JEREMAÏAH 23 - Khasi CL Bible (BSI)

Ka jingkyrmen na ka bynta ka Lawei

¹ Katno ka long kaba shyrkhei ka jingbishar U Trai ïa kita ki nongsynshar kiba pynjot bad pynsakma ïa ki briew jong u!

² Kane ka long kaei ba U Trai, U Blei ki Israel, u ong shaphang ki nongsynshar kiba la tharai ba kin sumar ïa ki briew jong u: “Phim shym la sumar bha ïa ki briew jong nga; phi la pynsakma ïa ki bad phi la beh noh ïa ki. Mynta ngan pynshitom ïa phi namar ka jingbymman jong phi kaba phi la leh.

³ Ngan lum ïa kiba sah na ki briew jong nga na ki ri kiba nga la pynsakma ïa ki, bad ngan wallam pat ïa ki sha la ka jong ka ri. Kin ïoh bun ki khun bad kin nang roi ha ka jingbun briew.

⁴ Ngan thung ïa ki nongsynshar ki ban sumar ïa ki. Ki briew jong nga kin ym sheptieng ne sngewshyrkhei, bad ngan ym pynshitom shuh ïa ki. Ma nga, U Trai, nga la kren.”

⁵ U Trai u ong, “Ka por kan wan haba ngan jied kum u syiem ïa uba hiarpateng na u Dabid uba hok. Uta syiem u ban synshar da ka jingstad, bad u ban leh ïa kaei kaba dei bad kaba hok ha kylleng ka ri.

⁶ Haba u long syiem, ki paid Judah kin shongshngain bad ki paid Israel kin im ha ka jingsuk. Yn khot ïa u, ‘U Trai ka jingpynim jong ngi.’

⁷ “Ka por kan wan”, ong U Trai, “haba ki briew kin ym smai shuh da nga kum U Blei uba im uba la wallam ïa u paid Israel na ka ri Ijipt.

⁸ Pynban, kin smai da nga kum U Blei uba im uba la wallam ïa u paid Israel na ka ri kaba shatei bad na kiwei pat ki ri baroh sha kiba nga la pynsakma ïa ki. Te kin sa ïoh shong ha la ka jong ka ri.”

Ka khubor u Jeremaïah shaphang ki Nongïathuhlypa.

⁹ Ka dohnud jong nga ka la lwet, bad nga la khynñiuh. Namar jong U Trai, namar ki ktien kiba khuid jong u, ba nga la long kum u briew uba buaid u briew uba la dih bun eh ka waiñ.

¹⁰ Ka ri ka jyllei da ki briew ki bymïaineh ha U Trai; ki im ka jingim bymman bad pyndonkam bakla ïa la ka bor. Namar ka jingtim U Trai, ka ri ka ïamkthang, bad ki jaka phlang ki tyrkhong.

¹¹ U Trai u ong, “Ki nongïathuhlypa bad ki lyngdoh ki long ki bymriewblei; nga la lap ïa ki ba ki leh bymman ha ka Templ hi.

¹² Ki lynti ïaid ba ki bud kin long kiba btuit bad kiba dum; ngan pynlong ïa ki ba kin jynthut bad kin kyllon. Ngan wallam ka jingpynjot ha ki; ka por ka jingpynshitom ïa ki ka la nang wan, ma nga, U Trai, nga la kren.

¹³ Nga la ïohi ïa ka pop jong ki nongïathuhlypa ka Samaria ki la kren ha ka kyrteng u Baal bad ki la ïalam bakla ïa ki briew jong nga.

¹⁴ Hynrei ha ki nongïathuhlypa ka Jerusalem nga la ïohi ba ki leh kaba kham sniew: ki klim bad ki kren lamler; ki pynshlur ïa ki briew ban leh ïa ka bymdei, kumta ba ym don ba sangeh noh ïa kaei kaba sniew. Ha nga, ki long baroh kiba sniew kum ki briew ka Sodom, bad ka Gomorrah.

¹⁵ “Kumta te, kane ka long kaei kaba ma nga, U Trai Badonbor Baroh, nga ong shaphang ki nongïathuhlypa ka Jerusalem: “Ngan ai ïa ki da ki jhur kthang ban bam, bad ka bih ba kin dih; namar ba ki la pynsaphriang ïa ka jingbymriewblei kylleng ka ri.”

¹⁶ U Trai Badonbor Baroh u ong ha ki briew ka Jerusalem: “Wat sngap ïa kaei kaba ki nongïathuhlypa ki ong; ki pyndap ïa phi da ki jingkyrmen bymshisha. Ki ïathuh ïa phi ïa kaei kaba ki shu mutdur bad ym ïa kaei kaba nga la ong.

¹⁷ Ha ki briew kiba kyntait ban sngap ïa kaei kaba nga la ong, ki ïai-ong ba baroh ka long bha bad ki. Bad ki ïathuh ïa uwei uwei baroh uba mutlop ba ka jingjot kan ym ktah ïa u.”

¹⁸ Nga la ong, “Ym don na kine ki Nongïathuhlypa uba tip ïa ki jingpyrkhat barieh jong U Trai. Ym don na ki uba la ju ïohsngew ne sngewthuh ïa ka khubor jong U ne uba la ju shahshkor ne pynleit jingmut ïa kaei kaba U ong.

¹⁹ Ka jingbitar jong U ka long ka 'erïong, ka 'erlangthari ka ban khih bitar halor ki khlieh jong ki bymman,

²⁰ bad kan ym kut haduh ba un da leh ïa baroh kaba U thmu ban leh. Ha ki sngi ki ban wan ki briew jong U kin sa sngewthuh shai ïa kane.”

²¹ U Trai u ong, “Ngam shym la phah ïa kine ki nongïathuhlypa, hynrei wat la katta ki leit la ka leit. Ngam shym la ai kano kano ka khubor ha ki, hynrei pynban ki kren ha ka kyrteng jong nga.

²² Lada ki la tip ïa ki jingmut barieh jong nga, te kin jin da la pynbna ïa ka khubor jong nga sha ki briew jong nga, bad kin jin da la pynlong ïa ki ban iehnoh ïa ki jingim basniew ba ki im bad na ki kam bymman ba ki leh.

²³ “Nga long U Blei uba don ha ki jaka baroh bad ym tang ha kawei ka jaka.

²⁴ Ym don uba lah ban rieh ha kaba ngam lah ban ïohi ïa u. Hato phim tip ba nga don ha ki jaka baroh ha bneng bad ha khyndew?

²⁵ Nga tip aïu kito ki nongïathuhlypa ki la ong, ki da kren lamler ha ka kyrteng jong nga bad kam ba nga la ai ha ki ïa ki khubor jong nga ha ki jingphohsniew jong ki.

²⁶ Slem haduh katno kita ki nongïathuhlypa kin ïalam bakla ïa ki briew jong nga da ki jinglamler kiba ki shu thaw?

²⁷ Ki pyrkhat ba ki jingphohsniew ba ki ïathuh kin pynlong ïa ki briew jong nga ban klet ïa nga, kumba ki kpa jong ki, ki la klet ïa nga bad phai sha u Baal.

²⁸ U nongïathuhlypa uba ïoh ka jingphohsniew u dei ban ong ïa ka ba ka long tang ka jingphohsniew, hynrei u nongïathuhlypa uba la ïohsngew ïa ka khubor jong nga u dei ban pynbna hok ïa kata ka khubor. Kaei ka jingbha u jyntang ban ïanujor bad u kew?

²⁹ Ka khubor jong nga ka long kum ka ding, bad kum u tyrnem uba pynpait lyngkhot ïa ki mawsiang.

³⁰ Nga pyrshah ïa kito ki nongïathuhlypa kiba shim ktien uwei na uwei bad pynbna ïa ki kum ka khubor jong nga.

³¹ Nga pyrshah ruh ïa ki nongïathuhlypa kiba kren ïa la ki jong ki ktien bad kiba kam ba ki wan na nga.

³² To sngew ïa kaei kaba ma nga, U Trai, nga ong! Nga long pyrshah ïa kito ki nongïathuhlypa kiba ïathuh ïa la ki jingphohsniew kiba dap da ki jinglamler. Ki ïathuh ïa kine ki jingphohsniew bad ïalam bakla ïa ki briew jong nga da ka jinglamler bad ka jingsngewmeng jong ki. Ngam shym la phah ne hukum ïa ki ban leit, bad kim shym la long satia ka jingïarap ïa ki briew. Ma nga, U Trai, nga la kren.”

Ka jingkit U Trai

³³ U Trai u la ong ïa nga, “Ko Jeremaïah, haba uwei na ki briew jong nga ne u nongïathuhlypa ne u lyngdoh u kylli ïa me, ‘Kaei ka khubor jong U Trai?’ Men ïathuh ha u, ‘Me long ka jingkit ïa U Trai, bad un sa kynther noh ïa me.’

³⁴ Lada uwei na ki briew jong nga ne u nongïathuhlypa ne u lyngdoh wat la u pyndonkam ïa ki ktien, ‘Ka jingkit U Trai,’ ngan pynshitom ïa u bad ïa ka longïing jong u.

³⁵ Pynban, uwei pa uwei un kylli ïa la ki paralok bad ki ba-ha-ïing ha-sem jong u, ‘Kaei ka jubab kaba U Trai u la ai? Kaei kaba U Trai u la kren?’

³⁶ Kumta kim dei shuh ban pyndonkam ïa ki ktien, ‘Ka jingkit U Trai,’ namar lada uno uno u leh kumta, ngan pynlong ïa ka khubor jong nga ka jingkit kaba khia shisha ïa u. Ki briew ki la pynkylla khongpong ïa ki ktien U Blei jong ki, U Blei uba im, U Trai Badonbor Baroh.

³⁷ Ko Jeremaïah, kylli ïa ki nongïathuhlypa, ‘Kaei kaba U Trai u la jubab ïa phi? Kaei kaba U Trai u la kren?’

³⁸ Bad lada kim kohnguh ïa ka hukum jong nga bad pyndonkam ïa ki ktien, ‘Ka jingkit U Trai,’

³⁹ te ïathuh ïa ki ba da shisha ngan shim trait ïa ki, bad ngan bret noh ïa ki sha jngai na nga, ïa ki bad ïa ka nongbah kaba nga la ai ha ki bad ha ki kpa tymmen jong ki.

⁴⁰ Ngan sa wanrah ha ki ïa ka jinglehrain bad ka jingjahburom junom ïa kaba yn ym klet shuh.”