JEREMAÏAH 26 - Khasi CL Bible (BSI)

La wallam ïa u Jeremaïah sha ka jingbishar

¹ Shen shen hadien ba u Jehoïakim u khun jong u Josaïah u long u syiem ka Judah,

² U Trai u la ong ha nga, “To ïeng ha ka ïingbishar jong ka Templ bad to pynbna ïa baroh kaba nga la hukum ïa me ban ong ha ki briew kiba wan na ki shnong jong ka Judah ban mane hangta. Wat ym iehnoh ei ei ruh em.

³ Lehse ki briew kin shahshkor bad iehnoh ïa la ki lynti basniew. Lada ki leh kumta, te ngan kylla ïa la ka jingmut shaphang ka jingpynjot kaba nga la thmu ban wallam halor jong ki na ka bynta ki kam bymman jong ki.”

⁴ U Trai u la bthah ïa nga ban ong ha ki briew, “Ma nga, U Trai, nga la ong ba phi dei ban kohnguh ïa nga da kaba bud ïa ka jinghikai kaba nga la ai ha phi,

⁵ bad da kaba pynshahshkor ïa ki kyntien jong ki nongïathuhlypa, ki shakri jong nga, kiba nga la ju ïai phah sha phi. Phim pat ju kohnguh ïa kaei kaba ki la ong.

⁶ Lada phi ïai bteng ban ym kohnguh, te ngan leh ïa kane ka Templ ïa kaei kaba nga la leh ïa ka Shiloh, bad baroh ki jaitbynriew jong ka pyrthei kin pyndonkam ïa ka kyrteng jong kane ka nongbah kum ka jingtim.”

⁷ Ki lyngdoh, ki nongïathuhlypa, bad baroh ki briew ki la ïohsngew ba nga ong ïa kine kiei kiei ha ka Templ,

⁸ bad hamar ba nga la pyndep ïa baroh kaba U Trai u la hukum ïa nga ban kren, ki la kem ïa nga bad pyrta, “Me dei ban shah pynïap namar kane!

⁹ Balei ba me la kren ha ka kyrteng jong U Trai ba kane ka Templ kan long kum ka Shiloh bad ba ïa kane ka nongbah yn pynjot bad yn ym don bashong ba sah hangta?” Nangta ki briew ki ïalum sawdong ïa nga.

¹⁰ Haba ki nongïalam jong ka Judah ki la ïohsngew ïa kaei kaba lah jia, ki la wan kloi na ka ïingsyiem sha ka Templ bad ki la shong ha ka Khyrdop Bathymmai.

¹¹ Nangta ki lyngdoh bad ki nongïathuhlypa ki la ong ha ki nongïalam bad ha ki briew, “Une u briew u dei hok ban shah pynrem ban ïap namar ba u kren pyrshah ïa ka nongbah jong ngi. Phi la ïohsngew ïa u da la ki jong ki shkor.”

¹² Nangta nga la ong, “U Trai u la phah ïa nga ban pynbna ïa kaei kaei baroh kaba phi la ïohsngew ïa nga ba nga kren pyrshah ïa kane ka Templ bad pyrshah ïa kane ka nongbah.

¹³ Phi dei ban pynkylla ïa ka rukom kaba phi im bad ïa kiei kiei baroh kiba phi leh, bad phi dei ban kohnguh ïa U Trai U Blei jong phi. Lada phi leh kumta, un kylla ïa la ka jingmut na ka jingpynjot kaba u la ong ba un wallam halor jong phi.

¹⁴ Ha kaba ïadei bad nga, nga don ha ka bor jong phi! To leh ïa nga ïa kano kano kaba phi pyrkhat ba ka long kaba biang bad kaba dei.

¹⁵ Hynrei to tip skhem ïa kane: Lada phi pynïap ïa nga, ma phi bad ki briew jong kane ka nongbah phin long kiba la rem ha kaba pynïap ïa u briew uba lui lui namar u dei U Trai uba la phah ïa nga ban ai ha phi ïa kane ka jingmaham.”

¹⁶ Nangta ki nongïalam bad ki paidbah ki ong ha ki lyngdoh bad ki nongïathuhlypa, “Une u briew u la kren ha ngi ha ka kyrteng jong U Trai U Blei jong ngi; um dei ban shah pynïap.”

¹⁷ Hadien kata, katto katne ngut na ki tymmen ki san ki la ïeng joit bad ki ong ha ki paidbah kiba la ïalumlang,

¹⁸ “Mynba u Hesekaïah u long u syiem ka Judah, u Mikah u nongïathuhlypa na Moresheth u la bthah ïa baroh ki briew ba U Trai Badonbor Baroh u la lah ong, “ ‘Ïa ka Seïon yn lur kum ka lyngkha, ka Jerusalem kan kylla ka kynton ki jingpra, bad u lum ka Templ un kylla khlaw.’

¹⁹ U syiem Hesekaïah bad ki briew jong ka Judah kim shym la pynïap ïa u Mikah. Pynban, u Hesekaïah u la pyndonburom ïa U Trai bad u la pyrshang ban pynïoh ïa ka jingsngewbha jong u. Bad U Trai u la kylla ïa la ka jingmut na ka jingpynjot kaba u la ong ba un wallam ha ki. Mynta ngi la jan wallam ka jingpynjot bashyrkhei halor jong ngi hi.”

²⁰ (La don uwei pat u briew, u Uriah u khun jong u Shemaïah na Kiriath Jearim, uba la kren ha ka kyrteng jong U Trai pyrshah ïa kane ka nongbah bad ka jaitbynriew kumba u Jeremaïah u la leh.

²¹ Haba u syiem Jehoïakim bad ki shipai bad ki rangbah synshar jong u ki la ïohsngew ïa kaei kaba u Uriah u la lah ong, u syiem u la pyrshang ban phah pynïap ïa u. Hynrei u Uriah u la ïohsngew shaphang kata; kumta u la phet ha ka jingsngewtriem bad u la lait phet sha Ijipt.

²² U syiem Jehoïakim, pynban, u la phah ïa u Elnathan u khun jong u Akhbor bad katto katne ngut kiwei pat ki rangbah sha Ijipt ban wallam ïa u Uriah.

²³ Ki la wallam pat ïa u sha u syiem Jehoïakim, uba la phah pynïap ïa u bad ïa ka met jong u la bret sha ka jaka tep paidbah.)

²⁴ Hynrei namar ba nga la ïoh ïa ka jingkyrshan jong u Ahikam u khun jong u Shaphan, ym shym la aiti ïa nga ha ki briew bad shah pynïap.