JEREMAÏAH 12 - Khasi CL Bible (BSI)

U Jeremaïah u kylli ïa U Trai

¹ “A Trai, lada nga ïasaid ïa ka kam jong nga bad me, men pynshisha ba me long ha kaba dei. Pynban nga dei ban kylli ïa me shaphang ki bynta ka jingbishar hok. Balei ba ki rangbah basniew ki manbha katta katta? Balei ba ki rangbah bymhok ki jop?

² Me la thung ïa ki, bad ki la suhthied; ki san bad ki pynmih soh. Ki ju kren bha shaphang jong me, pynban kim da salia eh shisha shaphang jong me.

³ Hynrei, A Trai, me ithuh ïa nga; me ïohi kaei ba nga leh, bad kumno nga la ieit ïa me. To paring sharud ïa kine ki rangbah basniew kum ïa ki langbrot ki ban shah ot doh; to sumar ïa ki tad haduh ba ka dei ka por ïa ki ban shah pynïap.

⁴ Sa katno ba ka ri jong ngi kan tyrkhong, bad ba u phlang ha kawei pa kawei ka pyntha un ïapstai? Ki mrad bad ki sim ki ïap namar ka jingbymman jong ki briew jong ngi, ki briew kiba ong, ‘U Blei um ïohi ïa kaei kaba ngi leh.’ ”

⁵ U Trai u ong, “Ko Jeremaïah, lada me la thait ban ïamareh pyrshah ïa ki rangbah, kumno me lah ban ïamareh pyrshah ïa ki kulai? Lada mem lah wat ban ïeng ha ka jaka bym don jingkah, kumno men leh ha ka khlaw harud jong ka Jordan?

⁶ Wat ki hynmen ki para shynrang jong me, ki dkhot jong ka longïing jong me hi, ki la shetkylla ïa me; ki la ïasoh ha ki jingtur ïaleh pyrshah ïa me. Wat shaniah ïa ki, wat la ki kren ki ktien sngewieit.”

Ka jingsngewsih jong U Trai namar ki briew jong u

⁷ U Trai u ong, “Nga la iehnoh ïa ka Israel; nga la kyntait noh ïa ka jaitbynriew ba la jied jong nga. Nga la ai ïa ki briew ba nga ieit ha ka bor jong ki nongshun jong ki.

⁸ Ki briew ba la jied jong nga ki la phai pyrshah ïa nga; kum u sing hapoh ka khlaw ki la kyrhuh ïa nga, bad kumta nga isih ïa ki.

⁹ Ki briew ba la jied jong nga ki long kum ka sim kaba la shah tur ïaleh ha ki kbeit na baroh ki liang. To khot ïa ki mradkhlaw ban wan bad ïashim bynta ha ka jingkhawai!

¹⁰ Shibun ki nongsynshar nongwei ki la pynjot ïa ka bri sohwaiñ jong nga; ki la ïuhroit ïa ki lyngkha jong nga; ki la pynkylla ïa ka ri ba-itynnat jong nga sha ka ri shyiap.

¹¹ Ki la pynkylla ri khlaw ïa ka; ka la long thylli ha khmat jong nga. Ka ri baroh kawei ka la kylla long ka ri shyiap, bad ym don mano mano ba salia.

¹² Sha shiliang ki jaka kynjang baroh jong ka ri shyiap ki rangbah ki la wan ban lute. Nga la phah ïa ka thma ban pynjot ïa ka ri baroh kawei; yn ym don mano mano ba lah ban im ha ka jingsuk.

¹³ Ki briew jong nga ki la bet ïa u kew, hynrei ki la lum ïa ki ñiut; ki la trei shitom, hynrei kim shym ïoh ei ei na ka bynta kata. Namar ka jingbitar shla jong nga ki jingthung jong ki kim shym long.”

Ka jingkular jong U Trai ïa ki paramarjan jong ka Israel

¹⁴ U Trai u ong, “Nga don ei ei ban ong shaphang ki paramarjan jong ka Israel kiba la pynjot ïa ka ri kaba nga la ai ha ki briew jong nga ki Israel. Ngan shim noh ïa kito ki briew bymman na ki ri jong ki kum ïa u jingthung ba la rat, bad ngan pyllait im ïa ka Judah na ki.

¹⁵ Hynrei hadien ba nga la shim noh ïa ki, ngan don jingisynei halor jong ki; ngan wallam pat ïa kawei pa kawei ka jaitbynriew sha ka ri jong ka bad sha ka shnong jong ka.

¹⁶ Lada kin pdiang da ka dohnud jong ki baroh ïa ka niam jong ki briew jong nga bad kin smai, ‘Kumba U Trai u im’ — kumba shisien ki la hikai ïa ki briew jong nga ban smai da u Baal — nangta ki ruh kin long ka bynta jong ki briew jong nga ban kin manbha.

¹⁷ Hynrei lada kano kano ka jaitbynriew kam kohnguh, te ngan rat lut khoit bad pynjot ïa ka. Ma nga, U Trai, nga la kren.”