JEREMAÏAH 10 - Khasi CL Bible (BSI)

Ka jingmane bleithaw bad ka jingmane bashisha

¹ Ko paid Israel, to shahshkor ïa ka khubor ba U Trai u don na ka bynta jong phi.

² U ong, “Wat bud ïa ki rukom jong kiwei pat ki jaitbynriew; wat khih jingmut da ki jingïohi bym ju kham ïohi ha ka sahit bneng, wat la kiwei pat ki jaitbynriew ki la sheptieng.

³ Ka niam jong kine ki briew ka long ka bymdondor ei ei. La khet ïa u dieng ha khlaw; la ohdur da ki tiar u nong-ohdieng,

⁴ bad la pynitynnat da ka rupa bad ka ksiar. La pynskhem ïa ka da ki preg ban pyllait ïa ka na ka jingkyllon.

⁵ Kiba kum kine ki bleithaw ki long kum ki jingpyntieng ïa ki sim ha ki lyngkha sohkhia; kim lah ban kren; la dei ban rah ïa ki namar kim lah ban ïaid. Wat sheptieng ïa ki: kim lah ban pynmynsaw ïa phi, bad kim lah ban lehbha ïa phi.”

⁶ A Trai, ym don uno uno uba kum ma me; me long uba khrawbor, bad ka kyrteng jong me ka long kaba khraw bad kaba donbor.

⁷ Uei u ban ym pyndonburom ïa me, u syiem jong ki jaitbynriew baroh? Me dei hok ban ïoh ka pyndonburom. Ym don mano mano uba kum ma me hapdeng ki riewstad baroh jong ki jaitbynriew lane napdeng uno uno u syiem jong ki.

⁸ Ma ki baroh ki long kiba mutlop bad kiba bieit. Aïu ki lah ban nang na ki bleithaw dieng?

⁹ Ïa ki bleithaw jong ki la sop da ka rupa na Spain bad da ka ksiar na Uphas baroh ki jingtrei jong ki nongtrei; la pynphong jaiñ ïa ki ha ki jaiñ ïongjngum bad sawbthuh ba la thain da ki nongthain jaiñ batbit.

¹⁰ Hynrei ma me, A Trai, me long U Blei bashisha, me long U Blei uba im bad u syiem bymjukut. Haba me bitar, ka pyrthei ka khynñiuh; ki jaitbynriew kim lah shah ïa ka jingbitar jong me.

¹¹ (Ma phi ki paidbah phi dei ban ïathuh ïa ki ba ki blei ki bym shym la thaw ïa ka pyrthei bad ïa ka sahit bneng yn sa pynjot. Kin ym don shuh hangno hangno ha ka pyrthei.)

Ka jingrwai ïaroh ïa U Blei

¹² U Trai u la thaw ïa ka khyndew da ka bor jong u; da ka jingstad jong u, u la thaw ïa ka pyrthei bad u la pyiar pynïar ïa ki bneng.

¹³ Ha ka hukum jong u ki um shalor jong ka suiñbneng ki kyrhuh; u wallam ïa ki lyoh na kiba kut jong ka pyrthei. U pynlong ïa ka leilieh ban thaba ha u slap bad u phah ïa ka lyer na ka kamra buh tiar jong u.

¹⁴ Ha ka jingïohi ïa kane, ki rangbah ki sngew mutlop bad kim sngewthuh ei ei; kito kiba shna bleithaw ki shah pynthame, namar ki blei kiba ki shna ki long kiba bakla bad kim don jingim.

¹⁵ Ki long ki bymdondor bad dei ban ñiewbeiñ; yn sa pynjot ïa ki haba U Trai u wan ban leh ïa ki.

¹⁶ U Blei jong u Jakob um long kum ma ki; u long uta uba thaw ïa kiei kiei baroh, bad u la jied ïa ki Israel ban long ki briew jong u hi. U Trai Badonbor Baroh long ka kyrteng jong u.

Ka jingwan ka jingringmraw

¹⁷ Ko ki briew ka Jerusalem, phi don hapoh ka jingshah kerkut! To lumlang ïa ki jingdon jingem jong phi.

¹⁸ U Trai un kynting ïa phi shabar jong kane ka ri; un pynlwet ïa phi tad haduh ba yn ym don uno uno ruh na phi uba dang sah. U Trai u la kren.

¹⁹ Ki briew ka Jerusalem ki kyang jam, “Haduh katno la pynmong jur ïa ngi! Ki jingmong jong ngi kin ym koit. Bad ngi la pyrkhat ba kane ka dei kaei kaei kaba ngi lah ban shah!

²⁰ La pynjot ïa ki ïingjaiñ jong ngi; ïa ki tyllai ba pynskhem ïa ki la pyndkut. Ki khun jong ngi ki la leit noh baroh; ym don shuh mano mano ba dang sah ban pynïeng pat ïa ki ïingjaiñ jong ngi; ym don shuh mano mano ban wah ïa ki pyrda jong ki.”

²¹ Nga la jubab, “Ki nongïalam jong ngi ki long kiba mutlop; kim shym kyrpad ïa U Trai ban ïoh jingïalam. Dei kane keiñ balei ba ki shahjop, bad ki briew jong ngi ki la shah pynsakma.

²² To shahshkor! Ka khubor ka wan! Ka don ka jingkhihwin bakhraw ha ka jaitbynriew bashatei; ka kynhun shipai jong ka kan pynkylla ïa ki nongbah ka Judah sha ka ri shyiap, ka jaka ha kaba ki shong ki myrsiang.”

²³ A Trai, nga tip ba ym don uno uno uba long u kynrad ïa la ka lawei jong u hi; ym don uno uno u briew uba bat synshar ïa ka jingim jong u hi.

²⁴ Pynbeit ïa ki briew jong me, A Trai; hynrei wat leh tyngeh halor jong ngi lane pynshitom ïa ngi haba me bitar; kata ka lah ban long ka jingkut jong ngi.

²⁵ Pynphai ïa ka jingbitar jong me halor ki jaitbynriew ki bym mane ïa me bad halor ki briew kiba kyntait ïa me. Ki la pynïap ïa ki briew jong me; ki la pynjot khoit ïa ngi bad iehnoh ïa ka ri jong ngi ha ka jingjot jingpra.