JEREMAÏAH 21 - Khasi CL Bible (BSI)

La ïathuh lypa shaphang ka jingshahjop ka Jerusalem

¹ U Sedekaïah u syiem ka Judah u la phah ïa u Pashhur, u khun jong u Malkhaïah, bad ïa u Sephanaïah u lyngdoh, u khun jong u Maaseïah, sha nga lem bad kane ka jingkyrpad:

² “Sngewbha ban kren ha U Trai na ka bynta jong ngi, namar u Nebukhadnessar u syiem ka Babilonia bad ka kynhun shipai jong u ki la wan kerkut ïa ka nongbah. Lehse U Trai un leh kawei na ki kambah jong u na ka bynta jong ngi, bad un pynbor ïa u Nebukhadnessar ba un kynran dien noh.”

³ Te U Trai u la kren ha nga, bad nga la ïathuh ha ki rangbah kiba la phah sha nga ban ïathuh ha u Sedekaïah ba U Trai, U Blei ki Israel u la ong,

⁴ “Ko Sedekaïah, ngan jop ïa ka kynhun shipai jong me kaba ïaleh pyrshah ïa u syiem ka Babilonia bad ki shipai jong u. Ngan kynton ïa ki tiar ïapom jong ki shipai jong me hamar pdeng jong ka nongbah.

⁵ Ngan ïaleh pyrshah ïa me da ka borbah jong nga baroh, da ka jingdom jong nga, da ka jingbitar shla jong nga, bad da ka jingingkhong khait jong nga.

⁶ Ngan pynïap ïa uwei pa uwei uba shong ha kane ka nongbah; ki briew bad ki mrad kumjuh; kin ïap da ka khlam kaba shyrkhei.

⁷ Hynrei na ka bynta jong phi, ki rangbah synshar jong phi bad ki briew kiba lait im na ka thma, ka khlam bad ka 'nemsniew — ngan ai ïa baroh na phi ban shahjop ha u syiem Nebukhadnessar bad da ki nongshun jong phi, kiba kwah ban pynïap ïa phi. U Nebukhadnessar un phah pynïap ïa phi. Un ym pynsah ïano ïano na phi lane un ym isynei lane sngewlem ïano ïano na phi. Ma nga, U Trai, nga la kren.”

⁸ Te U Trai u la ïathuh ha nga ban ong ha u paidbah, “To shahshkor! Ma nga, U Trai, nga ai ha phi ka jingjied hapdeng ka lynti ka ban lam sha ka jingim bad ka lynti ka ban lam sha ka jingïap.

⁹ Uno uno uba sah ha ka nongbah un shah pynïap ha ka thma, ne da ka 'nemsniew, ne da ka jingïapthngan. Hynrei uno uno uba mih shabar bad uba pyndem ha ki Babilonia, kiba dang tur ïaleh mynta ïa ka nongbah, un ym shah pynïap; la kumno kumno un pyllait ïa la ka jingim.

¹⁰ Nga la kut jingmut skhem ba ngan ym pynsah ïa kane ka nongbah, hynrei ban pynjot ïa ka. Yn ai ïa ka ha u syiem ka Babilonia, bad un thang lut khoit ïa ka. Ma nga, U Trai, nga la kren.”

Ka jingbishar ïa ka ïingsyiem Judah

^11-12 U Trai u la ïathuh ha nga ban ai ïa kane ka khubor ha ka ïingsyiem Judah, ki khun ki ksiew u Dabid: “To shahshkor ïa kaei kaba ma nga, U Trai, nga ong. To khmih ba yn don ka jingbishar hok man la ka sngi. Ïada ïa u briew uba shah thok na uta uba thok ïa u. Lada phim leh kumta, ka jingbymman kaba phi leh kan pynlong ïa ka jingbitar jong nga ban meh kum ka ding kaba ym lah ban pynlip.

¹³ Pha ko Jerusalem, pha kaba shong shajrong eh na ki ri them, kum u mawsiang uba ïeng shajrong na ka madan. Hynrei ngan ïaleh pyrshah ïa pha. Pha ong ba ym don ba lah ban tur ïaleh ïa pha ne ban pynpra ïa ki jingker jong pha.

¹⁴ Hynrei ngan pynshitom ïa pha ïa kaei kaba pha la leh. Ngan thang ïa ka ïingsyiem jong pha da ka ding, bad kan bam duh ïa baroh kat kaba don sawdong jong ka. Ma nga, U Trai, nga la kren.”