JENESIS 9 - Khasi CL Bible (BSI)

Ka jutang U Blei bad u Noah

¹ U Blei u la kyrkhu ïa u Noah bad ïa ki khun shynrang jong u, bad u ong ha ki, “To phin ïoh bun ki khun ki kti, ba ki khun ki ksiew jong phi kin sah ha kylleng ka pyrthei.

² Baroh ki mrad, ki sim, bad ki dohkha kin im ha ka jingsheptieng ïa phi. La buh ïa ki hapoh ka bor jong phi.

³ Mynta phi lah ban bam ïa ki, kumjuh ruh ïa ki jingthung bajyrngam; nga ai ïa ki baroh ha phi ban long jingbam.

⁴ Kawei kaba phim dei ban bam ka long ka doh kaba dang don snam hapoh jong ka; nga khang pyrshah ïa kane namar ba ka jingim ka don ha ka snam.

⁵ Lada uno uno u shim ïa ka jingim briew, yn pynshitom ïa u. Ngan pynshitom da ka jingïap ïa uno uno u mrad uba shim ïa ka jingim briew.

⁶ Ïa ki briew la thaw ha ka dur jong U Blei hi, kumta uno uno uba pynïap ïa uwei na ki, u ruh un shah pynïap ha uwei pat.

⁷ “To phin ïoh bun ki khun ki kti, ba ki khun ki ksiew jong phi kin sah ha kylleng ka pyrthei.”

⁸ U Blei u ong ha u Noah bad ha ki khun shynrang jong u,

⁹ “Mynta ngan pynlong ka jutang bad phi lem bad ki khun ki ksiew jong phi,

¹⁰ bad baroh ki jingthaw ba-im — ki sim, bad ki mrad baroh — kat kiba la wan mih lang bad phi na kata ka lieng.

¹¹ Da kine ki ktien, nga pynlong ka jutang bad phi: Nga kular ba lano lano ruh ngan ym pynjot shuh ïa ki jingthaw ba-im da ka jingshlei um, da lei lei ruh ka jingshlei um kan ym pynjot shuh ïa ka pyrthei.

¹² Kum ka dak jong kata ka jutang baïaineh junom ïa kaba nga la pynlong bad phi lem bad ki jingthaw ba-im baroh, nga buh ïa ka ryntieh jong nga ha u lyoh.

¹³ Kata kan long ka dak jong kata ka jutang jong nga bad ka pyrthei.

¹⁴ Ha man ba nga tap ïa ka suiñbneng da u lyoh, bad ba u simpyllieng u paw,

¹⁵ ngan kynmaw ïa la ka kular ha phi bad ha ki mrad baroh ba ka jingshlei um da lei lei ruh kan ym pynjot shuh ïa ki jingthaw ba-im baroh.

¹⁶ Haba u simpyllieng u paw ha ki lyoh, ngan khmih ïa u, bad ngan kynmaw ïa ka jutang baïaineh junom hapdeng jong nga bad ki jingthaw ba-im baroh ha ka pyrthei.

¹⁷ Kata ka long ka dak jong ka jingkular kaba nga la pynlong ha ki jingthaw ba-im baroh.”

U Noah bad ki khun shynrang jong u

¹⁸ Ki khun shynrang u Noah kiba la ïawan mih na kata ka lieng ki long u Shem, u Ham, bad u Japheth. (U Ham u long u kpa jong u Kanaan.)

¹⁹ Kine lai ngut ki khun u Noah ki long ki kpa tymmen jong ki briew baroh ha ka pyrthei.

²⁰ U Noah, uba long u nongrep, u long u briew uba nyngkong eh ban thung ka bri sohwaiñ.

²¹ Hadien ba u la dih khyndiat ka waiñ, u la buaid, u law ïa la ki jaiñ bad u thiah lyngkhuit hapoh la ka ïingjaiñ.

²² Haba u Ham, u kpa jong u Kanaan, u la ïohi ba u kpa jong u, u la lyngkhuit, u la mih shabar bad ïathuh ha la ki hynmen shynrang baroh ar ngut.

²³ Nangta u Shem bad u Japheth ki la shim kawei ka jaiñkup bad ki tawah ïa ka hadien jong ki ha la ka tyrpeng. Ki ïaid dadien shapoh ka ïingjaiñ bad ki tap ïa la u kpa, ki da phai dien khnang ba kin ym ïohi ïa u, ba u lyngkhuit.

²⁴ Ynda u Noah u la pyngngad, bad u la tip aïu u khun khatduh jong u, u la leh ïa u,

²⁵ u ong, “Ka jingtim halor u Kanaan! Un long u mraw ïa ki hynmen jong u.

²⁶ Ai ka jingïaroh ïa U Trai, U Blei jong u Shem! U Kanaan un long u mraw jong u Shem.

²⁷ To U Blei un pynkhraw ïa u Japheth, Ai ba ki khun ki ksiew jong u kin shong kin sah bad ki briew jong u Shem! U Kanaan un long u mraw jong u Japheth.”

²⁸ Hadien kata ka jingshlei um, u Noah u la im sa laispah sanphew snem,

²⁹ bad u la ïap noh ha ka rta kaba khyndaispah sanphew snem.