JEREMAÏAH 18 - Khasi CL Bible (BSI)

U Jeremaïah ha ka ïing u nongthaw khiew

¹ U Trai u la ong ha nga,

² “Khie leit sha ka ïing jong u nongthaw khiew, ha kaba ngan ai ha me ka khubor jong nga.”

³ Kumta nga la leit hangta bad nga la ïohi ïa u nongthaw khiew ba u trei ha ka shalyntem jong u.

⁴ Man ba u lyngkhot khiew um da wandur bha, u ju shim ïa ka dewbyrtha bad pynwandur ïa ka sha kawei pat.

⁵ Nangta U Trai u la ong ha nga,

⁶ “Hato ngam don ka hok ban leh ïa phi ki paid Israel ïa kaei kaba u nongthaw khiew u la leh ïa ka dewbyrtha? Phi don ha ki kti jong nga kum ka dewbyrtha ha ki kti u nongthaw khiew.

⁷ Lada ha kano kano ka por nga ong ba ngan rat, ngan pynkheiñ, lane pynjot ïa kano kano ka jaitbynriew lane ka hima,

⁸ hynrei hadien, kata ka jaitbynriew ka phai noh na ka jingsniew jong ka, ngan ym leh ïa kaei kaba nga la ong ba ngan leh.

⁹ Ha kawei pat ka liang, lada nga ong ba ngan seng lane tei ïa kano kano ka jaitbynriew lane ka hima,

¹⁰ hynrei hadien, kata ka jaitbynriew kam kohnguh ïa nga bad ka leh ïa kaba sniew, ngan ym leh ïa kaei kaba nga la ong ba ngan leh.

¹¹ Mynta te, to ïathuh ïa ki briew jong ka Judah bad ka Jerusalem ba nga thaw ki jingthmu bathymmai pyrshah ïa ki bad nga khreh ban pynshitom ïa ki. Ïathuh ïa ki ban sangeh ban im ka jingim ba-dap da ka pop — ban pynkylla ïa ki rukom im jong ki bad ïa kiei kiei kiba ki leh.

¹² Kin jubab, ‘Em, balei ngin leh kumta? Ngi baroh ngin ïailong kiba mutlop bad kiba sniew kumba ngi kwah ban long.’ ”

Ki briew ki kyntait ïa U Trai

¹³ U Trai u ong, “Kylli ïa kawei pa kawei ka jaitbynriew la kaba kum kane kaei kaei ka la ju jia mynshuwa. Ki paid Israel ki la leh ïa kaei kaba shyrkhei!

¹⁴ Hato ki kynjang mawsiang jong ka Lebanon ki ju long khlem ka ïor? Hato ki wahduid ba dait-thah na ki lumbah ki ju rngad?

¹⁵ Pynban ki briew jong nga ki la klet noh ïa nga; ki thang jingiwbih ïa ki bleithaw. Ki la jynthut ha ka lynti ba ki dei ban leit, kim shym bud shuh ïa ki lynti ba-mynshuwa; ki ïaid ha ki lynti ba khlem buh dak.

¹⁶ Ki la pynlong ïa kane ka ri ka bynta ka jingtriem, ban ñiewbeiñ junom. Baroh kiba la ïaid lyngba kin kyndit ha kaei kaba ki ïohi; kin kyrngah ïa la ki khlieh ha ka jinglyngngoh.

¹⁷ Ngan pynsakma ïa ki briew jong nga ha khmat ki nongshun jong ki, kum ïa u pui pui ba la beh da ka lyer mihngi. Ngan pynphai ïa la ka ingdong halor jong ki; ngan ym ïarap ïa ki haba ka jingpynjot ka wan.”

Ka jingthmu sniew pyrshah ïa u Jeremaïah

¹⁸ Nangta ki briew ki la ong, “To ngin leh ei ei shaphang u Jeremaïah! Yn don borabor ki lyngdoh ki ban hikai ïa ngi, ki rangbah bastad ban ai jingsyllok ïa ngi, bad ki nongïathuhlypa ban pynbna ïa ka khubor jong U Blei. To ngin wallam ki jingmudui pyrshah ïa u, bad sangeh ban pynshahshkor ïa kaei kaba u ong.”

¹⁹ Kumta nga la duwai, “A Trai, to sngap ïa kaei ba nga ong bad to shahshkor ïa kaei ba ki nongshun jong nga ki ong shaphang jong nga.

²⁰ Hato ka jingsniew ka dei ka bainong na ka bynta kaba bha? Pynban ki la tih ka thliew na ka bynta jong nga ba ngan hap ha ka. To kynmaw kumno ba nga la wan sha me bad kren na ka bynta jong ki, khnang ba men ym leh ei ei ïa ki ha ka jingbitar.

²¹ Hynrei mynta, ko Trai, ai ba ki khun jong ki, kin ym ïoh jingbam haduh ban da ïap; ai ba kin shah pynïap ha ka thma. Ai ba ki kynthei kin duh noh ïa la ki tnga bad ïa ki khun jong ki; ai ba ki rangbah kin ïap na ka jingpang bad ba ki samla shynrang kin shah pynïap ha ka thma.

²² To phah ïa u paidbhur ban lute ïa ki ïing jong ki khlem ka jingmaham; pynlong ïa ki ban kyang ha ka jingshyrkhei. Ki la tih ka thliew na ka bynta jong nga ban hap ha ka bad ki la pynap ki jingriam ban pynngat ïa nga.

²³ Hynrei, A Trai, me tip ïa baroh ki jingthmu sniew jong ki ban pynïap ïa nga. Wat ym map ïa ka jingsniew jong ki lane map ïa ka pop jong ki. Bret ïa ki sha tbian ha ka jingshahjop bad leh ïa ki katba me dang bitar.”