JEREMAÏAH 17 - Khasi CL Bible (BSI)

Ka pop bad ka jingshah pynshitom jong ka Judah

¹ U Trai u ong, “Ko ki briew jong ka Judah, ïa ka pop jong phi la thoh da u khulom nar; la pruid jylliew halor ki dohnud jong phi da u diamond banep bad la ohdur halor ki dong jong ki duwan jong phi.

² Ki briew jong phi ki mane ha ki duwan bad ïa ki dak kiba la pynïeng na ka bynta ka blei Asherah harud jong uwei pa uwei u dieng bajyrngam, ha ki kliar lum

³ bad halor ki lumbah ha ka rudnong bym don jingkah. Ngan pynlong ïa ki nongshun jong phi ban shim noh ïa ka spah bad ïa ki jingkynshew jong phi namar ki pop baroh kiba phi la leh ha kylleng ka ri jong phi.

⁴ Phin hap ban iehnoh ïa ka ri kaba nga la ai ha phi, bad ngan pynlong ïa phi ban shakri ïa ki nongshun jong phi ha ka ri kaba phim tip ei ei, namar ka jingbitar jong nga ka long kum ka ding, bad kan pluh junom.”

Ki jingong kiba bun

⁵ U Trai u ong, “Ngan pynrem ïa u briew uba phai noh na nga bad uba buh ïa ka jingshaniah jong u ha u briew, ha ka jingkhlaiñ jong u briew u bym im junom.

⁶ U long kum ka bniap ha ka ri shyiap, kaba mih ha ka ri khlaw baryngkhiang, halor ka khyndew mluh ha kaba ym don kaei kaei kaba mih. Ym don kano kano kaba bha kaba la ju jia ha u.

⁷ “Hynrei ngan kyrkhu ïa u briew uba buh ïa ka jingshaniah jong u ha nga.

⁸ U long kum u dieng uba mih hajan ka wahduid bad uba ki thied ki ksam sha ka um. Um sheptieng haba ka jingshit ka suiñbneng ka wan, namar ki sla jong u ki sah jyrngam; um don jingkhuslai haba ym don slap; u ïai pynmih soh.

⁹ “Mano ba lah ban shemphang ïa ka dohnud briew? Ym don kano kano kawei pat kaba shukor katta katta; ka pang jur eh ban ïa kaba ïoh jingkoit.

¹⁰ Ma nga, U Trai, nga wad ïa ki jingmut bad nga tynjuh ïa ki dohnud jong ki briew. Nga leh ïa uwei pa uwei kat kum ka lynti ba u im, kat kum kaei kaba u leh.”

¹¹ U briew uba ïoh pisa da ka jingbymhok u long kum ka sim kaba pynmih khun na ki pylleng kiba ka khlem kha. Ha ka rta ba la ih bha un duh noh ïa ka spah jong u, bad ha kaba kut um long ei ei hynrei u bieit.

¹² Ka Templ jong ngi ka long kum ka khet badonburom, kaba ïeng halor jong u lumbah bajrong naduh kaba sdang.

¹³ A Trai, me long ka jingkyrmen jong ka Israel; baroh kiba la lyndet ïa me yn buh ha ka jinglehrain. Kin jah noh kum ki kyrteng ba la thoh ha ka khyndew, namar ki la lyndet ïa me, U Trai, uba long ka umpohliew ki um basngur.

U Jeremaïah u kyrpad ïa U Trai ban ïarap

¹⁴ A Trai, pynkhiah ïa nga bad ngan ïohkhiah krat; pyllait im ïa nga bad ngan long uba shngain janai. Me long uta uba nga ïaroh!

¹⁵ Ki briew ki ong ha nga, “Hangno kito ki jingbyrngem kiba U Trai u la pynlong pyrshah ïa ngi? To ai ba un pyndep ïa ki mynta!”

¹⁶ Hynrei, A Trai, ngam ju kyrpad ïa me ban wallam ka jingpynjot halor jong ki; ngam shym la kwah ïa ka por jingjynjar na ka bynta jong ki. A Trai, me tip ïa kane; me tip ïa kaei kaba nga la ong.

¹⁷ Wat ym long ka jingshyrkhei ïa nga; me long ka jaka shngain jong nga haba ka jingjynjar ka wan.

¹⁸ To wallam ka jingjahburom halor kito kiba pynshitom beiñ ïa nga, hynrei pyllait im ïa nga, A Trai. Pyndap ïa ki da ka jingshyrkhei, hynrei wat pynshyrkhei ïa nga. To wallam ka jingjot ha ki bad pynkdiah lyngkhot ïa ki.

Halor ka jingrakhe ïa ka Sabbaton

¹⁹ U Trai u la ong ha nga, “Ko Jeremaïah, khie leit bad pynbna ïa ka khubor jong nga ha ka Khyrdop Paidbah, kaba lyngba jong ka ki syiem jong ka Judah ki rung shapoh bad mih shabar ka nongbah; nangta leit sha baroh kiwei pat ki khyrdop jong ka Jerusalem.

²⁰ Ïathuh ïa ki syiem bad ïa baroh ki briew jong ka Judah bad ïa uwei pa uwei uba shong ba sah ha Jerusalem bad rung sha kine ki khyrdop, ban shahshkor ïa kaei kaba nga ong.

²¹ Ïathuh ïa ki ba lada ki ieit ïa la ka jingim, kim dei ban kit kano kano ka jingkit ha ka Sabbaton; kim dei ban rah ïa kano kano shapoh lyngba ki khyrdop jong ka Jerusalem

²² lane rah ïa kano kano shabar ki ïing jong ki ha ka Sabbaton. Kim dei ban trei ha ka Sabbaton; ki dei ban rakhe ïa ka kum ka sngi bakyntang, kumba nga la hukum ïa ki kpa tymmen jong ki.

²³ Ki kpa tymmen jong ki kim shym la shahshkor ïa nga lane pynleit jingmut ei ei. Pynban ki la kylla long kiba mutlop; kin ym kohnguh ïa nga lane ïoh jinghikai na nga.

²⁴ “Ïathuh ïa kine ki briew ba ki dei ban kohnguh ïa baroh ki hukum jong nga. Kim dei ban kit kano kano ka jingkit shapoh lyngba ki khyrdop jong kane ka nongbah ha ka Sabbaton. Ki dei ban rakhe ïa ka Sabbaton kum ka sngi bakyntang bad kim dei ban leh ïa kano kano ka kam.

²⁵ Nangta ki syiem bad ki khun syiem shynrang jong ki kin rung ïa ki khyrdop jong ka Jerusalem bad kin don kajuh ka bor ba kynja syiem kaba u Dabid u la don. Ryngkat lem bad ki briew jong ka Judah bad ka Jerusalem, kin shong ha ki kali ïapom bad halor ki kulai, bad ka nongbah Jerusalem kan ïai dap borabor da ki briew.

²⁶ Ki briew kin wan na ki shnong jong ka Judah bad na ki shnongrit sawdong jong ka Jerusalem; kin wan na ka thain Benjamin, na ki kjat lum, na ki lumbah, bad na ka bynta bashathie jong ka Judah. Kin wallam sha ka Templ jong nga ïa ki jingainguh thang bad ïa ki jingkñia, ki jingainguh bam bad ka jingiwbih, kumjuh ruh ka jingainguh sngewnguh.

²⁷ Hynrei ki dei ban kohnguh ïa nga bad rakhe ïa ka Sabbaton kum ka sngi bakyntang. Kim dei ban kit kano kano ka jingkit lyngba ki khyrdop jong ka Jerusalem ha kata ka sngi, namar lada ki leh kumta, ngan buh ïa ki khyrdop jong ka Jerusalem ha ka ding. Ka ding kan bam duh ïa ki ïingsyiem jong ka Jerusalem, bad yn ym don mano mano ba lah ban pynlip ïa ka.”