JEREMAÏAH 24 - Khasi CL Bible (BSI)

Ar shang ki soh Dumbur

¹ U Trai u pyn-i ha nga ar shang ki soh Dumbur ba la buh ha khmat ka Templ. (Kane ka long hadien ba u Nebukhadnessar u syiem ka Babilonia u la ringmraw ïa u Jehoïakhin, u syiem ka Judah, u khun jong u Jehoïakim, kum u koidi na Jerusalem, lem bad ki nongïalam ka Judah, ki nongtrei dieng, bad ki nongtrei batbit.)

² Ka shang kaba nyngkong ka don ki soh Dumbur kiba bha, kito kiba ih kham kloi; kawei pat ka don ki soh Dumbur kiba pyut, ki bym long bam shuh.

³ Te U Trai u la ong ha nga, “Ko Jeremaïah, me ïohi aïu?” Nga jubab, “Ki soh Dumbur. Kiwei kiba bha ki da bha shisha, bad kiwei kiba sniew ki da sniew shisha, haduh ba ym long bam shuh.”

⁴ Kumta U Trai u la ong ha nga;

⁵ “Ma nga, U Trai, U Blei ki Israel, nga pyrkhat ba ki briew kiba la ringmraw sha Babilonia ki long kum kine ki soh Dumbur kiba bha, ngan lehbha ïa ki da ka jingsbun.

⁶ Ngan khmih halor jong ki bad ngan wallam biang ïa ki sha kane ka ri. Ngan tei bha ïa ki bad ngan ym tar lyngkhot ïa ki; ngan thung ïa ki bad ngan ym rat ïa ki.

⁷ Ngan ai ha ki ïa ka jingangnud ban tip ba nga long U Trai. Te ki kin long ki briew jong nga, bad nga ngan long U Blei jong ki, namar kin phai pat sha nga da ka dohnud jong ki baroh.

⁸ “Te ïa u Sedekaïah u syiem ka Judah, ïa ki nongsaiñ hima sawdong jong u, ïa kiba sah na ki briew ka Jerusalem kiba dang sah ha kane ka ri, ne kynriah sha ri Ijipt — ma nga, U Trai ngan leh ïa ki baroh kum ïa kine ki soh Dumbur kiba da sniew shisha ki bym long bam shuh.

⁹ Ngan sa pynngat ha ki ka jinglanot ha kaba ki jaitbynriew ka pyrthei baroh kin da sngewshyrkhei, ki briew kin rkhiebeiñ ïa ki; kin ïakren kai ïa ki, kin ïakynshi ïa ki, bad kin pyndonkam ïa ka kyrteng jong ki kum ka jingtim kylleng kat shaba nga pynsakma ïa ki.

¹⁰ Ngan wanlam ïa ka thma, ïa ka 'nemsniew, bad ïa ka jingïapthngan halor jong ki haduh ba yn ym don shuh wat uwei ruh na ki u ban lait ha kata ka ri ba nga la ai ha ki bad ha ki kpa tymmen jong ki.”