JEREMAÏAH 15 - Khasi CL Bible (BSI)

Ka jingtim ïa ki briew jong ka Judah

¹ Nangta U Trai u la ong ha nga, “Wat lada u Moses bad u Samuel kin ïeng hangne ban ïasaid bad nga, ngan ym pyn-i jingisynei ei ei ïa kine ki briew. Pynlong ïa ki ban leit noh; pynlong ïa ki ban phet noh na khmat jong nga.

² Haba ki kylli ïa me shano ki dei ban leit, ïathuh ïa ki ba nga la lah ong: “Ïa ki katto katne ngut la tim ban ïap da ka jingpang — kata ka dei sha kaba kin leit! Ïa kiwei pat la tim ban ïap ha ka thma — kata ka dei sha kaba kin leit! Ïa ki katto katne ngut la tim ban ïap na ka jingïapthngan — kata ka dei sha kaba kin leit! Ïa kiwei pat la tim ban shah ring noh kum ki koidi — kata ka dei sha kaba kin leit!

³ Ma nga, U Trai, nga la kut jingmut ba saw tylli kiei kiei kiba shyrkhei kin jia ha ki: kin shah pynïap ha ka thma; ïa ki met jong ki yn patan noh da ki ksew; ki sim kin bam ïa ki, bad ki mradkhlaw kin bam ïa kaei kaba sah.

⁴ Ngan pynlong ïa ki briew baroh jong ka pyrthei ban sngewtriem ha ki namar kaei kaba u Manasseh u khun jong u Hesekaïah u la leh ha Jerusalem mynba u long u syiem ka Judah.”

⁵ U Trai u ong, “Mano ban isynei ïa phi, ki briew jong ka Jerusalem, bad mano ban ïam sngewsih halor jong phi? Mano ban sangeh kham slem ban kylli phi long kumno?

⁶ Ma phi ki briew phi la kyntait ïa nga; phi la pynphai ïa la ki ingdong sha nga. Kumta nga la kner ïa la ka kti bad pynlwet ïa phi namar nga la thait ban teh lakam ïa ka jingbitar jong nga.

⁷ Ha kawei pa kawei ka shnong ha ka ri nga la kynting ïa phi sha ka lyer kum ïa u phlangïap. Nga la pynjot ïa phi, ki briew jong nga, nga la pynïap ïa ki khun jong phi namar phim shym sangeh ïa ki rukom basniew jong phi.

⁸ La don kham bun ki riewkynthei ha ka ri jong phi ban ïa ki symboh shyiap harud ka duriaw. Nga la pynïap ïa ki rangsamla jong phi ha ka rta kaba dang khie bha bad pynlong ïa ki kmie jong ki ban shahshitom. Nga lynshop kynsan ïa ki da ka jingkhuslai bad ka jingtriem.

⁹ Ka kmie kaba la duh noh ïa ki hynñiew ngut ki khun jong ka, ka la ïapler, ka da thrang ïa ka jingring mynsiem. Ka jingshai jong ka sngi jong ka, ka la kylla sha ka jingdum; la pynjahburom ïa ka bad ka pang ka dohnud. Ngan shah ïa ki nongshun jong phi ban pynïap ïa kito na phi kiba dang im. Ma nga, U Trai, nga la kren.”

U Jeremaïah u ujor sha U Trai

¹⁰ A nga long u briew u bym don jingkmen! Balei ba i mei jong nga i wallam ïa nga sha ka pyrthei? Nga la dei ban ïakajia bad ïania bad uwei pa uwei ha ka ri. Ngam shym la ai kylliang ïa kano kano ka pisa lane shim kylliang ïa kano kano; pynban uwei pa uwei u tim ïa nga.

¹¹ A Trai, ai ba ki jingtim jong ki baroh kin urlong shisha lada ngam shym la shakri bha ïa me, lada ngam shym la ïasaid bad me na ka bynta ki nongshun jong nga mynba ki don ha ka jingjynjar bad jingeh bajur.

¹² (Ym don mano mano ba lah ban pynkheiñ ïa u nar, khamtam u nar na shatei uba la khleh bad ka rnong.)

¹³ U Trai u la ong ha nga, “Ngan phah ïa ki nongshun ban kit noh ïa ka spah bad ïa ki jingkynshew jong ki briew jong nga, khnang ban pynshitom ïa ki na ka bynta ki pop kiba ki la leh ha kylleng ka ri.

¹⁴ Ngan pynlong ïa ki ban shakri ïa ki nongshun jong ki ha ka ri kaba kim don jingtip ei ei, namar ka jingbitar jong nga ka long kum ka ding, ban kan pluh junom.”

¹⁵ Nangta nga la ong, “A Trai, me sngewthuh. To kynmaw ïa nga bad ïarap ïa nga. Shah ngan ïoh pynhiarkput halor kito kiba pynshitom beiñ ïa nga. Wat ym da ïaishah katta katta ïa ki kat ba kin jop ha kaba pynïap ïa nga. To kynmaw ba ka dei na ka bynta jong me ba la ibeiñ ïa nga.

¹⁶ Me la kren ïa nga, bad nga la shahshkor ïa kawei pa kawei ka kyntien. Nga long u jong me, A Trai U Blei Badonbor Baroh, bad kumta ki ktien jong me ki la pyndap ïa ka dohnud jong nga da kaba kmen bad ka jingsngewkmen.

¹⁷ Ngam shym pynlut ïa ka por jong nga bad kiwei pat ki briew, ha kaba ïa-rkhie bad ïasngewbha. Ha kaba kohnguh ïa ki hukum jong me nga la long marwei bad nga la dap da ka jingbitar.

¹⁸ Balei nga dei ban ïaishah shitom? Balei ba ki jingmynsaw jong nga ym lah ban pynkoit? Balei ba kim koit? Hato me thmu ban pynnoh mynsiem ïa nga kum ka wahduid kaba ryngkhiang ha ka por lyiur?”

¹⁹ Ïa kane U Trai u la jubab, “Lada me wan phai, ngan shim pat ïa me, bad men long biang u shakri jong nga. Lada ha ka jaka ban kren khlem jingmut me pynbna ïa ka khubor ba don jingmut, men long biang u nongïathuhlypa jong nga. Ki briew kin wan phai pat sha me, bad mem donkam ban leit sha ki.

²⁰ Ngan pynlong ïa me kum ka kynroh da ka rnong tylli ha ka jingïadei bad ki. Kin ïakhun pyrshah ïa me, hynrei kin ym jop ïa me. Ngan long bad me ban ïada ïa me bad sumar pynim ïa me.

²¹ Ngan pyllait ïa me na ka bor jong ki rangbah bymman bad kiba leh jubor. Ma nga, U Trai, nga la kren.”