JEREMAÏAH 25 - Khasi CL Bible (BSI)

U nongshun uba na Shatei

¹ Ha ka snem kaba saw ba u Jehoïakim u khun jong u Josaïah u long u syiem ka Judah, nga la ïohpdiang ïa ka khubor na U Trai shaphang ki briew ka Judah baroh. (Kane ka long ka snem kaba nyngkong ba u Nebukhadnessar u la long u syiem ka Babilonia.)

² Nga la kren ha baroh ki briew ka Judah bad ka Jerusalem,

³ “La arphew lai snem, naduh ka snem kaba khatlai ba u Josaïah u khun jong u Amon u la long u syiem ka Judah, haduh kane ka sngi hi, U Trai u la kren ha nga, bad nga la ïai pynsngew ha phi man ka por, hynrei phim shym la pynleit jingmut.

⁴ Wat la U Trai u ïai phah sha phi ïa ki shakri jong u ki nongïathuhlypa, pynban phim shym la sngap ne patiaw ei ei.

⁵ Ki la ïa-ong ïa phi ban phai noh na ka lynti ka jingim bymman jong phi bad na kiei kiei kiba sniew ba phi leh, khnang ba phi lah ban leit ban ïoh shong ha kata ka ri ba U Trai u la ai ha phi bad ha ki kpa tymmen jong phi kum ka jingïohkynti baneh.

⁶ Ki ong ïa phi ban ym mane bad shakri ïa kiwei pat ki blei bad ban ym pynlong ïa U Trai ban bitar da kaba mane ïa ki bleithaw kiba phi la thaw. Lada phi la kohnguh ïa U Trai, te un ym pynshitom ïa phi.

⁷ Hynrei U Trai da lade hi u ong ba phi la kyntait ban shahshkor ïa u. Pynban, phi la pynbitar ïa u da ki bleithaw jong phi bad phi la wallam ïa ka jingpynshitom jong u ha phi hi.

⁸ “Kumta te, namar ba phim shym la shahshkor ïa u, U Trai Badonbor Baroh u ong,

⁹ ‘Ngan sa phah ïa ki jaitbynriew baroh na shatei bad ïa u shakri jong nga, u Nebukhadnessar u syiem ka Babilonia. Ngan wanrah ïa ki ban ïaleh pyrshah ïa ka Judah bad ïa ki nongshong shnong jong ka, bad pyrshah ïa ki jaitbynriew baroh kiba shong marjan bad ka. Ngan pynduh khoit ïa kane ka jaitbynriew bad ki paramarjan jong ka bad ngan sa ieh ïa ki ha ka jingjot junom, kaei kaei kaba ishyrkhei bad kaba pynkyndit ban peit. Ma nga, U Trai, nga la kren.

¹⁰ Ngan pynsngap jar ïa ki jingkyang ka jingkmen bad ïa ka jinglehkmen bad ïa ka sur ïaleh sngewbha ha ki jingkhawai shongkurim. Kin ym don umphniang ïa ki sharak jong ki, bad kin ym don shuh ïa u kew.

¹¹ Ka ri baroh kawei kan sa shah iehnoh ha ka jingjot bad ka jinglong ba sngewkyndit, bad ki jaitbynriew ba-marjan kin shakri ïa u syiem ka Babilonia hynñiewphew snem.

¹² Hadien kata ngan sa pynshitom ïa ka Babilonia bad ïa u syiem jong ka namar ka pop jong ki. Ngan pynjot ïa kata ka ri bad ngan iehnoh ha ka jingjot jingpra junom.

¹³ Ngan sa pynshitom ïa ka Babilonia da baroh ki jingjynjar kiba nga la byrngem ban wanrah ha ki ri kiba nga la kren da u Jeremaïah — baroh ki jingjynjar ba la thoh ha kane ka kitab.

¹⁴ Ngan sa siew pat ïa ki Babilonia ïa kaei kaba ki la leh, bad shibun ki ri bad ki syiem kiba khraw kin pynlong mraw ïa ki.’ ”

Ka jingbishar U Blei ïa ki jaitbynriew

¹⁵ U Trai, U Blei ki Israel, u la ong ha nga, “Kane ka long ka khuri waiñ kaba la pyndap da ka jingbitar jong nga. Rah ïa ka sha ki jaitbynriew baroh sha kiba ngan phah ïa me, bad ai ïa ki ban dih na ka.

¹⁶ Ynda ki dih ïa ka, kin sa ïaid sheng sheng bad kin ïaid lamwir namar ka thma kaba ngan phah pyrshah ïa ki.”

¹⁷ Kumta nga la shim ïa ka khuri na ka kti U Trai, nga ai dih ïa ka ha ki jaitbynriew baroh sha kiba U Trai u la phah ïa nga, bad la pynlong ïa ki ban dih na ka.

¹⁸ Ïa ka Jerusalem bad ki shnong baroh jong ka Judah, lem bad ki syiem bad ki nongïalam jong ka, la pynlong ïa ki ban dih na ka, khnang ba kin kylla long ka ri shyiap, ka jaka kaba ishyrkhei bad pynkyndit ban peit; bad khnang ba ki briew kin pyndonkam ïa ki kyrteng jong ki kum ka jingtim — katba ki dang ïai leh.

^19-26 Kane ka long ka thup kyrteng jong baroh kiwei pat kiba hap ban dih na ka khuri: u syiem ka Ijipt, ki rangbah synshar jong u, bad ki nongïalam; baroh ki nong Ijipt bad baroh ki nongwei ha Ijipt; baroh ki syiem jong ka ri Us; baroh ki syiem jong ki nongbah ki Philistia, ka Ashkelon, ka Gasa, ka Ekron, bad kaba sah na ka Ashdod; baroh ki briew jong ka Edom, Moab, bad Ammon; baroh ki syiem ka Tyros bad ka Sidon; baroh ki syiem jong ki ri ka rud duriaw Mediterranian; ki nongbah ka Dedan, ka Tema, bad ka Bus; baroh ki briew kiba ot lyngkot ïa u shñiuh jong ki; baroh ki syiem Arabia; baroh ki syiem jong ki jaitbynriew kiba shong ha ri shyiap; baroh ki syiem Simri, Elam bad ki syiem Media; baroh ki syiem kiba shaphang shatei, kiba jan bad kiba jngai, uwei hadien uwei pat. Kawei pa kawei ka jaitbynriew ha sla pyrthei ka dei ban dih na ka. Khatduh eh, u syiem ka Babilonia un dih na ka.

²⁷ Te U Trai u la ong ha nga, “Ïathuh ha ki briew ba ma nga, U Trai Badonbor Baroh, U Blei ki Israel, nga hukum ïa ki ban dih haduh ban da buaid bad ban prie, haduh ba kin da kyllon bad kim lah khie shuh, namar ka thma ba nga phah pyrshah ïa ki.

²⁸ Bad lada ki kyntait ban shim ïa ka khuri na ka kti jong me bad dih na ka, te men ong ha ki ba U Trai Badonbor Baroh u ong ba ki dang dei ban dih na ka.

²⁹ Ngan sdang ïa ka kam jingpynjot jong nga na la ka jong ka nongbah hi. Hato ki pyrkhat ba kin lait khlem shah pynshitom? Em, kin shah pynshitom, namar ngan sa phah ïa ka thma ha ki jaitbynriew ka pyrthei baroh. Ma nga, U Trai Badonbor Baroh, nga la kren.

³⁰ “Ma me, ko Jeremaïah, me dei ban pynbna ïa baroh kaba nga la ong. Me dei ban ïathuh ha kine ki briew, “ ‘U Trai un kyrhuh na bneng, bad un kyrhuh pyrthat na ki bynta bajrong ka bneng; un sa kyrhuh pyrshah ïa la ki briew; un kyang kum u briew uba ïuh ïa ki sohwaiñ. Uwei pa uwei ha ka pyrthei un ïohsngew ïa u, bad ka jingsawa kan sawa shaduh kiba kut ka pyrthei.

³¹ U Trai un tian bishar pyrshah ïa ki jaitbynriew; un wallam ïa ki briew baroh ha ka jingbishar, bad ïa kiba bymman un pynïap, U Trai u la kren.’ ”

³² U Trai Badonbor Baroh u ong ba ka jingpynjot kan wan ha ka jaitbynriew kawei hadien kawei pat, bad ka 'erïong kaba jur kan ïalumlang haduh kiba kut jong ka pyrthei.

³³ Ha kata ka sngi ki met jong kito ïa kiba U Trai u la pynïap kin saphriang na bakut sha bakut ka pyrthei. Yn ym don ba ïambriew ïa ki, bad yn ym don ba shim noh bad tep; kin sah ha khyndew kum ki kynton sboh.

³⁴ To ïam, ko phi ki nongïalam, phi ki nongsharai jong ki briew jong nga, to kyang jam! To ïambriew bad tyllun halor u pui pui. Ka por ka la poi na ka bynta jong phi ban shah pynïap, bad yn sa ot doh ïa phi kum ïa ki langbrot shynrang.

³⁵ Yn ym don lad ïa phi ban lait im.

^36-37 Phi ud bad ïam ha ka jingsngewsih namar U Trai ha ka jingbitar jong u, u la pynjot ïa ka jaitbynriew jong phi bad un iehnoh ïa ka ri basuk jong phi ha ki jingjot jingpra.

³⁸ U Trai u la iehnoh ïa la ki briew kum u sing uba iehnoh ïa la ka krem. Ki jingshyrkhei ka thma bad ka jingbitar shla U Trai ki la pynkylla ïa ka ri sha ka ri shyiap.