JEREMAÏAH 11 - Khasi CL Bible (BSI)

U Jeremaïah bad ka jutang

¹ U Trai u la ong ha nga,

² “To shahshkor ïa ki kyndon jong ka jutang. Ïathuh ha ki briew jong ka Judah bad Jerusalem

³ ba ma nga, U Trai U Blei ki Israel, nga la buh ka jingtim halor uwei uwei baroh u bymkohnguh ïa ki kyndon jong kane ka jutang.

⁴ Ka dei ka jutang kaba nga la pynlong bad ki kpa tymmen jong ki mynba nga la wallam noh ïa ki na Ijipt, ka ri kaba long kum ka lawar ding baklang ïa ki. Nga la ong ïa ki ban kohnguh ïa nga bad ban leh ïa kiei kiei baroh kiba nga la lah hukum. Nga la ong ïa ki ba lada ki kohnguh, kin ïoh long ki briew jong nga bad ngan ïoh long U Blei jong ki.

⁵ Nangta ngan bat ïa ka kular kaba nga la pynlong ha ki kpa tymmen jong ki ba ngan ai ha ki ka ri kaba tuid da ka dud bad ka ngap kaba ki don mynta.” Nga la ong, “Ho-oid, ko Trai.”

⁶ Nangta U Trai u la ong ha nga, “Khie leit sha ki nongbah jong ka Judah bad sha ki lynti jong ka Jerusalem. Pynbna ïa ka khubor jong nga hangta bad ïathuh ïa ki briew ban shahshkor ïa ki kyndon jong ka jutang bad ban kohnguh ïa ki.

⁷ Haba nga wallam ïa ki kpa tymmen jong ki na Ijipt, nga la maham kyntang ïa ki ban kohnguh ïa nga, bad nga la ïai maham ïa ki briew tad haduh kane ka sngi.

⁸ Hynrei kim shym la shahshkor lane kohnguh. Pynban, uwei uwei baroh u ïai bteng ban long uba mutlop bad uba sniew kumba u ju long. Nga la hukum ïa ki ban bat ïa ka jutang, hynrei ki la kyntait. Kumta nga la wallam halor jong ki baroh ïa ki jingpynshitom kiba la batai ha ka.”

⁹ Nangta U Trai u la ong ha nga, “Ki briew jong ka Judah bad ka Jerusalem ki la ïathmu sniew pyrshah ïa nga.

¹⁰ Ki la leit phai pat sha ki pop jong ki kpa tymmen jong ki, kiba la kyntait ban leh ïa kaei kaba nga ong; ki la mane ïa kiwei pat ki blei. Baroh ar, ka Israel bad ka Judah ki la pynkheiñ ïa ka jutang kaba nga la pynlong bad ki kpa tymmen jong ki.

¹¹ Kumta mynta, ma nga, U Trai, nga maham ïa ki ba ngan wanrah ka jingpynjot halor jong ki, bad kin ym lah ban lait. Bad haba ki kyang sha nga ban ïoh jingïarap, ngan ym shahshkor ïa ki.

¹² Nangta ki briew jong ka Judah bad ka Jerusalem kin leit sha ki blei ha kiba ki ai ïa ki jingkñia bad kin kyang jam sha ki ban ïoh jingïarap. Hynrei kito ki blei kin ym lah ban pynim ïa ki haba kane ka jingpynjot ka wan.

¹³ Ki briew jong ka Judah ki la don shibun bah ki blei kumba ki la don ki nongbah, bad ki nongshong shnong jong ka Jerusalem ki la pynïeng katta tylli ki duwan na ka bynta ki jingkñia sha uta u blei Baal ba-ijli kat ka jingdon ki lynti hapoh ka nongbah.

¹⁴ Ko Jeremaïah, wat duwai ha nga lane ïasaid bad nga na ka bynta kine ki briew. Haba ki don ha ka jingjynjar bad ki pyrta sha nga ban ïoh jingïarap, ngan ym shahshkor ïa ki.”

¹⁵ U Trai u ong, “Ki briew kiba nga ieit ki la leh ïa kiei kiei kiba sniew. Ki don hok aïu ban don hapoh ka Templ jong nga? Hato ki pyrkhat ba ki lah ban ïada na ka jingpynjot da kaba pynlong ki jingkular bad da kaba ai ki jingkñia da ki mrad? Hato kata kan pynkmen ïa ki?

¹⁶ Shisien nga la khot ïa ki, u dieng Olib babun sla, uba dap da ki soh ba-itynnat; hynrei mynta, da ka jingkyrhuh kum u pyrthat ngan thang ïa ki sla jong u ha ka ding bad pynkheiñ ïa ki tnat jong u.

¹⁷ “Ma nga, U Trai Badonbor Baroh, nga la thung ïa ka Israel bad ka Judah; hynrei mynta nga byrngem ïa ki da ka jingpynjot. Ki la wallam ïa kane halor jong ki hi namar ba ki la leh bakla; ki la pynbitar ïa nga da kaba ai ki jingkñia ha u Baal.”

Ka jingthmu sniew pyrshah ïa ka jingim jong u Jeremaïah

¹⁸ U Trai u la pyntip ha nga ïa ki jingthmu sniew kiba ki nongshun jong nga ki la thaw pyrshah ïa nga.

¹⁹ Nga la long kum i khunlangbrot balui lui iba la shah ïalam sha ka jingpynïap, bad ngam shym tip ba ka la long pyrshah ïa nga ba ki la ïapynkhreh ïa kiei kiei kiba sniew. Ki la ïa-ong, “To ngin khet ïa u dieng katba u dang khlaiñ; to ngin pynïap ïa u khnang ba yn ym don mano mano ba kynmaw shuh ïa u.”

²⁰ Nangta nga la duwai, “A Trai Badonbor Baroh, me long u nongbishar ba bishar hok; me tynjuh ïa ki jingpyrkhat bad ki jingsngew jong ki briew. Nga la buh ïa ka kam jong nga ha ki kti jong me; kumta shah ïa nga ban khmih ïa me ba me pynhiarkput halor kine ki briew.”

²¹ Ki rangbah jong ka Anathoth ki la kwah ïa nga ban shah pynïap, bad ki la ong ïa nga ba kin pynïap ïa nga lada nga dang ïai pynbna ïa ka khubor jong U Trai.

²² Kumta U Trai Badonbor Baroh u la ong, “Ngan pynshitom ïa ki! Ki samla shynrang jong ki kin shah pynïap ha ka thma; ki khun jong ki kin ïapthngan.

²³ Nga la buh ka por ïa ka ban wallam ka jingpynjot ha ki briew jong ka Anathoth, bad haba kata ka por ka wan, yn ym don mano mano ruh na ki u ban lait im.”