JENESIS 41 - Khasi CL Bible (BSI)

U Joseph u batai ïa ki jingphohsniew jong u Syiem

¹ Hadien ar snem kynthih, u Syiem ka ri Ijipt u la phohsniew ba u ïeng harud ka wah Nile,

² ha kaba hynñiew tylli ki masi kynthei kiba sngaid bad kiba plung ki wan mih na kata ka wah bad ki sdang ban ïabam phlang.

³ Nangta, sa hynñiew tylli kiwei pat ki masi kynthei ki wan mih; ki long kiba raikhoh bad kiba sah sa ka shyieng suda. Ki la ki wan mih bad ki la ïeng hajan kita kiwei pat ki masi kynthei ha ka rudwah,

⁴ bad kita ki masi kynthei kiba raikhoh ki la bam lut plain ïa kita ki masi kynthei kiba sngaid. Nangta u syiem u la kyndit thiah.

⁵ U la ïohthiah biang bad u phohsniew sa kawei pat ka jingphohsniew. Hynñiew tylli ki kop kew kiba met bad ba ih, ba ki san ha uwei u jyntang.

⁶ Nangta, sa hynñiew tylli kiwei pat ki kop kew ki la shylluit, kiba raikhoh bad ba la pyntyrkhong da ka lyer ri shyiap, bad ki kop kew kiba raikhoh ki la nguid noh ïa kiba met.

⁷ U syiem u la kyndit thiah bad u sngewthuh ba u la phohsniew.

⁸ Ynda mynstep u la sngewkhuslai; kumta u phah khot ïa ki nongleh myntor bad ïa ki riewstad baroh jong ka ri Ijipt. U ïathuh ha ki ïa la ki jingphohsniew, hynrei ym don uwei ruh uba lah ban batai ïa ki ha u.

⁹ Nangta u nongrah khuri u ong ha u syiem, “Nga dei ban phla mynta ba nga la leh bakla.

¹⁰ Phi la bitar ïa nga bad ïa u rangbah ki nongshet kpu, bad phi la buh ïa ngi ha phatok ha ka ïing jong u kapten jong ki nongap phira.

¹¹ Ha kawei ka miet, baroh ar ngut ngi la phohsniew mar la ka jingphohsniew kaba don la ka jong ka jong ka jingmut.

¹² Uwei u samla Hebru u la don hangta lem bad ngi, uba dei u mraw jong u kapten jong ki nongap phira. Ngi la ïathuh ha u ïa la ki jingphohsniew, bad u la batai ïa ki ha ngi.

¹³ Kiei kiei ki la urlong kumba u la ong: Phi la buh biang ïa nga ha kajuh ka kyrdan, hynrei phi la pynïap noh ïa u nongshet kpu.”

¹⁴ U syiem u la phah khot ïa u Joseph, bad mar kumta la wan sei ïa u na ka ïingbyndi. Ynda u la dep khi tmain bad bujli jaiñ, u leit ha khmat u syiem.

¹⁵ U syiem u ong ha u, “Nga la phohsniew ïa ka jingphohsniew, bad ym don mano mano ba lah ban batai ïa ka. La ïathuh ha nga ba me lah ban batai ïa ki jingphohsniew.”

¹⁶ U Joseph u jubab, “Syiem Kynrad, ngam lah; hynrei U Blei un ai ka jingbatai kaba ai jinghun.”

¹⁷ U syiem u ong, “Nga la phohsniew ba nga ïeng harud ka wah Nile,

¹⁸ haba hynñiew tylli ki masi kynthei kiba sngaid bad kiba plung ki la wan mih na ka wah bad ki sdang ban ïabam phlang.

¹⁹ Nangta, sa hynñiew tylli ki masi kynthei ki la wan mih kiba raikhoh bad kiba sah sa ka shyieng suda. Ki long ki masi kynthei kiba isangsot eh kiba ngam pat ju ïohi hangno hangno ha ka ri Ijipt.

²⁰ Ki masi kynthei kiba raikhoh ki la bam lut plain ïa kita kiba sngaid,

²¹ hynrei ym don mano mano batip shaphang kata, namar ki i kumjuh kumba ki long mynshuwa. Nangta nga la kyndit thiah.

²² Nga la phohsniew ruh ba nga ïohi hynñiew tylli ki kop kew kiba met bad ih, ba ki san ha uwei u jyntang.

²³ Nangta sa hynñiew tylli kiwei pat ki kop kew ki la shylluit, kiba raikhoh bad kiba la pyntyrkhong da ka lyer ri shyiap, bad ki kop kew kiba raikhoh ki la nguid noh ïa kita kiba met.

²⁴ Nga la ïathuh ïa ki jingphohsniew ha ki nongleh myntor, hynrei ym don uwei ruh na ki uba lah ban batai ïa ki ha nga.”

²⁵ U Joseph u ong ha u syiem, “Ki jingphohsniew baroh ar tylli ki mut ïa kajuh. U Blei u la ïathuh ha phi ïa kaei kaba un sa leh.

²⁶ Ki hynñiew tylli ki masi kynthei kiba sngaid ki long ki hynñiew tylli ki snem, bad ki hynñiew tylli ki kop kew kiba met ruh ki long ruh ki hynñiew tylli ki snem; ki don kajuh ka jingmut.

²⁷ Ki hynñiew tylli ki masi raikhoh kiba wan mih hadien bad ki hynñiew tylli ki kop kew kiba raikhoh, bad kiba la pyntyrkhong da ka lyer ri shyiap, ki long hynñiew snem jong ka 'nemsniew.

²⁸ Ka long thik kumba nga la ïathuh ha phi — U Blei u la pyn-i ha phi ïa kaei ba un sa leh.

²⁹ Yn don ka jingseisoh kaba khraw ha ki hynñiew snem ha ka ri Ijipt baroh kawei.

³⁰ Hadien kata, yn don ka 'nemsniew ha ki hynñiew snem, bad yn klet noh ïa kita ki snem kiba pahuh, namar ka 'nemsniew kan sa pynjot ïa ka ri.

³¹ Ïa ka por ka jingpahuh yn klet lut baroh, namar ka 'nemsniew ka ban bud kan long kaba shyrkhei katta katta.

³² Ka jingïaiban ïa ka jingphohsniew jong phi ka mut ba ïa kane la pynskhem da U Blei bad ba un pynurlong shen ïa ka.

³³ “Mynta phi dei ban jied ïa u briew uba stad bad uba shemphang bad thung ïa u ba un peit ïa ka ri.

³⁴ Phi dei ruh ban thung ïa kiwei ki rangbah synshar bad shim ïa kawei na kaba san bynta na ki jingthung ha ki hynñiew snem kiba pahuh.

³⁵ Hukum ïa ki ban lum ïa ka bam baroh ha kine ki snem kiba pahuh, bad ai bor ïa ki ban kynshew ïa u kew ha ki nongbah bad ban da buh nongap ïa u.

³⁶ Kata ka jingbam kan long kum ka jingbuh pynap ïa ka ri ha kita ki hynñiew snem jong ka 'nemsniew ki ban sa wan ha ka ri Ijipt. Da kane ka rukom ki briew kin ym ïapthngan.”

La pynlong lat ïa u Joseph halor ka Ri Ijipt

³⁷ U syiem bad ki rangbah synshar jong u ki la pdiang ïa kane ka jingai jingmut, bad u ong ha ki,

³⁸ “Ngim lah ban shem u briew uba kham bit ban ïa u Joseph, u briew uba don U Mynsiem U Blei.”

³⁹ U syiem u ong ha u Joseph, “U Blei u la pynpaw ha me ïa kane baroh, kumta ka long kaba shai ba me don ka jingstad bad jingshemphang kaba kham khraw ban ïano ïano.

⁴⁰ Ngan buh ïa me ban khmih ïa ka ri jong nga, bad ki briew jong nga baroh kin kohnguh ïa ki hukum jong me. Ka iktiar jong me hadien ka jong nga.

⁴¹ Mynta, nga thung ïa me u lat halor ka ri Ijipt.”

⁴² U syiem u law noh na ka shynriah'ti jong u ïa ka sati kaba don ka muhor syiem bad u pyndeng ïa ka ha ka shynriah'ti jong u Joseph. U pynkup ruh ïa u da ka jaiñ linen bani, bad u pyndeng ïa u kynjri ksiar ha ka ryndang jong u.

⁴³ U la ai ha u ïa ka kali syiem kaba ar ba un shong; bad ki nongap ïa ka ïingsyiem ki ïaid ha khmat jong u bad ki pyrta, “Kynriah! kynriah!” Bad kumta la thung lat ïa u Joseph halor ka ri Ijipt baroh.

⁴⁴ U syiem u ong ruh ha u, “Nga long u syiem — bad yn ym don uwei ruh ha ka ri Ijipt baroh kawei u ban leh ei ei khlem ka jingai jingbit jong me.”

⁴⁵ U la ai kyrteng nong Ijipt ïa u Joseph da ka kyrteng Saphenath Paneah, bad u la ai ha u ka tnga, ka Asenath, ka khun jong u Potiphera, u lyngdoh ha ka nongbah Heliopolis.

⁴⁶ U Joseph u la dap laiphew snem ka rta mynba u sdang ban treikam na ka bynta u syiem Ijipt. U la iehnoh ïa ka ïingsyiem bad u leit kylleng ka ri Ijipt.

⁴⁷ Ha ki hynñiew snem kiba pahuh, ka khyndew ka pynmih shikatdei eh ki jingthung, ïa kiba u Joseph u lum bad kynshew ha ki nongbah.

⁴⁸ Ha kawei pa kawei ka nongbah, u la kynshew ïa ka jingbam na ki lyngkha kiba don sawdong jong ka.

⁴⁹ La don kyrhai eh u kew kat haduh ba u Joseph um donkam shuh ban da thew ïa u — u la long kum u shyiap ka duriaw.

⁵⁰ Ha shuwa ban poi ki snem ka 'nemsniew, u Joseph u la ïoh ar ngut ki khun shynrang na ka Asenath.

⁵¹ U Joseph u ong, “U Blei u la pynlong ïa nga ban klet ïa ki jingshah shitom baroh bad ïa baroh ki ba-ha-ïing ha-sem jong i pa jong nga”; kumta u la khot kyrteng ïa uba nyngkong, u Manasseh.

⁵² U ong ruh, “U Blei u la ai khun ïa nga ha ka ri ba nga shah jynjar”; kumta u la khot kyrteng ïa u khun ba ar, u Ephraim.

⁵³ Ki hynñiew snem kiba pahuh kiba ka ri Ijipt ka la ïoh lehkmen ki la kut, bad ki hynñiew snem jong ka 'nemsniew ki la sdang, kumba u Joseph u la lah ong.

⁵⁴ Ka la don ka 'nemsniew ha kiwei ruh ki ri; hynrei ha ka ri Ijipt baroh kawei, don kyrhai ka bam.

⁵⁵ Haba ki nong Ijipt ki la sdang ban kyrduh bam, ki la leit ud sha u syiem ba un ai bam ïa ki. Kumta u la hukum ïa ki ban leit sha u Joseph, bad ban leh kat kaba u ong ïa ki.

⁵⁶ Ka 'nemsniew ka la kham jur, bad ka la saphriang ïa ka ri baroh kawei, u Joseph u la plie ïa kita ki ïing kynshew jingbam baroh, bad u la die kew ha ki nong Ijipt.

⁵⁷ Ki briew na kylleng ka pyrthei ki la ïawan sha Ijipt ban thied kew na u Joseph, namar ka 'nemsniew ka la ktah jur ha kylleng ki ri.