JENESIS 49 - Khasi CL Bible (BSI)

Ki ktien khatduh u Jakob

¹ Te u Jakob u khot ïa la ki khun shynrang bad u ong, “Ïalumlang baroh, ba ngan ïathuh aïu kan jia ïa phi ha ka lawei:

² “Ale lang bad sngap, phi ki khun shynrang jong u Jakob, Shahshkor ïa u Israel u kpa jong phi.

³ “Reuben, khun phrangsngi jong nga, Me long ka jingkhlaiñ jong nga, U soh nyngkong ka jinglong rangbah jong nga, Uba sarong tam bad uba khlaiñ tam Na ki khun jong nga baroh.

⁴ Me long kum ka umbah kaba shlei. Hynrei men ym ïoh ïa ka kyrdan bapawkhmat tam, Naba me la ïathiah shongkha bad ka tnga kliar jong nga, bad me la pynjahburom ïa ka jingthiah u kpa jong me.

⁵ “U Simeon bad u Lebi ki ïalong shi para. Ki pyndonkam ïa la ki atiar ban thombor.

⁶ Da lei lei ngan ym ïadon bad ki ha ki jingïaphylliew jingmut barieh jong ki. Da lei lei ngan ym ïasyllok lang bad ki ha ki jingïakynduh jong ki, naba haba ki khie bitar ki pynïap ïa ki briew, bad ki pyndkoh ïa ki masi shynrang kum ka jinglehkai sngewbha.

⁷ Long ba la tim ïa ka jingbitar jong ki, Naba ka long kaba ishyrkhei; Bad long ba la tim ïa ka jingbitar shla jong ki, Naba ka long kaba shyrkhei katta katta. Kylleng ka ri Israel ngan pynsakma ïa ki, Bad hapdeng ki briew jong ka ngan pynsakma ïa ki.

⁸ “Judah, ki hynmen ki para jong me kin ïaroh ïa me; Me shim na ka ryndang ïa ki nongshun jong me; Ki hynmen ki para jong me kin nguh kin dem ïa phi.

⁹ U Judah u long kum u sing, Haba u la pynïap ïa uba u thmu u leit phai sha la krem; Hangta u dem, bad u thiah. Uei uba nud ban pynthut ïa u?

¹⁰ U Judah un bat ïa u diengsynshar syiem, Bad ki khun ki ksiew jong u kin ïai synshar. Ki jaitbynriew kin wanrah ha u ïa ka bai nguh syiem, kin dem bad kohnguh ïa u.

¹¹ U teh ïa u khun kada ha u dieng sohwaiñ Ha u dieng sohwaiñ uba bha tam; U sait ïa la ki jaiñphong ha ka um sohwaiñ, kaba saw snam.

¹² Ki khmat jong u ki saw triej na kaba dih waiñ, Bad ki bniat jong u ki lieh shaid na kaba dih dud.

¹³ “U Sebulun un shong harud duriaw; Ka jaka shong jong u kan long ka jakarieh ïa ki liengbah, Bad ka khyndew ka shyiap jong u kan ïar haduh Sidon.

¹⁴ “U Issakhar u long tang kum u kada Uba dem ryngkdung hapdeng la ki jingkit.

¹⁵ Hynrei u ïohi ba ka jaka shongthait ka long kaba bha, Bad ba ka khyndew ka long kaba itynnat. Kumta u pyndem la ka met ban kit ïa ka jingkit, Bad la pynbor ban trei kum u mraw.

¹⁶ “U Dan un synshar ïa la ki briew, Kin long kum kiwei ki jait Israel.

¹⁷ U Dan un long kum u bseiñ harud lynti bah, Bad kum u 'seiñpuh harud lynti, Uba puh na ka khongdong'jat jong u kulai Khnang ba u nongshong un shah bret shadien.

¹⁸ “Ko Trai, nga ap ïa ka jingpyllait im jong me.

¹⁹ “Ka kynhun ki nonglute kin sa wan ïaleh ïa u Gad, Hynrei un phai kylla ban beh ïa ki nadien.

²⁰ “Ka khyndew u Asher kan seisoh shibun, Bad un pynmih ki jait jingbam kiba biang wat ïa u syiem.

²¹ “U Naphtali u long kum ka skei Kaba mareh kat shaba ka mon, kaba kha ïa ki khun kiba itynnat.

²² “U Joseph u long kum u kada khlaw harud ka umpohliew u khun kada khlaw ha sharing lum.

²³ Ki nongshun jong u ki tur ïaleh tyngeh ïa u, Bad ki beh ïa u da ki ryntieh bad ki khnam;

²⁴ Hynrei ka ryntieh jong u ka neh khlem khih, Bad ïa ki ksang'ti jong u la pynkhlaiñ Da ka bor jong U Blei Uba Khlaiñbor jong u Jakob, Da u Nongap langbrot, U nongïada jong ki Israel.

²⁵ Dei U Blei jong u kpa jong me uba ïarap ïa me, U Blei Badonbor Baroh uba kyrkhu ïa me da ki jingkyrkhu u slap najrong, Bad da ki um kiba jylliew napoh khyndew, Ki jingkyrkhu da shibun ki jingri bad ki khun ki kti,

²⁶ Ki jingkyrkhu da u kew bad ki syntiew ki jingkyrkhu kiba don ha ki lumbah na mynhyndai bad kiei kiei kiba sngewtynnat na ki lumrit baneh junom. To kine ki jingkyrkhu kin hiar halor ka khlieh u Joseph, Ha ka shyllangmat jong uta keiñ ïa uba la pynkyrpang na la ki hynmen.

²⁷ “U Benjamin u long kum u suri uba jlawnguid, Mynstep bad janmiet u pynïap bad u bam.”

²⁸ Kine ki long kita ki khat-ar jait Israel, bad kane ka long kaba u kpa jong ki u la ong katba u ai ïa ki kyntien khatduh kiba ïadei bad uwei pa uwei u khun.

Ka jingïap bad kaba tep ïa u Jakob

²⁹ Nangta u Jakob u hukum ïa la ki khun shynrang, u da ong, “Mynta ba ngan sa leit noh sha ki briew jong nga ha kaba ïap noh, tep ïa nga ryngkat bad ki kpa tymmen jong nga ha ka krem kaba don ha ka lyngkha u Ephron, u nong Hit,

³⁰ ha Makhpelah kaba sha mihngi na Mamre ha ka ri Kanaan. U Abraham u la thied ïa kane ka krem lem bad ka lyngkha u Ephron ban pynlong jaka tep ïa ka.

³¹ Dei hangta ba ki la tep ïa u Abraham bad ïa ka Sarah ka tnga jong u; hangta ruh ki la tep ïa u Isaak bad ïa ka Rebekka ka tnga jong u; bad dei hangta ba nga la tep ïa ka Leah.

³² Ïa kata ka lyngkha bad ka krem kaba don hangta la thied na ki Hit. Tep ïa nga hangta.”

³³ Ynda u Jakob u la dep sneng ïa la ki khun, u thiah noh, bad u la ïap.