JEREMAÏAH 20 - Khasi CL Bible (BSI)

Ka jingïapher jingmut jong u Jeremaïah bad u Pashhur u lyngdoh

¹ Mynba u Pashhur u lyngdoh, u khun jong u Immer, uba long u rangbah pynïaidkam bahakhlieh duh jong ka Templ, u la ïohsngew ba nga pynbna ïa kine kiei kiei,

² u la hukum ba yn tied ïa nga bad ban pyndait kynjri hajan ka Khyrdop Benjamin bashaneng hapoh ka Templ.

³ Ha ka step kaba bud, hadien ba u Pashhur u la pyllait ïa nga na ki kynjri, nga la ong ha u, “U Trai um shym kyrteng ïa me u Pashhur. Ka kyrteng kaba u la lah ai ha me ka dei ‘Ka Jingshyrkhei ha kylleng.’

⁴ U Trai da lade hi u la ong, ‘Ngan pynlong ïa me ka jingshyrkhei ïa me hi bad ïa ki paralok jong me, bad men ïohi ïa ki baroh ba ki shah pynïap da ki waitlam jong ki nongshun jong ki. Ngan buh ïa baroh ki briew jong ka Judah hapoh ka bor jong u syiem ka Babilonia; un shim katto katne ngut kum ki koidi sha ka ri jong u bad pynïap ïa kiwei pat.

⁵ Ngan shah ruh ba ki nongshun jong ki kin lute ïa baroh ka spah jong kane ka nongbah bad kurup ïa ka jingdon jingem baroh, wat ïa ki jingkynshew jong ki syiem ka Judah, bad kit noh ïa kiei kiei baroh sha Babilonia.

⁶ Na ka bynta jong me, ko Pashhur, ïa me bad ïa ka longïing jong me baroh yn kem ruh bad rah sha Babilonia. Hangta men ïap bad yn tep, lem bad ki paralok jong me baroh ïa kiba me la lah ïathuh bun ki jinglamler.’ ”

U Jeremaïah u ujor ha U Trai

⁷ A Trai me la shukor ïa nga, bad ïa nga la shukor. Me long uba kham khlaiñ ban ïa nga, bad me la jop ïa nga. Uwei pa uwei u rkhiebeiñ ïa nga; ki krenbeiñ ïa nga baroh shi sngi.

⁸ Man ba nga kren, nga hap ban kyang jam bad pyrta, “Ka jingleh jubor! Ka jingpynjot!” A Trai, ïa nga la rkhiebeiñ bad ibeiñ ha ki por baroh namar nga pynbna ïa ka khubor jong me.

⁹ Hynrei haba nga ong, “Ngan klet noh ïa U Trai bad ngan ym kren shuh ha ka kyrteng jong u,” te ka khubor jong me ka long kum ka ding kaba klang jylliew hapoh jong nga. Nga la pyrshang kat kaba nga lah ban kun ïa ka, hynrei ngam lah ban bat ïa ka.

¹⁰ Nga ïohsngew uwei uwei baroh u ïa-pasiaw, “Ka jingshyrkhei ka don ha kylleng! Ïa ngin ïamudui ïa u sha ki bor pynïaid!” Wat ki paralok kiba ïajan eh ki ap khmih ïa ka jingkyllon jong nga. “Lehse lah ban pynthame ïa u,” ki ong; “te ngi lah ban kem ïa u bad ïoh pynhiarkput.”

¹¹ Hynrei ma me, A Trai, me long ha ka liang jong nga, uba khlaiñ bad bakhrawbor, bad kito kiba pynshitom beiñ ïa nga kin ym jop, kin shah pynlehrain junom, namar kim lah ban jop. Ïa ka jingjahburom jong ki yn ym klet noh da lei lei.

¹² Hynrei, ko Trai Badonbor Baroh, me tynjuh hok ïa ki briew; me tip kaei kaba don hapoh ki dohnud bad ka jingmut jong ki. Kumta shah ngan ïohi ba me pynhiarkput halor ki nongshun jong nga, namar nga la buh ïa ka kam jong nga ha ki kti jong me.

¹³ To rwai ha U Trai! To ïaroh ïa U Trai! u la pyllait im ïa kiba la shah banbeiñ na ka bor jong ki briew basniew.

¹⁴ Long ba la tim kata ka sngi ba la kha ïa nga! To klet noh ïa ka sngi ba i mei jong nga i kha ïa nga!

¹⁵ Long ba la tim uta u briew uba la pynkmen ïa i pa jong nga mynba u la wallam ha i ka khubor, “I dei u shynrang! Phi la don khun shynrang!”

¹⁶ Ai ba un long kum kito ki nongbah kiba U Trai u la pynjot khlem jingisynei. Ai un ïohsngew ïa ka jingud pang ha ka por mynstep bad ka jingmaham thma ha ka por shiteng sngi,

¹⁷ namar um shym la pynïap ïa nga ha shuwa ba yn kha ïa nga. Te ka kpoh jong i mei jong nga kan jin da la long ka jingtep jong nga.

¹⁸ Balei ba la kha ïa nga? Hato kan dei tang ban ïoh ka jingjynjar bad ka jingsngewsih, ban pynkut ïa ka jingim jong nga ha ka jingjahburom?