JEREMAÏAH 16 - Khasi CL Bible (BSI)

Ka mon jong U Trai na ka bynta ka jingim jong u Jeremaïah

¹ U Trai u la kren pat ha nga bad u la ong,

² “Wat shongkurim lane don khun ha ka jaka kaba kum kane.

³ Ngan ïathuh ïa me kaei ka ban jia ïa ki khynnah kiba la kha hangne bad ïa ki kmie ki kpa jong ki.

⁴ Kin ïap na ki jingpang bashyrkhei, bad ym don mano mano ba ïambriew na ka bynta jong ki lane tep ïa ki. Ki met jong ki kin long kum ki kynton sboh halor ka khyndew. Kin shah pynïap ha ka thma lane ïap na ka jingïapthngan, bad ki met jong ki kin long ki jingbam ïa ki sim bad ïa ki mradkhlaw.

⁵ “Mem dei ban rung shapoh ka ïing ha kaba don ka jingïambriew. Wat ym ïam sngewsih na ka bynta jongno jongno. Ngan ym kyrkhu shuh ïa ki briew jong nga da ka jingsuk lane pyn-i ha ki ïa ka jingieit bad ka jingisynei.

⁶ Kiba riewspah bad kiba duk kin ïap ha kane ka ri, hynrei ym don mano mano ban tep ïa ki lane ban ïambriew na ka bynta jong ki. Ym don mano mano u ban ot ïa lade lane u ban khi ïa la ka khlieh ban pyn-i ïa ka jingsngewsih jong u.

⁷ Ym don mano mano ban bam lane dih badno badno ban pyntngen ïa u mynba iba ieit bathoiñ i ïap. Ym don mano mano ban pyn-i jingsngewlem, wat ïa uta uba la duh noh ïa la u kpa lane ïa ka kmie.

⁸ “Wat rung shapoh ka ïing ha kaba ki briew ki ïakhawai. Wat shong bad ki ban bam bad dih.

⁹ Shahshkor ïa kaei kaba ma nga, U Trai Badonbor Baroh, U Blei jong ka Israel, nga don ban ong. Ngan pynsngap jar ïa ki jingsawa ka jingkmen bad ka jingshadkmen bad ki jingsawa bakmen jong ki jingkhawai shongkurim. Ki briew hangne kin im ban ïohi ba kane ka jia.

¹⁰ “Haba me ïathuh ha ki ïa kane baroh, kin kylli ïa me balei ba nga la kut jingmut ban pynshitom tyngeh ïa ki. Kin kylli kaei ka kam runar kaba ki la shah pynrem bad kaei ka pop ba ki la leh pyrshah ïa U Trai U Blei jong ki.

¹¹ Nangta ïathuh ïa ki ba U Trai u la ong, ‘Ki kpa tymmen jong phi ki la phai dien noh na nga bad ki la mane bad shakri ïa kiwei pat ki blei. Ki la iehnoh ïa nga bad kim shym kohnguh ïa ki jinghikai jong nga.

¹² Hynrei phi la leh wat kaba kham sniew ban ïa ka jong ki kpa tymmen jong phi. Ma phi baroh phi long kiba mutlop bad kiba sniew, bad phim shym kohnguh ïa nga.

¹³ Kumta te, ngan bret ïa phi shabar jong kane ka ri sha ka ri kaba ma phi lymne ki kpa tymmen jong phi, phim pat ju tip. Bad hangta phin shakri ïa kiwei pat ki blei mynsngi bad mynmiet, bad ngan ym pyn-i jingisynei ïa phi.’ ”

Ka jingwanphai pat na ka jingshah ringmraw

¹⁴ U Trai u ong, “Ka por ka wan haba ki briew kin ym smai shuh da nga kum U Blei uba im uba la wallam ïa ki paid Israel na ka ri Ijipt.

¹⁵ Pynban, kin smai da nga kum U Blei uba im uba la wallam ïa ki paid Israel na ka ri bashatei bad na baroh kiwei pat ki ri ha kaba nga la pynsakma ïa ki. Ngan wallam pat ïa ki sha ka ri ka jong ki hi, sha ka ri kaba nga la ai ha ki kpa tymmen jong ki. Ma nga, U Trai, nga la kren.”

Ka jingpynshitom kaba wan

¹⁶ U Trai u ong, “Nga phah khot ïa shibun ki nongtong dohkha ban wan bad kem ïa kine ki briew. Nangta ngan phah khot ïa shibun ki nongbeh mrad ban thwet pynïap ïa ki halor uwei pa uwei u lumbah bad u lumrit bad hapoh ki krem hapdeng ki mawsiang.

¹⁷ Nga ïohi ïa kaei kaei baroh kaba ki leh. Ym don kano kano kaba la buhrieh na nga; ki pop jong ki kim lait phet na ka jingïohi jong nga.

¹⁸ Ngan pynlong ïa ki ban siew ar shah na ka bynta ki pop bad ka jingbymman jong ki, namar ki la pyntngit ïa ka ri jong nga da ki bleithaw ki bym don jingim kum ki metïap, bad ki la pyndap ïa ka da ki blei thala jong ki.”

Ka jingduwai sngewskhem jong u Jeremaïah ha U Trai

¹⁹ A Trai, me long uta uba ïada ïa nga bad uba ai ha nga ka jingkhlaiñ; me ïarap ïa nga ha ki por jingjynjar. Ki jaitbynriew kin wan sha me na kiba kut jong ka pyrthei bad ong, “Ki kpa tymmen jong ngi kim shym la don ei ei hynrei tang ki blei thala, ym don ei ei hynrei tang ki bleithaw bymmyntoi.

²⁰ Hato u briew u lah ban shna ïa ki blei jong u? Em, lada u leh kumta, kin ym long shisha ki blei.”

²¹ “Kumta te,” ong U Trai, “Tang shisien keiñ ngan pynlong ïa ki jaitbynriew ban tip ïa ka bor bad ka jingkhlaiñ jong nga; kin tip ba nga long U Trai.”