JEREMAÏAH 1 - Khasi CL Bible (BSI)

U Jeremaïah

¹ Kane ka kitab ka dei ka jingïathuh ïa kaei kaba la kren da u Jeremaïah, u khun jong u Hilkaïah, uwei na ki lyngdoh jong ka shnong Anathoth ha ka thain Benjamin.

² U Trai u la kren ha u Jeremaïah ha ka snem kaba khatlai ba u Josaïah u khun jong u Amon u long u syiem ka Judah,

³ bad u la kren biang ha u haba u Jehoïakim u khun jong u Josaïah u long u syiem. Hadien kata, U Trai u la kren ha u bun bunsien, tad haduh ka snem kaba khatwei jong ka jingsynshar u Sedekaïah u khun jong u Josaïah. Ha u bnai uba san jong kata ka snem, ïa ki briew jong ka Jerusalem la ringmraw noh.

Ka jingkhot ïa u Jeremaïah

⁴ U Trai u ong ha nga,

⁵ “Nga la jied ïa me ha shuwa ba nga ai jingim ïa me, bad ha shuwa ba yn kha ïa me, nga la jied ïa me ban long u nongïathuhlypa sha ki jaitbynriew.”

⁶ Nga jubab, “Ko Trai Nongsynshar, ngam tip kumno ban kren; nga dang khynnah eh.”

⁷ Hynrei U Trai u ong ha nga, “Wat ong ba me dang khynnah eh, hynrei khie leit sha ki briew kiba nga phah ïa me, bad ïathuh ha ki ïa kaei kaei baroh kaba nga hukum ïa me ban ong.

⁸ Wat sheptieng ïa ki, naba ngan don lem bad me ban ïada ïa me. Ma nga, U Trai nga la kren!”

⁹ Nangta U Trai u la kner ïa la ka kti bad u la ktah ïa ki rmiang shyntur jong nga, bad u la ong ha nga, “To shahshkor, nga ai ha me ki kyntien kiba me dei ban kren.

¹⁰ Ha kane ka sngi nga ai ha me ka iktiar halor ki jaitbynriew bad ki hima ban rat bad ban pynkhyllem, ban pynjot bad ban bret sharud, ban tei bad ban thung.”

Ar tylli ki jingïohipaw

¹¹ U Trai u kylli ïa nga, “Ko Jeremaïah, kaei me ïohi?” Nga jubab, “U tnat jong u diengsoh Almond.”

¹² “Me ong kaba dei” U Trai u la ong, “bad nga dang khmih ban ïohi ba ki kyntien jong nga ki wan urlong shisha.”

¹³ Nangta U Trai u la kren biang ha nga, “Sa kaei pat me ïohi?” u la kylli. Nga jubab, “Nga ïohi ïa u khiew uba thnam ha ka phang bashatei, bad u la jan hap sha kane ka liang.”

¹⁴ U ong ha nga, “Ka jingpynjot kan thnam na ka phang bashatei halor baroh kiba shong basah ha kane ka ri,

¹⁵ namar nga khot ïa baroh ki jaitbynriew ha ka phang bashatei ban ïawan. Ki syiem jong ki kin pynïeng ïa ki khet jong ki ha ki khyrdop jong ka Jerusalem bad sawdong ïa ki kynroh jong ka bad ruh sawdong ïa kiwei pat ki nongbah jong ka Judah.

¹⁶ Ngan pynshitom ïa ki briew jong nga namar ki la leh pop; ki la phai dien noh na nga, ki la ai jingkñia sha kiwei pat ki blei, bad ki la shna ïa ki bleithaw bad mane ïa ki.

¹⁷ Pynkhreh, ko Jeremaïah; khie leit bad ïathuh ïa ki ïa kaei kaei baroh kaba nga hukum ïa me ban ong. Wat leit sheptieng ïa ki mynta, ïoh ba ngan pynlong ïa me uba kham sheptieng haba me don bad ki.

^18-19 To shahshkor, ko Jeremaïah! Uwei pa uwei ha kane ka ri — ki syiem ka Judah, ki rangbah synshar, ki lyngdoh, bad ki briew — kin long pyrshah ïa me. Hynrei ha kane ka sngi nga ai ha me ka jingkhlaiñ ban ïeng pyrshah ïa ki; men long kum ka nongbah ba la ker kynroh, u rishot nar, bad ka kynroh rnong. Kin ym lah ban jop ïa me, naba ngan don lem bad me ban ïada ïa me. Ma nga, U Trai nga la kren.”