JEREMAÏAH 13 - Khasi CL Bible (BSI)

Ki patlun linen balyngkot

¹ U Trai u la bthah ïa nga ban leit bad thied ïa lade katto katne tylli ki patlun linen balyngkot bad ban phong ïa ki; hynrei u la bthah ïa nga ban ym phong ïa ki hapoh ka um.

² Kumta nga la thied ïa ki bad phong ïa ki.

³ Nangta U Trai u la kren biang ha nga, bad u la ong,

⁴ “Khie leit sha ka Wah Ïuphratis bad buhrieh ïa ki patlun lyngkot hapoh ka thliew ha ki mawsiang.”

⁵ Kumta nga la leit bad buhrieh ïa ki hajan ka Ïuphratis.

⁶ Katto katne por hadien, U Trai u la bthah ïa nga ban leit pat sha ka Ïuphratis bad shim ïa ki patlun lyngkot.

⁷ Kumta nga la leit, bad haba nga la shem ïa ka jaka ha kaba nga la buhrieh ïa ki, nga la ïohi ba ki la sniew bad kim long shuh ban pyndonkam.

⁸ Nangta U Trai u la kren biang ha nga u la ong,

⁹ “Kumne kan long kumno ba ngan pynjot ïa ka jingsarong jong ka Judah bad ïa ka jingsarong bakhraw jong ka Jerusalem.

¹⁰ Kine ki briew basniew ki la kyntait ban kohnguh ïa nga. Ki la long kiba mutlop bad bymman kumba ki la ju long, bad ki la mane bad shakri ïa kiwei ki blei. Kumta te, ki la long kum kine ki patlun lyngkot ki bym long shuh ban pyndonkam.

¹¹ Kumba ki patlun lyngkot ki biang sbiak sawdong ka syngkai, kumta nga la thmu ba baroh ki briew jong ka Israel bad Judah kin snoh skhem ha nga. Nga la leh ïa kane khnang ba kin ïoh long ki briew jong nga bad wallam ka jingïaroh bad ka burom ïa ka kyrteng jong nga; hynrei kim shym kohnguh ïa nga.”

U khra buh waiñ

¹² U Trai U Blei u la ong ha nga, “Ko Jeremaïah, ïathuh ïa ki paid Israel ba ïa uwei pa uwei u khra buh waiñ dei ban pyndap da ka waiñ. Kin jubab ba ki tip ba ïa uwei pa uwei u khra buh waiñ dei ban pyndap da ka waiñ.

¹³ Nangta ïathuh ïa ki ba ma nga, U Trai, ngan pyndap ïa ki briew ha kane ka ri da ka waiñ tad haduh ba kin buaid: ki syiem, kiba long kiba hiarpateng na u Dabid, ki lyngdoh, ki nongïathuhlypa, bad baroh ki briew jong ka Jerusalem.

¹⁴ Nangta ngan lynthaw ïa ki kum ïa ki khra uwei pyrshah ïa uwei pat, uba tymmen bad uba samla kumjuh. Ym don ka jingsngewsynei, ka jingsngewlem, lane ka jingisynei ka ban pynsangeh ïa nga na kaba pynïap ïa ki.”

U Jeremaïah u maham pyrshah ïa ka jingsarong

¹⁵ Ko ki paid Israel, U Trai u la kren! To pynrit bad shahshkor ïa u.

¹⁶ To pyndonburom ïa U Trai, U Blei jong phi, ha shuwa ba un wallam ïa ka jingdum, bad ba phi jynthut halor ki lumbah; ha shuwa ba un pynkylla sha ka jingdum synñia ïa ka jingshai kaba phi la kyrmen.

¹⁷ Lada phin ym shahshkor, ngan ïam ha kaba jar jar namar ka jingsarong jong phi; ngan ïamkthang eh, bad ki ummat jong nga kin tuid namar ki briew jong U Trai ki la shah ring noh kum ki mraw.

¹⁸ U Trai u la ong ha nga, “To ïathuh ïa u syiem bad ïa ka kmie jong u ban wan hiar na ki khet jong ki, namar ba ki pansngiat ba-itynnat jong ki, ki la hap noh na ki khlieh jong ki.

¹⁹ Ki shnong jong ka Judah bashathie ki don hapoh ka jingshah kerkut; ym don mano mano ba lah ban leit lyngba sha ki. Ïa ki briew baroh jong ka Judah la shim noh sha ka jinglongmraw.”

²⁰ Ko Jerusalem, ha khmih! Ki nongshun jong pha ki wan hiar na shatei! Hangno ki briew kiba la buh ha ka jingsumar jong pha, ki briew jong pha kiba pha la sngewsarong haduh katta katta?

²¹ Aïu phan ong haba ki briew kiba pha pyrkhat ki long ki paralok jong pha, ki jop ïa pha bad ki synshar halor jong pha? Phan don ha ka jingpang kum ka kynthei kaba kha khun.

²² Lada pha kylli balei kane baroh ka la jia ha pha — balei ba ki jaiñ jong pha ki la kad noh bad pha la shah batbor — ka dei namar ba ka pop jong pha ka long kaba shyrkhei.

²³ U briew uba ïong u lah mo ban pynkylla ïa ka rong jong ka sniehdoh jong u, lane u 'labasa u lah mo ban weng ïa ki jingthoh ïong jong u? Lada ki lah, te ma pha ka bym leh ïa kano kano hynrei ka jingsniew pha lah ban tip ban leh ïa kaei kaba dei.

²⁴ U Trai un pynsakma ïa pha kum ïa u phlangïap uba la beh noh da ka lyer ri shyiap.

²⁵ U la ong ba kane kan dei ka kupar jong pha. Kane ka dei kaei kaba u la kut jingmut ban leh ïa pha, namar pha la klet ïa u bad pha la shaniah ha ki blei thala.

²⁶ U Trai hi un sloit ïa ki jaiñ jong pha bad un pynpaw ïa pha ha ka jinglehrain.

²⁷ U la ïohi ba pha leh ïa kiei kiei kiba u isih. U la ïohi ba pha bud ïa ki blei thala halor ki lum bad ki lyngkha, kum u briew uba threw jakhlia ïa ka tnga u paramarjan jong u lane kum u kulai ïa ka kulai. Ko ki briew jong ka Jerusalem, phi long kiba la tim! Lano phin ïoh long kiba khuid?