JEREMAÏAH 19 - Khasi CL Bible (BSI)

U khra ba la pait

¹ U Trai u la bthah ïa nga ban leit bad thied uwei u khra khyndew. U la ong ruh ïa nga ban ïalam katto katne ngut ki tymmen ki san jong ki briew bad katto katne ngut ki lyngdoh ba la tymmen,

² bad ban leit lyngba ka Khyrdop Khra-pait shabar sha ka Them Hinnom. Hangta nga dei ban pynbna ïa ka khubor kaba un ai ha nga.

³ U Trai u la bthah ïa nga ban ong, “Ko ki syiem jong ka Judah bad ki briew jong ka Jerusalem, to shahshkor ïa kaei kaba ma nga, U Trai Badonbor Baroh, U Blei jong ka Israel, nga don ban ong. Ngan wallam kaba kum kane ka jingpynjot ha kane ka jaka ba uwei pa uwei baroh uba ïohsngew shaphang jong ka un kyndit.

⁴ Ngan leh ïa kane namar ki briew ki la iehnoh ïa nga bad ki la pyntngit ïa kane ka jaka da kaba ai jingkñia hangne sha kiwei pat ki blei — ki blei kiba ym ma ki lymne ki kpa tymmen jong ki lymne ki syiem jong ka Judah ki la tip ei ei. Ki la pyndap ïa kane ka jaka da ka snam jong ki briew kiba lui lui,

⁵ bad ki la tei ki duwan ïa u Baal khnang ban thang ïa ki khun jong ki ha ka ding kum ki jingkñia. Ngam ju hukum ïa ki ban leh ïa kane; kam shym rung hi ruh ha ka jingpyrkhat jong nga.

⁶ Kumta te, ka por kan wan haba ïa kane ka jaka yn ym khot shuh ka Topheth lane ka Them Hinnom. Pynban yn tip ïa ka kum ka Them ka Jingpynïap.

⁷ Ha kane ka jaka ngan pynpulom ïa baroh ki jingthmu jong ki briew ka Judah bad ka Jerusalem. Ngan shah ïa ki nongshun jong ki ban risa halor jong ki bad pynïap ïa ki ha ka thma. Ngan ai ïa ki metïap jong ki ha ki sim bad ha ki mradkhlaw kum ka jingbam.

⁸ Ngan wallam ïa ka jingpynjot kaba shyrkhei kum kane ha kane ka nongbah ha kaba uwei pa uwei uba ïaid lyngba un kyndit bad lyngngoh.

⁹ U nongshun un kerkut ïa ka nongbah bad pyrshang ban pynïap ïa ki briew. Ka jingkerkut kaba shyrkhei katta katta ba ki briew hapoh ka nongbah kin ïabam iwei ïa iwei pat bad wat ïa la ki khun.”

¹⁰ Nangta U Trai u la bthah ïa nga ban pynpait ïa u khra ha khmat jong ki rangbah kiba la ïaleit bad nga

¹¹ bad ban ïathuh ïa ki ba U Trai Badonbor Baroh u la lah ong, “Ngan pynpait ïa kane ka jaitbynriew bad ïa kane ka nongbah, bad kan long kum une u khra khyndew ba la pait u bym lah ban pyndait pat. Ki briew kin tep ïa kiba ïap jong ki ha Topheth namar yn ym don hangno hangno hawei pat ban tep ïa ki.

¹² Nga kular ba ngan pynlong ïa kane ka nongbah bad ïa kiba shong ha ka kum ka Topheth.

¹³ Ki ïing jong ka Jerusalem bad ki ïing jong ki syiem ka Judah, bad shisha baroh ki ïing ha kiba halor ki tnum jong ki la thang ïa ki jingiwbih sha ki khlur bad ha kaba ïa ka waiñ la theh kum ka jingainguh sha kiwei pat ki blei — ma ki baroh kin long ki bymkhuid kum ka Topheth.”

¹⁴ Nangta nga la iehnoh ïa ka Topheth, ha kaba U Trai u la phah ïa nga ban pynbna ïa ka khubor jong u. Nga la leit bad ïeng hapoh ka phyllaw jong ka Templ bad ïathuh ha ki briew baroh

¹⁵ ba U Trai Badonbor Baroh, U Blei jong ka Israel, u la lah ong, “Ngan wallam ha kane ka nongbah bad ha kawei pa kawei ka shnong ba-marjan ïa ka jingpynshitom baroh kaba nga la ong ba ngan leh, namar phi long kiba mutlop bad phim shym shahshkor ïa kaei kaba nga kren.”