JEREMAÏAH 2 - Khasi CL Bible (BSI)

Ka jingsumar U Blei ïa ki Israel

¹ U Trai u la ong ïa nga

² ban pynbna ïa kane ka khubor ha uwei pa uwei ha Jerusalem, “Nga kynmaw kumno phi la long kiba ïaineh mynba phi dang khynnah, kumno phi la ieit ïa nga mynba ngi dang shongkurim nyngkong; phi la bud ïa nga lyngba ka ri shyiap, lyngba ka ri ka bym pat shym la thung jingthung.

³ Ko Israel, pha long tang ka jong nga hi; pha long ka jingdon bakyntang jong nga. Nga la phah ka jingshitom bad ka jingpynjot ha uwei pa uwei uba pynmong ïa pha. Ma nga, U Trai nga la kren.”

Ka pop ki kpa tymmen jong ki Israel

⁴ To shahshkor ïa ka khubor jong U Trai, phi ki khun ki ksiew jong u Jakob, phi ki jait jong ka Israel.

⁵ U Trai u ong, “Kaei ka jingkynnoh ba ki kpa tymmen jong phi ki la wanrah pyrshah ïa nga? Kaei kaba pynlong ïa ki ban phai noh na nga? Ki la ïamane ïa ki bleithaw bymdondor ei ei bad ki hi ki la kylla long ki bymdondor.

⁶ Kim shym salia ïa nga, wat haba nga la pyllait ïa ki na Ijipt bad ïalam ïa ki lyngba ka ri khlaw: Ka jaka ki ri shyiap bad ki thliew shyiap, ka ri kaba tyrkhong bad kaba ma ha kaba ym don mano mano bashong basah bad ba ym don mano mano wat ban ïaid lyngba.

⁷ Nga la wallam ïa ki sha ka ri baseisoh, ban lehkmen ïa ki jingot jong ka, bad kiei kiei kiwei pat kiba bha jong ka. Hynrei pynban ki la pynjot ïa ka ri jong nga, ki la pyntngit ïa ka ri kaba nga la ai ha ki.

⁸ Ki lyngdoh kim shym kylli, ‘Hangno U Trai u don?’ Ki lyngdoh jong nga hi kim ithuh ïa nga. Ki nongsynshar ki la ïeng ïaleh pyrshah ïa nga; ki nongïathuhlypa ki la kren ha ka kyrteng jong u Baal bad ki la ïamane ïa ki bleithaw bymmyntoi.”

Ka jingkemdaw U Trai pyrshah ïa ki briew jong u

⁹ “Bad kumta ma nga, U Trai ngan buh biang ïa ka mokotduma pyrshah ïa ki briew jong nga. Ngan wanrah ki jingmudui pyrshah ïa ki khun ki ksiew jong ki.

¹⁰ Khie leit sha sepngi sha ka dewlynnong Sypros, bad phah ïano ïano shaphang mihngi sha ka ri Kedar. Phin ïohi ba ym pat ju don kaba kum kane kaba la jia mynshuwa.

¹¹ Ym don kano kano kawei pat ka jaitbynriew kaba kylla ïa la ki blei, wat la kim dei kiba shisha. Hynrei ki briew jong nga ki la bujli ïa nga, U Blei uba la wanrah ha ki ka jingpyndonburom, da ki blei ki bym lah ban leh ei ei ïa ki.

¹² Bad kumta nga hukum ïa ka sahit bneng ba kan khih da ka jingingiew, ban long kaba iphylla bad kaba i lyngngoh,

¹³ namar ki briew jong nga ki la leh ar tylli ki pop: Ki la phai noh na nga, ka umpohliew ki um basngur; bad ki la tih ki jaka pynlang um, ki jaka pynlang um kiba la pdang ki bym lah ban pynlang ïa ka um.”

Ki jingmih na ka jingbymkohnguh jong ki Israel

¹⁴ “U Israel um dei u mraw; ym shym la kha ïa u sha ka jinglongmraw. Balei te ba ki nongshun jong u ki behmrad ïa u?

¹⁵ Ki la kyrhuh ha u kum u sing, ki la pynkylla ri shyiap ïa ka ri jong u, bad ki shnong jong u ki don ha ka jingjot jingpra, kiba la shah iehnoh khoit.

¹⁶ Ho-oid ki rangbah jong ka Memphis bad ka Tahpanhes ki la pynpait ïa ka shynrong khlieh jong u.

¹⁷ Ko Israel me la wallam ïa kane halor jong me! Me la iehnoh ïa nga, U Trai U Blei jong me, katba nga dang ïalam ïa me ha ka lynti.

¹⁸ Kaei me pyrkhat ba men ïoh da kaba leit sha Ijipt ban dih um na ka Nile? Kaei me pyrkhat ba men ïoh da kaba leit sha Assyria ban dih um na ka Ïuphratis?

¹⁹ Ka jingsniew jong me hi kan pynshitom ïa me, bad ka jingphai noh jong me na nga kan pynrem ïa me. Men ïoh tip haduh katno kaba kthang bad kaba bakla ka long ban iehnoh ïa nga, U Trai U Blei jong me, bad mem shym long shuh uba ïaineh ha nga. Ma nga, U Trai Nongsynshar Badonbor Baroh, nga la kren.”

Ki Israel ki kyntait ban mane ïa U Trai

²⁰ U Trai Nongsynshar u ong, “Ko Israel, la slem bah me la kyntait ïa ka iktiar jong nga; me la kyntait ban kohnguh ïa nga bad mane ïa nga. Ha uwei pa uwei u lum bakynjang bad hapoh uwei pa uwei u dieng bajyrngam me la mane ïa ki blei ka jingkharoi.

²¹ Nga la thung ïa me kum ïa u dieng sohwaiñ ba la jied na u symbai uba bha tam. Hynrei ha khmih me la kylla long uei! Me la long kum u dieng sohwaiñ uba pyut bad u bymdondor ei ei.

²² Wat lada me la sait da ka sabon kaba khlaiñ, ngan dang ïai ïohi ïa ka jingkhah jaboh jong ka jingpalat jong me.

²³ Kumno me lah ban ong ba mem shym la pyntngit ïa lade, ba mem pat ju mane ïa u Baal? Ha khmih kumno me la leh pop ha ka them; ha peit kaei me la leh. Me long kum ka ut khlaw ha ka por jingkwah shongkha jong ka, kaba mareh laitluid kylleng,

²⁴ ka da mareh stet sha ka ri shyiap. Haba ka don ha ka jingkwah shongkha, mano ba lah ban bat synshar ïa ka? Ym don uno uno u shynrang uba kwah ïa ka uba dei ban pynjynjar ïa lade; ka ïai don borabor ha ka aïom shongkha.

²⁵ Ko Israel wat pynlwait ïa ki kjat jong me, lane shah ïa u pdot jong me ban tyrkhong na kaba beh ïa kiwei pat ki blei. Hynrei me ong, ‘Em! Ngam lah ban phai dien. Nga la ieit ïa ki blei nongwei bad ngan leit hadien jong ki.’ ”

Ki Israel ki dei hok ban shah pynshitom

²⁶ U Trai u ong, “Kumba u nongtuh u shah pynjahburom haba la kem ïa u, kumta ïa phi baroh ki paid Israel yn pynjahburom — ki syiem bad ki rangbah synshar jong phi, ki lyngdoh bad ki nongïathuhlypa jong phi.

²⁷ Ïa phi baroh yn pynjahburom — ma phi kiba ong ba u dieng u dei u kpa jong phi bad ba u mawsiang u dei ka kmie jong phi. Kane kan jia namar ba phi la phai noh na nga ha ka jaka ba phin phai sha nga. Hynrei haba phi don ha ka jingjynjar, phi kyrpad ïa nga ban wan bad pynim ïa phi.

²⁸ “Hangno ki blei kiba phi la thaw na ka bynta ïa lade? Haba phi don ha ka jingjynjar, ai ba ma ki kin pynim ïa phi — lada ki lah! Ko Judah pha la don shibun ki blei kumba pha don ki nongbah.

²⁹ Kaei ka jingujor jong pha? Balei pha la ïeng ïaleh pyrshah ïa nga?

³⁰ Nga la pynshitom ïa pha, hynrei kam shym wanrah kano kano ka jingbha; phan ym da la shah ïa nga ban pynbeit ïa pha. Kum u sing uba shyrkhei, pha la pynïap ïa ki nongïathuhlypa jong nga.

³¹ Ko paid Israel, to shahshkor ïa kaei kaba nga ong. Hato nga la long kum ka ri shyiap ïa phi, kum ka ri kaba dum bad kaba ma? Balei te ba phi ong ba phin leh kat kaba phi sngewbha, ba phin ym wan phai shuh sha nga?

³² Hato ka samla kan klet ïa ki jingdeng jong ka, lane ka nongleitkurim ïa ka jaiñ kyntiew kurim jong ka? Hynrei ki briew jong nga ki la klet ïa nga bun bun sngi ban ïa kaba lah ban ñiew.

³³ Phi tip thikna kumno ban ïabeh nadien ki nongleh-ieit. Wat ki kynthei kiba sniew eh ki lah ban ïoh jinghikai na phi.

³⁴ Ki jaiñ jong phi ki la khah da ka snam jong kiba duk bad kiba lui lui, ym da ka snam jong ki nonglute.

³⁵ “Hynrei nalor kane baroh, phi ong, ‘Nga long uba lui lui, da shisha U Trai un ym bitar sah ïa nga.’ Hynrei ma nga, U Trai, ngan pynshitom ïa phi namar ba phi len ba phi la leh pop.

³⁶ Phi la pyntat-dor ïa lade da kaba phai sha ki blei jong kiwei pat ki jaitbynriew. Yn pynnoh mynsiem ïa phi da ka Ijipt, kumba phi la long da ka Assyria.

³⁷ Phin phai noh na ka Ijipt, da kaba sdien ïa ka khlieh jong phi ha ka jinglehrain. Ma nga, U Trai nga la kyntait ïa kito kiba phi la shaniah; phin ym ïoh kano kano ka jingmyntoi na ki.”