JENESIS 5 - Khasi CL Bible (BSI)

Ki khun ki ksiew jong u Adam

¹ Kane ka dei ka thup kyrteng jong ki khun ki ksiew u Adam. (Mynba U Blei U la thaw ïa ki briew, u la thaw ïa ki ha ka dur jong U hi.

² Shynrang bad kynthei u la thaw ïa ki, U la kyrkhu ïa ki, bad u la kyrteng ïa ki, “Ki Briew”.)

³ Haba u Adam u la dap shispah laiphew snem ka rta, u la ïoh khun shynrang uba syriem ïa u bad u la kyrteng ïa u, u Seth.

⁴ Hadien kata, u Adam u la im sa phraspah snem.

⁵ U la ïoh ruh kiwei pat ki khun bad u la ïap ha ka rta kaba khyndaispah laiphew snem.

⁶ Haba u Seth u la dap shispah san snem ka rta, u la ïoh khun shynrang, u Enosh,

⁷ bad hadien kata u la im sa phraspah hynñiew snem. U la ïoh ruh kiwei pat ki khun

⁸ bad u la ïap ha ka rta kaba khyndaispah khat-ar snem.

⁹ Haba u Enosh u la dap khyndaiphew snem ka rta, u la ïoh khun shynrang, u Kenan,

¹⁰ bad hadien kata u la im sa phraspah khatsan snem. U la ïoh ruh kiwei pat ki khun

¹¹ bad u la ïap ha ka rta kaba khyndaispah san snem.

¹² Haba u Kenan u la dap hynñiewphew snem ka rta, u la ïoh khun shynrang, u Mahalalel,

¹³ bad hadien kata u la im sa phraspah sawphew snem. U la ïoh ruh kiwei pat ki khun

¹⁴ bad u la ïap ha ka rta kaba khyndaispah shiphew snem.

¹⁵ Haba u Mahalalel u la dap hynriewphew san snem ka rta, u la ïoh khun shynrang, u Jared,

¹⁶ bad hadien kata u la im sa phraspah laiphew snem. U la ïoh ruh kiwei pat ki khun

¹⁷ bad u la ïap ha ka rta kaba phraspah khyndaiphew san snem.

¹⁸ Haba u Jared u la dap shispah hynriewphew ar snem ka rta, u la ïoh khun shynrang, u Enokh,

¹⁹ bad hadien kata u la im sa phraspah snem. U la ïoh ruh kiwei pat ki khun

²⁰ bad u la ïap ha ka rta kaba khyndaispah hynriewphew ar snem.

²¹ Haba u Enokh u la dap hynriewphew san snem ka rta, u la ïoh khun shynrang, u Methuselah.

²² Hadien kata, u Enokh u la im ha ka jingïasyllok bad U Blei haduh laispah snem bad u la ïoh ruh kiwei pat ki khun.

²³ U la im laispah hynriewphew san snem.

²⁴ U la pynlut la ka jingim ha kaba ïasyllok bad U Blei, bad hadien kata u la jah noh, namar U Blei u la shim noh ïa u.

²⁵ Haba u Methuselah u la dap shispah phraphew hynñiew snem ka rta, u la ïoh khun shynrang, u Lamekh,

²⁶ bad hadien kata u la im sa hynñiewspah phraphew ar snem. U la ïoh ruh kiwei pat ki khun

²⁷ bad u la ïap ha ka rta kaba khyndaispah hynriewphew khyndai snem.

²⁸ Haba u Lamekh u la dap shispah phraphew ar snem ka rta, u ïoh khun shynrang,

²⁹ bad u ong, “Na ka khyndew ha kaba U Trai u la buh ka jingtim, une u khunlung un wallam ha ngi ka jingpyntngen na baroh ka jingtrei shitom jong ngi;” kumta u la kyrteng ïa u, u Noah.

³⁰ U Lamekh u la im sa sanspah khyndaiphew san snem. U la ïoh ruh kiwei pat ki khun

³¹ bad u la ïap ha ka rta kaba hynñiewspah hynñiewphew hynñiew snem.

³² Ynda u Noah u la dap sanspah snem ka rta, u ïoh lai ngut ki khun shynrang, u Shem, u Ham, bad u Japheth.