JENESIS 44 - Khasi CL Bible (BSI)

Ka khuri ba la jah

¹ U Joseph u hukum ïa u shakri bahakhlieh ha ka ïing jong u, “Pyndap ïa ki byrni jong kine ki briew da ka jingbam, katba ki lah ban kit, bad thep biang ïa ki pisa jong uwei pa uwei na ki ha khlieh ka byrni jong u.

² Thep ïa ka khuri rupa jong nga ha khlieh ka byrni jong u para khatduh, lem bad ïa ka bai kew jong u.” U la leh kumba la bthah ïa u.

³ Dang step phyrngab la phah noh ïa kita shi para bad ïa ki kada jong ki.

⁴ Haba ki la ïaid ym pat da jngai na shnong, u Joseph u ong ha uta u shakri bahakhlieh ha ka ïing jong u, “Khie, leit bud mar mar nadien kito ki briew. Ynda phi lap ïa ki, ong ha ki, ‘Balei phi siew kylliang da kaba sniew ïa kaba bha?

⁵ Balei phi tuh ïa ka khuri rupa u kynrad jong nga? Ka dei kaba u ju pyndonkam ban dih na ka, kaba u ju pyndonkam ha ka kheiñ ka bishar? Phi la leh ïa ka kam kaba shyrkhei.’ ”

⁶ Ynda uta u shakri u la lap ïa ki, u la kren ha ki ïa kijuh ki ktien.

⁷ Ki ruh ki jubab ïa u, “Phi mut kumno, bah, da kaba kren ïa ngi kumne? Ngi smai ba ngim shym leh ïa kaba kum kane.

⁸ Phi tip ba ngi la wanrah biang sha phi na Kanaan ïa kito ki pisa ba ngi lap ha khlieh ki byrni jong ngi. Balei keiñ ngin leit tuh kat ïa ka rupa ne ksiar na ka ïing u kynrad jong phi?

⁹ Bah, lada yn shem ïa ka ha uno uno na ngi, uta u dei ban ïap, bad kiba sah na ngi kin long noh ki mraw jong phi.”

¹⁰ U ruh u ong, “Nga mynjur ïa kata, tangba tang uta uba shim ïa ka khuri un long u mraw jong nga; kiwei pat ki lah ban leit noh.”

¹¹ Kumta ki pynhiar kloi kloi ïa la ki byrni ha madan, bad uwei pa uwei na ki u plied ïa la ka byrni.

¹² U shakri jong u Joseph u la wad bniah da kaba sdang na uba nyngkong ter ter haduh uba khatduh, bad ïa ka khuri la shem ha ka byrni jong u Benjamin.

¹³ Kita shi para ki la kad ïa la ki jaiñ ha ka jingsngewsih, ki la buh biang ïa la ki jingkit halor ki kada jong ki bad ki la leit phai sha kata ka nongbah.

¹⁴ Haba u Judah bad ki hynmen ki para jong u ki la wan sha ïing u Joseph, ki shem ba u dang don hi hangta.

¹⁵ Ki la dem ngon ha khmat jong u, bad u Joseph u ong, “Kaei kane kaba phi la leh? Phim tip ba u briew uba ha ka kyrdan jong nga u lah ban lap ïa phi da ka kheiñ ka bishar?”

¹⁶ U Judah u ong, “Ko kynrad, ngin ong aïu pat ha phi? Kumno keiñ ngin ïasaid? Kumno keiñ ngi lah ban sait khuid ïa lade? U Blei u la lap ïa kane ka kam bymman jong ngi. Mynta te, baroh ngi long ki mraw jong phi, bad ym tang uta na uba la shem ïa ka khuri.”

¹⁷ U Joseph u ong, “O, em! da lei lei ngan ym leh kumta! Tang uta keiñ ha uba la shem ïa ka khuri un long u mraw jong nga. Kiwei pat na phi ki lah ban leit phai suk sha la u kpa.”

U Judah u ïasaid na ka bynta u Benjamin

¹⁸ Nangta u Judah u leit kham hajan u Joseph, bad u ong, “Ko kynrad, shah ïa nga ban kren laitluid bad phi. Wat bitar ïa nga, phi long kum u syiem hi.

¹⁹ Kynrad, phi la kylli ïa ngi, ‘Phi dang don kpa ne phi dang don para shynrang shuh?’

²⁰ Ngi ruh ngi la jubab, ‘Ngi dang don i pa iba la tymmen, bad sa uwei u para uba la kha ha ka jinglong tymmen jong i. U hynmen jong u khynnah, u la ïap, bad na ki khun ka kmie jong u, dei sa tang ma u uba dang im; i pa ruh i da ieit thep mynsiem ïa u.’

²¹ Nangta phi ong ïa ngi ban wan ïalam ïa u shane, khnang ba phin ïoh peit ïa u.

²² Ngi ruh ngi la jubab ba u para um lah ban ieh ïa i pa; namar lada u leh kumta, i pa in ïap.

²³ Te phi ong, ‘Lymda u para khatduh jong phi u wan lang bad phi, yn ym shah shuh ïa phi ban wan ha khmat jong nga.’

²⁴ “Ynda ngi leit phai pat sha i pa, ngi ïathuh lut ha i kat ïa kaba phi ong.

²⁵ Nangta i ong ban leit thied jingbam shuh sa khyndiat.

²⁶ Ngi ïa-ong, ‘Ngim lah ban leit, namar yn ym shah ïa ngi ban leit ha khmat uta u rangbah lymda u para khatduh jong ngi u leit lang bad ngi. Ngin leit tang lada u para khatduh jong ngi un leit ryngkat bad ngi.’

²⁷ Nangta i pa i ong ha ngi, ‘Phi tip ba ka Rakhel ka tnga jong nga ka ïoh tang ar ngut ki khun shynrang na nga.

²⁸ Uwei na ki u la iehnoh ïa nga. Khlem pep u la shah patar lyngkhot lyngkhai ha ki mradkhlaw, namar ngam shym la ïohi shuh ïa u naduh ba u mih.

²⁹ Lada phin shim noh na nga mynta sa ïa une, bad lada ka jia ei ei ïa u, ngan sa shu ïap sngewsih artat ba nga la tymmen.’

^30-31 “Namar kata, ko kynrad,” u Judah u bteng, “lada ngan leit phai sha i pa khlem u para, in tang shu ïohi ba u para um don bad nga, in sa ïap. I ieit thep mynsiem ïa u, bad namar ba i la tymmen eh, ka jingleh jong ngi kan pynïap sngewsih ïa i.

³² Shuh shuh, nga la bahkhlieh ha i pa da la ka jingim na ka bynta u para. Nga ong ïa i ba lada ngam wan ïalam pat ïa u para sha i, ngan sa kit pop ma nga shi rta.

³³ Namar kata, ko kynrad, ieh ngan sah ma nga hangne kum u mraw jong phi ha ka jaka u para, bad shah ïa u ba un leit phai bad la ki hynmen.

³⁴ Kumno keiñ nga lah ban leit phai sha i pa lada u para um don ryngkat bad nga? Ngan ym lah shah ban ïohi kum ïa kata ka apot ba kan wan jia ha i pa.”