kata ka jaitbynriew da ka thma, ka jingïapthngan bad da ka jingpang tad haduh ba ngan da shah ïa u Nebukhadnessar ban pynjot khoit ïa ka.

⁹ Wat shahshkor ïa ki nongïathuhlypa jong phi lane ïa uno uno uba kam ba u lah ban ïathuh lypa ïa la lawei, la ka long da ki jingphohsniew lane da kaba khot ïa ki mynsiem jong kiba ïap lane da ka myntor. Ma ki baroh kim ong ïa phi ban pyndem ha u syiem jong ka Babilonia.

¹⁰ Ki da shukor ïa phi bad kin pynlong ïa phi ban shah rah sha jngai na ka ri jong phi. Ngan beh noh shabar ïa phi, bad ïa phi yn pynjot noh.

¹¹ Hynrei lada kano kano ka jaitbynriew ka pyndem ha u syiem ka Babilonia bad shakri ïa u, te ngan shah ïa ka ba kan shong ha la ka ri, ban rep ïa ka bad shong hangta. Ma nga, U Trai, nga la kren.”

¹² Nga la ong ïa kajuh ha u syiem Sedekaïah jong ka Judah. “Pyndem ha u syiem jong ka Babilonia. Shakri ïa u bad ïa ki briew jong u, bad phin im.

¹³ Balei ba ma phi bad ki briew jong phi phin ïap ha ka thma lane ha ka jingïapthngan lane ha ka jingpang? Kata ka dei kaei kaba U Trai u la ong ba kan jia ïa kano kano ka jaitbynriew ka bym pyndem ha u syiem ka Babilonia.

¹⁴ Wat shahshkor ïa ki nongïathuhlypa kiba ong ïa phi ban ym pyndem ha u. Ki shukor ïa phi.

¹⁵ U Trai hi u la ong ba um shym phah ïa ki bad ba ki lamler ïa phi ha ka kyrteng jong u. Bad kumta un beh noh ïa phi, bad ïa phi yn pynïap, ïa phi bad ki nongïathuhlypa kiba ïathuh ïa phi ïa kine ki jinglamler.”

¹⁶ Nangta nga la ong ïa ki lyngdoh bad ïa ki paidbah ba U Trai u la lah ong: “Wat shahshkor ïa ki nongïathuhlypa kiba ong ba ïa ki jingkynshew ka Templ yn sa wanrah pat shen shen na Babilonia. Ki shukor ïa phi.

¹⁷ Wat shahshkor ïa ki! Pyndem ha u syiem ka Babilonia bad phin im! Balei ba kane ka nongbah kan kylla ka kynton ki jingpra?

¹⁸ Lada ki dei da shisha ki nongïathuhlypa bad lada ki don ïa ka khubor jong nga, shah ïa ki ban kylli ïa nga, U Trai Badonbor Baroh, ban ym shah ïa ki jingkynshew kiba don ha ka Templ bad ha ka ïingsyiem ban shah rah sha Babilonia.

^19-20 (Mynba u syiem Nebukhadnessar u la rah sha Babilonia ïa u syiem ka Judah, u Jehoïakhin u khun jong u Jehoïakim, bad ïa ki rangbah bapawkhmat jong ka Judah bad Jerusalem, u la iehnoh ïa ki rishot, ka dabor tama, ki kali tan, bad katto katne tylli kiwei pat ki jingkynshew ka Templ.)

²¹ “To shahshkor ïa kaei kaba ma nga, U Trai Badonbor Baroh, U Blei ka Israel, nga ong shaphang ki jingkynshew kiba la iehnoh hapoh ka Templ bad hapoh ka ïingsyiem ha Jerusalem:

²² Yn sa rah ïa ki sha Babilonia bad kin sah hangta tad haduh ba ngan da phai ka jingmut jong nga sha ki. Nangta ngan wallam pat ïa ki bad buh biang ïa ki ha kane ka jaka. Ma nga, U Trai, nga la kren.”