JEREMAÏAH 22 - Khasi CL Bible (BSI)

Ka khubor U Jeremaïah ïa ka ïingsyiem Judah

^1-2 U Trai u ong ïa nga ban leit sha ka ïing u syiem Judah, u khun jong u ksiew jong u Dabid, bad kren hangta ïa u syiem, ïa ki rangbah synshar bad ïa ki briew jong ka Jerusalem ban shahshkor ïa kaei kaba U Trai u la ong:

³ “Ma nga, U Trai, nga hukum ïa phi ban leh ïa kaei kaba hok bad kaba beit. Ïada ïa u briew uba shah thok na uta uba shukor ïa u. Wat lehbeiñ ne banbeiñ ïa ki nongwei, ki khunswet, ne ki riewkynthei, bad wat pynïap ïa ki briew kiba lui lui ha kane ka jaka kaba khuid.

⁴ Lada phi leh shisha kumba nga la hukum, te ki khun ki ksiew u Dabid kin ïailong syiem. Bad ma ki, lem bad ki rangbah synshar jong ki bad ki briew jong ki, kin ïai bteng ban ïaid lyngba ïa ki khyrdop jong kane ka ïingsyiem ha ki kali ïapom bad halor ki kulai.

⁵ Hynrei lada phim kohnguh ïa ki hukum jong nga, te nga smai ha phi ba kane ka ïingsyiem kan ngat ha ki jingjot. Ma nga, U Trai, nga la kren.

⁶ “Ha nga, ka ïingsyiem Judah ka long kaba itynnat kum ka ri Gilead, bad kum ki lumbah Lebanon; hynrei ngan pynlong ïa ka, ka jaka kynjah ha kaba yn ym don bashong basah.

⁷ Ngan phah ïa ki briew ban pynjot ïa ka. Ki baroh kin wanrah ïa la ki sdie, kin pynngat ïa ki dieng Kedar kiba itynnat bad kin bret ïa ki ha ka ding.

⁸ “Hadien nangta, bun ki jaitbynriew nongwei kin ïaid lynti bad kin ïakylli uwei ïa uwei pat balei ba nga, U Trai nga la leh katne katne ïa kane ka nongbah kaba khraw.

⁹ Te kin jubab ba ka long namar ba phi la lyndet ïa ka jutang jong phi bad nga, U Blei jong phi, bad phi la mane bad shakri ïa kiwei pat ki blei.”

Ka khubor U Jeremaïah shaphang u Joahas

¹⁰ Ko ki paid Judah, wat ïam na ka bynta u syiem Josaïah, wat ïam pangnud ïa ka jingïap jong u. Hynrei ïamkthang na ka bynta u Joahas, u khun jong u; ki la rah noh ïa u bad un ym wan phai shuh, un ym ïohi shuh ïa ka ri ha kaba la kha ïa u.

¹¹ U Trai u ong shaphang u Joahas, u khun jong u Josaïah, uba mih bujli ïa u kpa jong u kum u syiem ka Judah, “U la leit noh nangne, un ym wan phai shuh.

¹² Un ïap ha ka ri sha kaba ki la rah ïa u, bad un ym ïohi shuh ïa kane ka ri.”

Ka khubor u Jeremaïah shaphang u Jehoïakim

¹³ Long ba la tim ïa u briew uba tei ïa la ka ïing da ka jingbymhok, bad uba pynheh pynïar ïa ka da ka jingleh bymhok; uba pynlong ïa la ki para shnong ban trei khlem nong, bad u bym siew bainong ïa ki.

¹⁴ Kordit ïa u briew uba ong, “Ngan tei ïa lade ka ïing paki dulan bad ki kamra kiba kylluid shajrong ki mala.” Kumta u buh ki jingkhangïit ha ka ïing jong u, bad u shna biar da ki dieng Kedar, bad u airong ïa ka da ka rong saw.

¹⁵ Hato ka pynlong ïa me u syiem uba kham bha lada me tei ki ïing da ki dieng Kedar kiba kham kynsai ban ïa kito ki jong kiwei? U kpa jong me u la im kyrhai, u long borabor uba hok bad uba leh beit, bad u manbha ha kiei kiei baroh ba u la leh.

¹⁶ U bishar hok ïa kiba duk, bad baroh ki ïaid beit bad u. Kata ka long ka jingmut ban ithuh ïa U Trai.

¹⁷ Hynrei me lah ban ïohi tang ïa la ki jingmyntoi shimet; me pynïap ïa kiba lui lui, bad me banbeiñ tyngeh ïa la ki briew. U Trai u la kren.

¹⁸ Kumta te, U Trai u ong kumne shaphang u Jehoïakim u khun jong u Josaïah, u syiem ka Judah, “Yn ym don ba ïambriew ha ka jingïap jong u lane ba ong, ‘A katno kaba shyrkhei, ko paralok jong nga, A katno kaba shyrkhei!’ Yn ym don mano mano ba ïam sngewsih ïa u lane uba kyang, ‘A ko Kynrad jong nga!’ ‘A ko syiem jong nga!’

¹⁹ Yn tep ïa u kumba tep ïa u kada, un sa shah ring bad bret ïa u shabar ki khyrdop ka Jerusalem.”

Ka khubor u Jeremaïah ïa kaei ka ban sa jia ïa ka Jerusalem

²⁰ Ko phi ki briew ka Jerusalem, khie leit sha Lebanon bad pyrta jam, khie leit sha ka ri Bashan bad to kyang; pyrta na ki lumbah ka Moab, namar baroh kiba ïateh lok bad phi ki la shahjop.

²¹ U Trai u la kren ha phi mynba phi dang manbha, hynrei phi kyntait ban shahshkor. Kata ka long kaei kaba phi leh shi lynter ka jingim jong phi, phim ju treh ban kohnguh ïa U Trai.

²² Ïa ki nongïalam jong phi yn rong noh da ka lyer, kiba ïateh lok bad phi kin shah ring kum ki mraw ka thma; ïa ka nongbah jong phi yn pynjahburom bad shah pynlehrain namar ki kam bymman baroh kiba phi la leh.

²³ Phi shong sngewskhem hapdeng ki dieng Kedar ba wanrah na Lebanon; hynrei katno kaba sngewsynei ynda wan ka jingshitom ha phi, bad phin ud haba ka jingsuh kan lap ïa phi, ki jingshitom kum kito ki jong ka kynthei kaba suh kha.

Ka jingbishar U Blei ïa u Jehoïakhin

²⁴ U Trai u la ong ha u syiem Jehoïakhin, u khun jong u Jehoïakim u syiem ka Judah, “Kumba da shisha nga long U Blei Uba im. Wat la me long kum ka sati muhor ha ka kti kamon jong nga, ngan weng noh ïa me,

²⁵ bad ngan ai ïa me ha ki briew ïa kiba me sheptieng, ki briew kiba kwah ban pynïap ïa me. Ngan ai ïa me ha u Nebukhadnessar u syiem ka Babilonia bad ha ki shipai jong u.

²⁶ Ngan sa bret ïa me bad ïa ka kmie jong me sha ka jinglongmraw. Men leit sha ka ri ha kaba ym shym la kha ïa me, bad hangta phin ïap baroh ar ngut.

²⁷ Men thrang ban ïohi ïa kane ka ri sa shisien pat, hynrei men ym ïoh wan phai shuh.”

²⁸ Nga la ong, “Hato u syiem Jehoïakhin u la kylla long kum u khra uba la pait uba la bret noh bad u bym don ba kwah shuh mano mano? Hato ka long kata balei ba ma u bad ïa ki khun jong u la ringmraw sha ka ri kaba kim tip ei ei?”

²⁹ Ko ka ri, ko ka ri, ko ka ri! to shahshkor ïa kaei kaba U Trai u la ong;

³⁰ “Ïa une u briew la pynrem ba un duh noh ïa la ki khun, Un long u briew u ban ym jop shuh. Un ym don ki khun ki ksiew jong u ki ban synshar ha Judah kum ki nonghiarpateng u Dabid. Ma nga, U Trai, nga la kren.”