JENESIS 46 - Khasi CL Bible (BSI)

U Jakob bad la ka longïing longsem ki leit sha Ijipt

¹ Kumta u Jakob u mihnoh, u da kit lut baroh kat kiba u don, bad u leit sha Beersheba, bad hangta u kñia ainguh ha U Blei jong u Isaak u kpa jong u.

² Te U Blei u kren ha u ha ka jingïohipaw mynmiet, bad u ong, “Jakob, Jakob!” U ruh u jubab, “Oi, nga hangne.”

³ “Nga long U Blei, U Blei jong u kpa jong me,” u ong. “Wat sheptieng ban leit hiar sha Ijipt; hangta ngan pynlong ïa ki khun ki ksiew jong me ka jaitbynriew kaba khraw.

⁴ Ngan leit lang bad me sha Ijipt, bad ngan wan ïalam biang ïa ki khun ki ksiew jong me sha kane ka ri. U Joseph ruh un don ryngkat bad me ynda me ïap.”

⁵ Nangta u Jakob u mihnoh na Beersheba. Ki khun shynrang jong u ki pynshong ïa u, ïa ki khun rit jong ki, bad ïa ki tnga jong ki, ha kita ki kali kiba u syiem ka Ijipt u la phah ban kit ïa ki.

^6-7 Ki shim ruh ïa la ki jingri bad ki jingdon jingem baroh kiba ki la lum ha Kanaan, bad ki leit noh sha Ijipt. U Jakob u leit sha Ijipt lem bad ki khun ki ksiew jong u baroh, ki khun shynrang ki ksiew shynrang ki khun kynthei bad ki ksiew kynthei.

⁸ Ki dkhot jong ka ïing ka sem u Jakob kiba leit ryngkat bad u sha Ijipt ki long u khun nyngkong jong u, u Reuben,

⁹ bad ki khun shynrang jong u Reuben: u Hanokh, u Pallu, u Hesron, bad u Karmi.

¹⁰ U Simeon bad ki khun shynrang jong u: u Jemuel, u Jamin, u Ohad, u Jakhin, u Sohar, bad u Shaul, u khun ka kynthei nong Kanaan.

¹¹ U Lebi bad ki khun shynrang jong u: u Gershon, u Kohath, bad u Merari.

¹² U Judah bad ki khun shynrang jong u: u Shelah, u Peres, bad u Serah. (Kiwei pat ki khun shynrang jong u Judah: u Er bad u Onan ki la ïap noh ha Kanaan); ki khun shynrang jong u Peres ki long u Hesron bad u Hamul.

¹³ U Issakhar bad ki khun shynrang jong u: u Tola, u Puah, u Jashub, bad u Shimron.

¹⁴ Ki khun shynrang jong u Sebulun: u Sered, u Elon, bad u Jahlil.

¹⁵ Kine ki dei ki khun shynrang ba ka Leah ka la kha na u Jakob ha Mesopotamia nalor ka khun kynthei jong u, ka Dinah. Baroh ki khun ki ksiew kiba u ïoh na ka Leah ki long laiphew lai ngut.

¹⁶ U Gad bad ki khun shynrang jong u: U Sephon, u Haggi, u Shuni, u Esbon, u Eri, u Arod, bad u Areli.

¹⁷ U Asher bad ki khun shynrang jong u: u Imnah, u Ishbah, u Ishbi, bad u Beraïah lem bad ka Serah ka para jong ki. Ki khun shynrang u Beraïah ki long u Heber bad u Malkhiel.

¹⁸ Kine khathynriew ngut ki long ki khun ki ksiew ba u Jakob u ïoh na ka Silpah ïa kaba u Laban u ai ha ka Leah ka khun jong u ban long ka mraw jong ka.

¹⁹ Ki khun ka Rakhel ka tnga jong u Jakob: U Joseph bad u Benjamin.

²⁰ Ha Ijipt u Joseph u la ïoh ar ngut ki khun shynrang, u Manasseh bad u Ephraim, na ka Asenath ka khun jong u Potiphera, u lyngdoh ha ka Heliopolis.

²¹ Ki khun shynrang jong u Benjamin ki long u Bela, u Bekher, u Ashbel, u Gera, u Naaman, u Ehi, u Rosh, u Muppim, u Huppim, bad u Ard.

²² Kine khatsaw ngut ki long ki khun ki ksiew ba u Jakob u ïoh na ka Rakhel.

²³ U Dan bad u Hushim u khun jong u.

²⁴ U Naphtali bad ki khun shynrang jong u: u Jahsil, u Guni, u Jeser, bad u Shillem.

²⁵ Kine hynñiew ngut ki long ki khun ki ksiew ba u Jakob u ïoh na ka Bilhah kaba u Laban u ai ha ka Rakhel ka khun jong u ban long ka mraw jong ka.

²⁶ Baroh ki khun ki ksiew jong u Jakob kiba la leit sha Ijipt, lait noh ki tnga jong ki khun shynrang jong u, ki long hynriewphew hynriew ngut.

²⁷ Ki khun shynrang u Joseph ïa kiba la kha ha Ijipt ki long ar ngut; kumta ki briew baroh kiba na ka ïing u Jakob kiba la wan sha Ijipt ki long hynñiewphew ngut.

U Jakob bad la ka longïing longsem ha Ijipt

²⁸ U Jakob u phah ïa u Judah ban nang leit sha khmat ban ong ïa u Joseph ban wan ïakynduh bad u ha Goshen.

²⁹ Haba ki la poi hangta, u Joseph u kiew ha la ka kali kulai bad u leit sha Goshen ban ïashem ïa u kpa jong u. Haba ki la ïashem, u Joseph u la piam khak ïa la u kpa, u da ïam slem ha ka ryndang u kpa.

³⁰ U Jakob u ong ha u Joseph, “Mynta nga la kloi lada ïap noh ruh, namar ba nga la ïohi ïa me bad tip ba me dang im.”

³¹ Nangta u Joseph u ong ha la ki hynmen bad ha ki khun ki kti u kpa jong u, “Nga dei ban leit ïathuh ha u syiem ba ki hynmen ki para jong nga bad ki ba-ha-ïing ha-sem i pa kiba shong ha Kanaan ki la wan poi sha nga.

³² Ngan ïathuh ha u ba phi dei ki nongri jingri, bad ba phi la wan ïalam ïa la ki kynhun langbrot, ïa kiwei de ki jingri, bad ïa kiei kiei baroh kat kiba phi don.

³³ Haba u syiem u khot ïa phi bad u kylli phi ïatrei ïaktah aïu,

³⁴ phin jubab ba phi dei ki nongri jingri baroh shi jingim kumba long ki kpa tymmen jong phi. Kumta keiñ un shah ïa phi ban shong ha Goshen; namar ki nong Ijipt kim kwah kano kano ka jingïadei bad ki nongap langbrot.”